箴言 第 4 章

1

(THR) Lín chiah ê kiáⁿ ah, tio̍h thiaⁿ lāu-pē ê kà-sī; Tio̍h chù-ì lâi tit-tio̍h bêng-lí.

(BCL) 恁諸個子啊，著聽老父的教示，著注意來得著明理。

2

(THR) In-ūi góa ēng hó ê tō-lí hō͘ lín; M̄-thang khì-sak góa ê hoat-tō͘.

(BCL) 因為我用好的道理互恁；呣通棄拺我的法度。

3

(THR) Góa sī lāu-pē ê kiáⁿ; Tī lāu-bú ê bīn-chêng chòe i tē-it thiàⁿ ê iù-siù kiáⁿ.

(BCL) 我是老父的子，佇老母的面前做伊第一疼的幼秀子。

4

(THR) Lāu-pē kà-sī góa, kā góa kóng, Lí ê sim tio̍h kì-tiâu góa ê ōe, Chun-siú góa ê bēng-lēng, chiū tit-tio̍h o̍ah.

(BCL) 老父教示我，給我講：你的心著記住我的話，遵守我的命令，就得著活。

5

(THR) Tio̍h tit-tio̍h tì-hūi, tio̍h tit-tio̍h chhang-miâ, M̄-thang bōe kì-tit, m̄-thang lī-khui góa só͘ kóng ê ōe.

(BCL) 著得著智慧，著得著聰明，呣通記得，呣通離開我所講的話。

6

(THR) M̄-thang khì-sak tì-hūi, i beh pó-hō͘ lí; Tio̍h thiàⁿ i, i beh chiàu-kò͘ lí.

(BCL) 呣通棄拺智慧，伊欲保護你；著疼伊，伊欲照顧你。

7

(THR) Tì-hūi sī kun-pún, tio̍h tit-tio̍h tì-hūi; Tī lí it-chhè só͘ tit-tio̍h ê tiong-kan, tio̍h tit-tio̍h chhang-miâ.

(BCL) 智慧是根本；著得著智慧。佇你一切所得著的中間，著得著聰明。

8

(THR) Lí nā chun-tiōng i, i beh hō͘ lí seng-kôaiⁿ; Lí nā lôan-bō͘ i, i chiū hō͘ lí êng-kng.

(BCL) 你若尊重伊，伊欲互你升高；你若戀慕伊，伊就互你榮光。

9

(THR) I beh ēng súi ê bō tì tī lí ê thâu-khak; Chiong êng-kng ê bián-liû hō͘ lí.

(BCL) 伊欲用娞的帽戴佇你的頭殼，將榮光的冕旒互你。

10

(THR) Góa ê kiáⁿ, tio̍h thiaⁿ lâi chiap-la̍p góa ê ōe, Chiū beh chia̍h tn̂g hè-siū.

(BCL) 我的子，著聽來接納我的話，就欲食長歲壽。

11

(THR) Góa í-keng chí-sī lí tì-hūi ê lō͘, Ín-chhōa lí kiâⁿ chèng-tı̍t ê lō͘-kèng.

(BCL) 我已經指示你智慧的路，引導你行正直的路徑。

12

(THR) Lí kiâⁿ ê sî, bô tì-kàu chó͘-gāi; Lí cháu, ia̍h bô tì-kàu tio̍h-tak.

(BCL) 你行的時，無致到阻礙；你走，亦無致到著觸。

13

(THR) Tio̍h chip-siú kà-sī, m̄-thang pàng-sang; Tio̍h kín-sīn siú i, in-ūi i sī lí ê o̍ah-miā.

(BCL) 著執守教示，呣通放鬆；著謹慎守伊，因為伊是你的活命。

14

(THR) Hiong-ok ê lâng ê lō͘ bo̍h-tit jı̍p; Pháiⁿ-lâng ê lō͘ bo̍h-tit kiâⁿ.

(BCL) 兇惡的人的路莫得入；歹人的路莫得行。

15

(THR) Tio̍h siám-pī i, m̄-thang tùi hia kè; Tio̍h o̍at-cháu lī-khui i, chìn-chêng khì.

(BCL) 著閃避伊，呣通對遐過；著越走離開伊進前去。

16

(THR) In-ūi i nā bô hāi lâng, chiū bōe khùn-tit; Nā bô hō͘ lâng po̍ah-tó, chiū khùn bōe lo̍h-bîn.

(BCL) 因為伊若無害人，就睏得；若無互人跋倒，就睏落眠；

17

(THR) In-ūi in tùi hiong-ok tit-tio̍h chia̍h-piáⁿ; Tùi kiông-pō tit-tio̍h lim-chiú.

(BCL) 因為對兇惡得著食餅，對強暴得著飲酒。

18

(THR) To̍k-to̍k gī-lâng ê lō͘, chhin-chhiūⁿ thàu-chá ê kng, Ná-chiò ná-kng, kàu jı̍t-tiong-tàu.

(BCL) 獨獨義人的路親像透早的光，愈照愈光，到日中晝。

19

(THR) Pháiⁿ-lâng ê lō͘, chhin-chhiūⁿ o͘-àm; In tio̍h-tak m̄-chai sím-mı̍h iân-kò͘.

(BCL) 歹人的路親像黑暗，著觸呣知甚麼緣故。

20

(THR) Góa ê kiáⁿ tio̍h chù-ì thiaⁿ góa ê ōe, Àⁿ hī-khang thiaⁿ góa só͘ kóng--ê.

(BCL) 我的子，著注意聽我的話，俯耳孔聽我所講的，

21

(THR) M̄-thang hō͘ i lī-khui lí ê ba̍k-chiu, Tio̍h kì-tiâu tī lí ê sim-lāi.

(BCL) 呣通互伊離開你的目睭，著記住佇你的心內。

22

(THR) In-ūi chhē-tio̍h i ê lâng, chiū tit-tio̍h o̍ah-miā; Koh thong seng-khu tit-tio̍h ióng-kiāⁿ.

(BCL) 因為尋著伊的人，就得著活命，閣通身軀得著勇健。

23

(THR) Lí tio̍h chīn-la̍t pó-siú lí ê sim. In-ūi i sī o̍ah-miā ê kun-gôan.

(BCL) 你著盡力保守你的心，因為伊是活命的根源。

24

(THR) Lí ê chhùi tio̍h tû-khì siâ-phiah; Lí ê chhùi-tûn tio̍h lī-khui hêng-ge̍k.

(BCL) 你的嘴著除去邪僻，你的嘴唇著離開橫逆。

25

(THR) Lí ê ba̍k-chiu tio̍h khòaⁿ tı̍t-tı̍t; Lí ê ba̍k-chiu tio̍h khòaⁿ thâu-chêng.

(BCL) 你的目睭著看直直；你的目睭著看頭前。

26

(THR) Tio̍h siu-pîⁿ lí ê kha ê lō͘; Tio̍h kian-kò͘ lí lóng-chóng ê lō͘-tô͘.

(BCL) 著修平你的腳的路，著堅固你攏總的路途。

27

(THR) M̄-thang phian-chó phian-iū; Tio̍h hō͘ lí ê kha lī-khui pháiⁿ.

(BCL) 呣通偏左偏右；著互你的腳離開歹。

Bible Color Mark

• 台語漢字羅馬本
• 巴克禮全羅