箴言 第 3 章

1

(THR) Góa ê kiáⁿ, m̄-thang bōe kì-tit góa ê kà-sī; Lí ê sim tio̍h chip-siú góa ê kài-bēng.

(BCL) 我的子，呣通記得我的教示；你的心著執守我的誡命；

2

(THR) In-ūi hiah-ê beh chiong kú-tn̂g ê jı̍t-chí, tn̂g ê hè-siū, Kap pêng-an, ke -thiⁿ hō͘ lí.

(BCL) 因為許個欲將久長的日子，長的歲壽及平安，加添互你。

3

(THR) M̄-thang hō͘ chû-ài sêng-sı̍t lī-khui lí; Tio̍h pa̍k tī lí ê ām-kún, Khek tī lí ê sim-pi.

(BCL) 呣通互慈愛、誠實離開你，著縛佇你的頷頸，刻佇你的心碑。

4

(THR) Án-ni lí beh tī Siōng-tè kap lâng ê bīn-chêng, Tit-tio̍h un-tián kap hó miâ-siaⁿ.

(BCL) 按呢，你欲佇上帝及人的面前得著恩典及好名聲。

5

(THR) Lí tio̍h choan-sim óa-khò Iâ-hô-hoa, M̄-thang óa-khò lí ka-kī ê gâu.

(BCL) 你著專心倚靠耶和華，呣通倚靠你家己的，

6

(THR) Tī lí it-chhè só͘ kiâⁿ ê sū lóng tio̍h jīn I, I beh chí-tiám lí ê lō͘.

(BCL) 佇你一切所行的事攏著認伊，伊欲指點你的路。

7

(THR) M̄-thang ka-kī khòaⁿ-chòe tì-hūi, Tio̍h kèng-ùi Iâ-hô-hoa, lī-khui pháiⁿ-sū.

(BCL) 呣通家己看做智慧；著敬畏耶和華，離開歹事。

8

(THR) Che ōe hō͘ lí ê sin-thé ióng-kiāⁿ, Lūn-te̍k lí ê kun-kut.

(BCL) 這會互你的身體勇健，潤澤你的筋骨。

9

(THR) Tio̍h ēng lí ê châi-bu̍t, Kap lí it-chhè khí-thâu se̍k ê thó͘-sán, chun-kèng Iâ-hô-hoa.

(BCL) 著用你的財物及你一切起頭熟的土產尊敬耶和華。

10

(THR) Án-ni lí ê chhek-chhng beh tīⁿ móa-móa, Lí ê chiú-khut beh ū sin-chiú móa--chhut-lâi.

(BCL) 按呢，你的粟倉欲淀滿滿，你的酒窟欲有新酒滿出來。

11

(THR) Góa ê kiáⁿ, m̄-thang khòaⁿ-khin Iâ-hô-hoa ê kéng-kài, Ia̍h m̄-thang iàm-chiān I ê chek-pī.

(BCL) 我的子，呣通看輕耶和華的警戒，亦呣通厭賤伊的責備；

12

(THR) In-ūi Iâ-hô-hoa chek-pī I só͘ thiàⁿ--ê, Chhin-chhiūⁿ lāu-pē chek-pī i só͘ hoaⁿ-hí ê kiáⁿ.

(BCL) 因為耶和華責備伊所疼者，親像老父責備伊所歡喜的子。

13

(THR) Tit-tio̍h tì-hūi--ê, tit-tio̍h chhang-miâ, Chit-hō lâng ū hok-khì.

(BCL) 得著智慧者，得著聰明，此號人有福氣。

14

(THR) In-ūi tit-tio̍h i iâⁿ-kè tit-tio̍h gûn, I ê tek-lī khah-iâⁿ hó-kim.

(BCL) 因為得著伊贏過得著銀，伊的得利卡贏好金，

15

(THR) Pí âng-pó-chio̍h khah kùi-khì; Lí só͘ him-bō͘-ê, bô chı̍t-hāng ōe pí-tit i.

(BCL) 比紅寶石卡貴氣；你所欣慕的，無一項會比得伊。

16

(THR) I ê chiàⁿ-chhiú ū tn̂g hè-siū, I ê tò-chhiú ū hó-gia̍h kap chun-kùi.

(BCL) 伊的正手有長歲壽，伊的倒手有好額及尊貴。

17

(THR) I ê lō͘ sī khòai-lo̍k ê lō͘; I ê lō͘-kèng lóng sī pêng-an.

(BCL) 伊的路是快樂的路；伊的路徑攏是平安。

18

(THR) Tùi-tī chhî-siú i ê lâng, sī chòe o̍ah-miā chhiū, Khîⁿ-tiâu i ê, ta̍k-ê ū hok-khì.

