箴言 第 8 章

1

(THR) Tì-hūi kiám bô teh kiò? Chhang-miâ kiám bô chhut-siaⁿ?

(BCL) 智慧豈無叫？聰明豈無出聲？

2

(THR) I tī lō͘-piⁿ kôaiⁿ-tōe ê téng-bīn, Tī sı̍p-jī-lō͘-kháu teh khiā.

(BCL) 伊佇路邊高地的頂面，佇十字路口徛，

3

(THR) Tī siâⁿ-mn̂g piⁿ, tī siâⁿ-mn̂g kháu, Tī siâⁿ chhut-jı̍p ê só͘-chāi, tōa-siaⁿ kiò kóng,

(BCL) 佇城門邊，佇城門口，佇城出入的所在，大聲叫講：

4

(THR) Chèng-lâng ah, góa kiò lín, Góa ǹg sè-kan lâng chhut-siaⁿ.

(BCL) 眾人啊，我叫恁，我向世間人出聲。

5

(THR) Kóng, Gōng-tı̍t ê lâng ah, lín tio̍h ōe hiáu-tit thong-ta̍t ê lí; Gû-gōng ê lâng ah, lín sim-lāi tio̍h bêng-pe̍k.

(BCL) 講：戇直的人啊，恁著會曉得通達的理；愚戇的人啊，恁心內著明白。

6

(THR) Lín tio̍h thiaⁿ, in-ūi góa beh kóng ke̍k-hó ê sū; Góa beh khui-chhùi lūn chèng-tı̍t ê sū.

(BCL) 恁著聽，因為我欲講極好的事；我欲開嘴論正直的事。

7

(THR) Góa ê chhùi beh kóng-chhut chin-sı̍t; Góa ê chhùi-tûn òan-hūn pháiⁿ-tāi.

(BCL) 我的嘴欲講出真實；我的嘴唇怨恨歹代。

8

(THR) Góa só͘ kóng ê ōe, lóng sī kong-gī; Kî-tiong bô oan-khiau kōai-biū.

(BCL) 我所講的話攏是公義，其中無彎曲乖謬。

9

(THR) Che ōe bêng-lí ê lâng lóng ōe hiáu-tit, Tit-tio̍h tì-sek ê lâng lóng lia̍h-chòe chèng-tı̍t.

(BCL) 這會明理的人，攏會曉得，得著智識的人，攏掠做正直。

10

(THR) Lín tio̍h sêng-siū góa ê kà-sī, khah-hó tit-tio̍h pe̍h-gûn; Tit-tio̍h tì-sek, khah-hó tit-tio̍h n̂g-kim.

(BCL) 恁著承受我的教示，卡好得著白銀；得著智識，卡好得著黃金。

11

(THR) In-ūi tì-hūi pí âng-pó-chio̍h khah-hó; It-chhè só͘ him-bō͘--ê, lóng bōe kap i pí-tit.

(BCL) 因為智慧比紅寶石卡好；一切所欣慕的攏及伊比得。

12

(THR) Góa tì-hūi ēng thong-ta̍t chòe khiā-khí ê só͘-chāi; Koh chhē-tio̍h tì-sek kap kè-e̍k.

(BCL) 我──智慧用通達做徛起的所在，閣尋著智識及計劃。

13

(THR) Kèng-ùi Iâ-hô-hoa chāi-tī òan-hūn pháiⁿ-tāi; Hit-hō kiau-ngō͘, lām-sám, kap pháiⁿ-lō͘, Í-kı̍p kōai-biū ê chhùi, lóng sī góa só͘ òan-hūn.

(BCL) 敬畏耶和華在佇怨恨歹代；彼號驕傲、濫糝，及歹路，以及乖謬的嘴，攏是我所怨恨。

14

(THR) Góa ū kè-e̍k kap chin ê tì-sek; Góa chiū-sī chhang-miâ, góa ū lêng-le̍k.

(BCL) 我有計劃及真的智識；我就是聰明，我有能力。

15

(THR) Tè-ông tùi góa lâi chē-ūi; Jîn-kun tùi góa tiāⁿ-tio̍h kong-pêng ê hoat.

(BCL) 帝王對我來坐位；人君對我定著公平的法。

16

(THR) Ông-chhin kap kùi-cho̍k, sè-chiūⁿ it-chhè ê sím-phòaⁿ-si, Lóng sī tùi góa lâi chiáng-kôan.

(BCL) 王親及貴族，世上一切的審判司，攏是對我來掌權。

17

(THR) Thiàⁿ góa--ê, góa iā thiàⁿ i; Khún-chhiat chhē góa--ê, beh chhē-tio̍h.

(BCL) 疼我者，我也疼伊；懇切尋我者，欲尋著。

18

(THR) Hó-gia̍h chun-kùi chāi-tī góa, Kú-tn̂g ê pù-ū kap kong-gī iā chāi-tī góa.

