羅馬書 第 14 章

1

(THR) Sìn nńg-chiáⁿ ê lâng, lín tio̍h chiap-la̍p i; m̄ sī beh piān-lūn só͘ giâu-gî ê.

(BCL) 信軟茈的人，恁著接納伊，呣是欲辯論所僥疑的。

2

(THR) Ū lâng sìn pah hāng mı̍h lóng thang chia̍h; to̍k-to̍k sìn nńg-chiáⁿ ê sī chia̍h chhài-soe.

(BCL) 有人信百項物攏通食；獨獨信軟茈的，是食菜蔬。

3

(THR) Chia̍h-ê bo̍h-tit khòaⁿ-khin bô chia̍h-ê; bô chia̍h-ê bôh-tit gí-gī chia̍h-ê; in-ūi Siōng-tè í-keng chiap-la̍p i.

(BCL) 食者莫得看輕無食者；無食者莫得擬議食者；因為上帝已經接納伊。

4

(THR) Lí sī chī-chūi teh gí-gī pa̍t lâng ê lô͘-po̍k ah? i khiā-chāi á-sī po̍ah-tó, chū-jiân ū i ê chú-lâng tī-teh. Nā-sī i beh khiā-chāi, in-ūi Chú ōe hō͘ i khiā-chāi.

(BCL) 你是是誰擬議別人的奴僕啊？伊徛在，抑是跋倒，自然有伊的主人佇；若是伊欲徛在，因為主會互伊徛在。

5

(THR) Ū lâng gí-tòan chit jı̍t iâⁿ hit jı̍t; ū lāng gí-tòan jı̍t-jı̍t lóng saⁿ-tâng; ta̍k lâng sim-lāi tio̍h jīn khi chin.

(BCL) 有人擬斷此日贏彼日；有人擬斷日日攏相同。逐人心內著認　真。

6

(THR) Siú jı̍t ê sī ūi-tio̍h Chú lâi siú; chia̍h-ê ūi-tio̍h Chú lâi chia̍h, in-ūi i kám-siā Siōng-tè ; bô chia̍h-ê iā ūi-tio̍h Chú lâi bô chia̍h, iā kám-siā Siōng-tè.

(BCL) 守日者是為著主來守；食者為著主來食，因為伊感謝上帝；無食者也為著主來無食，也感謝上帝。

7

(THR) In-ūi lán bô lâng ūi-tio̍h ka-kī lâi o̍ah, iā bô lâng ūi-tio̍h ka-kī lâi sí.

(BCL) 因為咱無人為著家己來活，也無人為著家己來死。

8

(THR) In-ūi lán nā o̍ah, sī ūi-tio̍h Chú lâi o̍ah; sí, iā sī ūi-tio̍h Chú lâi sí; só͘-í lán, he̍k-sī o̍ah he̍k-sī sí, lóng sio̍k tī Chú.

(BCL) 因為咱若活，是為著主來活；死，也是為著主來死。所以，咱或是活或是死攏屬佇主。

9

(THR) In-ūi Ki-tok só͘-í sí lâi koh-o̍ah, sī beh chòe o̍ah-ê sí-ê ê Chú.

(BCL) 因為基督所以死來復活，是欲做活者死者的主。

10

(THR) Taⁿ lí siáⁿ-sū gí-gī lí ê hiaⁿ-tī? iā lí siáⁿ-sū khòaⁿ-khin lí ê hiaⁿ-tī? In-ūi lán chèng lâng lóng beh khiā tī Siōng-tè kong-chō chêng.

(BCL) 今你啥事擬議你的兄弟？也你啥事看輕你的兄弟？因為咱眾人攏欲徛佇上帝公座前。

11

(THR) In-ūi ū kì-chài kóng, Chú kóng, Góa kì-jiân sī o̍ah ê, bān kha-thâu-u beh kūi góa, Bān chhùi-chı̍h beh o-ló Siōng-tè.

(BCL) 因為有記載講：主講：我既然是活者：萬腳頭窩欲跪我；萬嘴舌欲謳咾上帝。

12

(THR) Án-ni lán ta̍k lâng beh pâi-lia̍t ka-kī ê sū tī Siōng-tè ê bīn-chêng.