(BCL) 對佇持守伊的人，是做活命樹；擒住伊的，逐個有福氣。

19

(THR) Iâ-hô-hoa ēng tì-hūi kiàn-lı̍p tōe, Ēng chhang-miâ an-tì thiⁿ.

(BCL) 耶和華用智慧建立地，用聰明安置天，

20

(THR) Ēng I ê tì-sek hō͘ chhim-ian lı̍h-khui, Kiong-chhong lo̍h lō͘-chúi.

(BCL) 用伊的智識互深淵裂開，穹蒼落露水。

21

(THR) Góa ê kiáⁿ, tio̍h chip-siú chin ê tì-hūi kap kè-e̍k; M̄-thang hō͘ in lī-khui lí ê ba̍k-chiu.

(BCL) 我的子，著執守真的智慧及計劃，呣通互離開你的目睭。

22

(THR) Án-ni in beh tī lí ê lêng-hûn chòe o̍ah-miā; Tī lí ê ām-kún chòe súi ê chng-thāⁿ.

(BCL) 按呢，欲佇你的靈魂做活命；佇你的頷頸做娞的妝飾。

23

(THR) Lí chiū beh an-jiân kiâⁿ lí ê lō͘; Lí ê kha ia̍h bô tio̍h-tak.

(BCL) 你就欲安然行你的路，你的腳亦無著觸。

24

(THR) Lí tó-teh, tek-khak bô kiaⁿ; Lí tó-teh, beh chin hó-khùn.

(BCL) 你倒，的確無驚；你倒，欲真好睏。

25

(THR) Hut-jiân lâi ê kiaⁿ-hiâⁿ, lí m̄-bián kiaⁿ; Pháiⁿ-lâng só͘ tú-tio̍h ê pāi-hōai, lí iā m̄-bián kiaⁿ.

(BCL) 忽然來的驚惶，你呣免驚；歹人所抵著的敗壞，你也呣免驚。

26

(THR) In-ūi Iâ-hô-hoa beh chòe lí só͘ óa-khò--ê; I beh pó-siú lí ê kha bô hām-lo̍h lô-bāng.

(BCL) 因為耶和華欲做你所倚靠者；伊欲保守你的腳無陷落羅網。

27

(THR) Lí ê chhiú nā ū kiâⁿ-hó ê khùi-la̍t, m̄-thang the-sî, Chiū tio̍h the̍h hō͘ hit-ê eng-kai tit-tio̍h ê lâng.

(BCL) 你的手若有行好的氣力，呣通推辭，就著提互彼個應該得著的人。

28

(THR) Lí nā ū piān, m̄-thang tùi lí ê chhù-piⁿ kóng, Chhiáⁿ khì, Bîn-á-jı̍t koh lâi, góa beh hō͘ lí.

(BCL) 你若有便，呣通對你的厝邊講：請去，明仔日閣來，我欲互你。

29

(THR) Lí ê chhù-piⁿ tī lí ê hū-kūn an-jiân khiā-khí; Lí m̄-thang siat kè-bô͘ hāi i.

(BCL) 你的厝邊佇你的附近安然徛起，你呣通設計謀害伊。

30

(THR) Lâng m̄-bat hām-hāi lí; Lí m̄-thang bô in-toaⁿ kap i oan-ke.

(BCL) 人呣曾陷害你，你呣通無因端及伊冤家。

31

(THR) M̄-thang him-sōan kiông-pō ê lâng; Ia̍h m̄-thang kéng i só͘ kiâⁿ ê lō͘.

(BCL) 呣通欣羨強暴的人，亦呣通揀伊所行的路。

32

(THR) In-ūi hêng-ge̍k ê lâng sī Iâ-hô-hoa só͘ iàm-ò͘ⁿ; Chèng-tı̍t ê lâng I kap i chhin-bı̍t.

(BCL) 因為，橫逆的人是耶和華所厭惡；正直的人伊及伊親密。

33

(THR) Iâ-hô-hoa ê chiù-chó͘ kàu tī pháiⁿ-lâng ê ke; Nā-sī hó-lâng ê chhù I siúⁿ-sù hok-khì hō͘ i.

(BCL) 耶和華的咒詛到佇歹人的家，若是好人的厝伊賞賜福氣互伊。

34

(THR) Bú-bān lâng--ê, I bú-bān i; Si-un hō͘ khiam-pi ê lâng.

(BCL) 侮慢人的，伊侮慢伊，施恩互謙卑的人。

35

(THR) Tì-hūi ê lâng beh sêng-chiap êng-kng; Gû-gōng ê lâng seng-kôaiⁿ iā chiâⁿ-chòe kiàn-siàu.

(BCL) 智慧的人欲承接榮光；愚戇的人升高也成做見誚。

Bible Color Mark

• 台語漢字羅馬本
• 巴克禮全羅