(BCL) 好額尊貴在佇我；久長的富有及公義也在佇我。

19

(THR) Góa ê ké-chí khah-hó n̂g-kim, iâⁿ-kè hó-kim; Góa ê chhut-sek iâⁿ-kè bûn-gûn.

(BCL) 我的果子卡好黃金，贏過好金；我的出色贏過紋銀。

20

(THR) Góa kiâⁿ tī kong-gī ê lō͘; Kiâⁿ tī kong-pêng chiah ê lō͘-tiong.

(BCL) 我行佇公義的路，行佇公平諸個路中，

21

(THR) Hō͘ thiàⁿ góa ê lâng sêng-siū hè-châi; Iā chhiong-móa in ê hú-khò͘.

(BCL) 互疼我的人承受貨財，也充滿的府庫。

22

(THR) Tī Iâ-hô-hoa chō-hòa ê khí-thâu, Tī ke̍k khí-thâu chhòng-chō ê tāi-seng, góa sī I só͘ ū.

(BCL) 佇耶和華造化的起頭，佇極起頭創造的代先，我是伊所有。

23

(THR) Tùi éng-óan, tùi ke̍k khí-thâu, Bē ū sè-kài ê tāi-seng, góa í-keng siū siat-lı̍p.

(BCL) 對永遠，對極起頭，未有世界的代先，我已經受設立。

24

(THR) Bē ū chhim-ian, bē ū chōe-chōe chúi ê chúi-chôaⁿ, Í-keng siⁿ góa.

(BCL) 未有深淵，未有多多水的水泉，已經生我。

25

(THR) Tōa-soaⁿ bē tiāⁿ-tio̍h, sió-soaⁿ bē ū ê tāi-seng, Í-keng siⁿ góa.

(BCL) 大山未定著，小山未有的代先，已經生我。

26

(THR) Iâ-hô-hoa iáu-bē chhòng-chō tōa-tōe kap chhân-iá, Í-kı̍p tōe-chiūⁿ thô͘-hún ê gôan-chit.

(BCL) 耶和華猶未創造大地及田野，以及地上土粉的原質。

27

(THR) I kiàn-lı̍p chiah ê thiⁿ; Siat îⁿ-khôan tī chhim-ian ê téng-bīn;

(BCL) 伊建立諸個天，設圓環佇深淵的頂面。

28

(THR) Téng-bīn an-tì kiong-chhong; Kian-kò͘ chhim-ian ê chúi-chôaⁿ;

(BCL) 頂面安置穹蒼，堅固深淵的水泉，

29

(THR) Kā hái tiāⁿ-tio̍h kài-hān; Hō͘ chúi bô pôaⁿ-kè I ê bēng-lēng; Tiāⁿ-tio̍h tōa-tōe ê kun-ki, góa kap I tī-teh.

(BCL) 給海定著界限，互水無過伊的命令，定著大地的根基，我及伊佇。

30

(THR) Hit-sî góa tī-hia chòe sai-hū-thâu; Jı̍t-jı̍t hō͘ I hoaⁿ-hí, Siông-siông tī I bīn-chêng khòai-lo̍k;

(BCL) 彼時，我佇遐做師傅頭，日日互伊歡喜，常常佇伊面前快樂，

31

(THR) Tī thang khiā-khí ê tōe khòai-lo̍k; Iā kap sè-kan lâng saⁿ-kap hoaⁿ-hí.

(BCL) 佇通徛起的地快樂，也及世間人相及歡喜。

32

(THR) Lín chiah ê kiáⁿ, taⁿ tio̍h thiaⁿ-thàn góa; In-ūi chip-siú góa ê tō-lō͘--ê, chiū ū hok-khì.

(BCL) 恁諸個子，今著聽趁我，因為執守我的道路者，就有福氣。

33

(THR) Tio̍h thiaⁿ kà-sī, chiū tit-tio̍h tì-hūi, M̄-thang khì-cho̍at i.

(BCL) 著聽教示就得著智慧，呣通棄絕伊。

34

(THR) Thiaⁿ-thàn góa, jı̍t-jı̍t tī góa ê mn̂g-kháu teh tán, Tī góa ê mn̂g-khiā-piⁿ thèng-hāu ê, Hit-hō lâng ū hok-khì.

(BCL) 聽趁我、日日佇我的門口等、佇我的門豎邊聽候的，彼號人有福氣。

35

(THR) In-ūi chhē-tio̍h góa--ê, chiū chhē-tio̍h o̍ah-miā; Iā beh tùi Iâ-hô-hoa tit-tio̍h un-hūi.

(BCL) 因為尋著我者，就尋著活命，也欲對耶和華得著恩惠。

36

(THR) Tek-chōe góa--ê, sī hāi ka-kī ê sìⁿ-miā; Òan-hūn góa--ê, lóng sī ka-kī chhú sí.

(BCL) 得罪我者，是害家己的生命；怨恨我者，攏是家己取死。

Bible Color Mark

• 台語漢字羅馬本
• 巴克禮全羅