(BCL) 按呢，咱逐人欲排列家己的事佇上帝的面前。

13

(THR) Só͘-í lán bo̍h-tit koh saⁿ gí-gī; lín lêng-khó͘ tio̍h tiāⁿ-tio̍h ì-sù bo̍h-tit ēng hō͘ lâng po̍ah-tó á-sī that-gāi ê mı̍h hē tī hiaⁿ-tī ê bīn-chêng.

(BCL) 所以，咱莫得閣相擬議，恁寧可著定著意思莫得用互人跋倒抑是塞礙的物下佇兄弟的面前。

14

(THR) Góa chai, iā tī Chú Iâ-so͘ chhim-sìn, mı̍h pún bô chı̍t hāng sī chho͘-sio̍k; to̍k-to̍k lâng nā lia̍h sím-mı̍h chòe chho͘-sio̍k, chiū hit hāng mı̍h tī hit lâng sī chòe chho͘-sio̍k.

(BCL) 我知，也佇主耶穌深信，物本無一項是粗俗；獨獨人若掠甚麼做粗俗，就彼項物佇彼人是做粗俗。

15

(THR) Chóng-sī nā ūi-tio̍h chia̍h-mı̍h ê sū hō͘ lí ê hiaⁿ-tī iu-būn, chiū lí m̄ sī chiàu jîn-ài lâi kiâⁿ. Ki-tok thòe i sí ê, lí m̄ thang ēng lí ê só͘ chia̍h lâi pāi-hōai i.

(BCL) 總是若為著食物的事互你的兄弟憂悶，就你呣是照仁愛來行。基督替伊死的，你呣通用你的所食來敗壞伊。

16

(THR) Bo̍h-tit tì-kàu lí ê hó hō͘ lâng húi-pòng.

(BCL) 莫得致到你的好互人誹謗；

17

(THR) In-ūi Siōng-tè ê kok put-chāi lim-chia̍h; sī gī, kap pêng-an, kap tī Sèng Sîn ê hoaⁿ-hí.

(BCL) 因為上帝的國不在飲食，是義，及平安，及佇聖神的歡喜。

18

(THR) Ēng án-ni lâi ho̍k-sāi Ki-tok ê, hō͘ Siōng-tè só͘ hoaⁿ-hí, hō͘ lâng só͘ o-ló.

(BCL) 用按呢來服事基督的，互上帝所歡喜，互人所謳咾。

19

(THR) Só͘-í kìⁿ-nā tì-kàu hô-pêng, tāi-ke saⁿ kiàn-lı̍p ê sū, lán tio̍h choan-bū.

(BCL) 所以，見若致到和平大家相建立的事，咱著專務。

20

(THR) Bo̍h-tit in-ūi chia̍h ê iân-kò͘ húi-hōai Siōng-tè ê kang. Ta̍k hāng mı̍h khiok sī chheng-khì; nā-sī tùi chia̍h tì-kàu po̍ah-tó ê, chiū-sī pháiⁿ.

(BCL) 莫得因為食的緣故毀壞上帝的工。逐項物卻是清氣，若是對食致到跋倒的，就是歹。

21

(THR) Bô chia̍h bah, bô lim chiú, bô chòe sím-mı̍h hō͘ hiaⁿ-tī po̍ah-tó, chiah sī hó.

(BCL) 無食肉，無飲酒，無做甚麼互兄弟跋倒，才是好。

22

(THR) Lí só͘ ū ê sìn tio̍h ka-kī chûn tī Siōng-tè ê bīn-chêng. Lâng bô ka-kī gí-gī tī i só͘ jīn chòe tio̍h ê, chiū ū hok-khì.

(BCL) 你所有的信，著家己存佇上帝的面前。人無家己擬議佇伊所認做著的，就有福氣。

23

(THR) To̍k-to̍k lâng nā giâu-gî iā lâi chia̍h, chiū siū tēng-chōe, in-ūi m̄ sī chhut tī sìn; kìⁿ-nā m̄ sī tùi sìn chhut-ê chiū-sī chōe.

(BCL) 獨獨人若僥疑也來食，就受定罪，因為呣是出佇信。見若呣是對信出的就是罪。

Bible Color Mark

• 台語漢字羅馬本
• 巴克禮全羅