生命的福氣

詩篇八四:1-12，馬太福音六:33

詩篇84篇是有關耶和華上帝殿院的詩篇中真媠的一篇，詩人通過前往錫安朝聖，渴慕耶和華上帝殿院的心意及信仰課題，閣一遍提醒咱、鼓勵咱通過渴慕、親近、信靠上帝經驗「生命的福氣」：

一、生命及上帝同在的喜樂

詩篇84:1-4詩人一開始就非常清楚告白：「上主─萬軍的統帥啊，你徛起的所在互人赫呢意愛！我戀慕上主的殿院到欲暈去！我的心神向永活的上帝歡喜唱歌。」(現代台語譯本)

詩人清楚上主的殿院是上帝徛起的所在，是充滿上帝的權能、疼痛、榮光的所在。詩人充滿期待、歡喜、渴慕欲前往上帝的殿院，甚至渴慕到欲暈去；詩人整個身心靈全生命欲佇上主的殿院歡喜、謳咾、感恩！作者的生命經歷，講勿會盡的體驗佇上主的殿院，因為及上帝同在充滿喜樂！所以詩人一遍閣一遍盼望、期待來到上帝的殿院真實見證及上帝同在的喜樂及平安！甚至雀鳥仔及燕仔亦會當佇上主殿院尋著厝及巢，連動物亦會當安穩自在佇上主的殿院。第4節詩人告白講：「徛起佇你的殿院的人真有福氣！亻因 稱讚你無煞！」各位兄弟姊妹，咱是抱什麼心情及態度來親近上帝、豈呣是充滿渴慕的心來就近上帝？咱是呣是每一遍參加主日禮拜攏深刻體驗及上帝同在的喜樂及平安？

二、信心、氣力愈加添的見證：

詩篇84:5-7詩人按呢告白講：「對你得著氣力的人真有福氣！亻因 迫切愛上錫安山朝聖。亻因 經過的焦燥山谷攏變做泉源；秋雨降落，福氣滿滿。亻因 愈行愈有力，攏欲佇錫安朝見上帝。」(現代台語譯本)

詩人親像朝聖者仝款，佇人生及生命邁向上帝的目標的過程，咱必然面對真多的困難、挑戰及考驗！前往耶路撒冷聖殿的路程通常需要經過「別加谷」，因為及「流目屎」的希伯來發音相近，真多聖經版本就將「別加谷」譯作「流目屎的山谷」，「別加谷」是沙漠曠旱的所在，總是信靠上主的緣故，上帝欲將沙漠變成充滿水泉的所在。真正信靠上帝的基督徒，面對人生及生命各種實況及困境，雖然有真多艱難、目屎及困苦，總是上帝是咱的倚靠、幫助及應允，咱愈信靠他，信心、氣力愈加添，咱的生命欲成做上帝國的見證！2009年出版新的聖詩619首「咱向前行佇上帝的光」(We Are Marching In The Light Of God)是南非祖魯語的聖詩，真活潑喜樂，真確定將自己的人生及生命仰望上帝的榮光及引導，就會充滿「上帝國的見證」！1990年9月WSCF(世界學生基督徒聯盟)佇法國巴黎舉行五年一次的大會，當時我受推派擔任大會義工(Steward)，佇開會禮拜結束的時，各國的代表唱這首詩歌，對禮拜堂行出來到街路，每人有一條彩色帶(五色代表五大洲)，亦分5隊一面唱一面振動彩帶，真正感動人的場面，亦真實見證信靠上帝的信心、氣力愈加添！詩人為國家君王、領袖的祈禱(第8-9節)，確信上帝對國家、社會、同胞、人民的眷顧、疼惜同在及賜福！

三、敬虔、謙卑信靠上帝的平安：

詩篇84:10-12節詩人的結論告白講：「佇你的殿院亻店 一日，卡贏佇別位亻店 一千日！我寧可佇我上帝的厝顧門，嘛呣願亻店 佇邪惡的人的厝內。因為主上帝是日頭，是盾牌，伊互咱恩惠及光榮；伊呣曾留一項好物無互正直的人。上主─萬軍的統帥啊，信靠你的人真有福氣！」(現代台語譯本)

敬虔謙卑信靠上帝的人真正有福氣，因為亻因 學習生命時刻及上帝同在，亻因 閣卡確定、領受、順服上帝的旨意，亻因 謙卑、信靠上帝活出誠實、正直、喜樂閣平安的生命見證！

每年4月第4主日是「北區大專事工奉獻主日」，通過七星中會89間教會及台北中會99間教會共同關心支持大台北地區大專福音事工的推展。請咱長執兄姊共同支持並為長青團契的輔導及大學生代禱，願上帝賜福亻因每一位攏成做上帝國的精兵及門徒！「八福」這首詩歌是淡江長青團契的契歌，通過耶穌基督的勉勵及提醒，保守長青大專的基督徒閣卡學習耶穌的款式，盡力實踐「世光地鹽」的生命見證！親像使徒保羅佇哥林多前書11:1非常真實勇敢的信仰告白講：「恁著學我，親像我學基督。」這就是咱整體教會大專事工的信仰目標及見證！