箴言 第 30 章

1

(THR) Ngá-ki ê kiáⁿ A-kó͘-jíⁿ ê ōe, chiū-sī be̍k-sī; Chit ê lâng tùi Í-thiat kóng, chiū-sī tùi Í-thiat kap Ou-kah kóng;

(BCL) 雅基的子亞古珥的話就是默示。此個人對以鐵講，就是對以鐵及烏甲講：

2

(THR) Góa pí chèng-lâng khah chhún-pūn, Iā bô ū lâng ê chhang-miâ.

(BCL) 我比眾人卡蠢笨，也無有人的聰明。

3

(THR) Góa bô ha̍k-sı̍p tì-hūi, Iā m̄-bat Chì-sèng-ê ê chai-bat.

(BCL) 我無學習智慧，也呣識至聖者的知識。

4

(THR) Chī-chūi chiūⁿ thiⁿ koh lo̍h--lâi? Chī-chūi chū-chı̍p hong tī chhiú-tiong-sim? Chī-chūi pau chúi tī saⁿ-á-lāi? Chī-chūi tiāⁿ-tio̍h tōe ê sì-ke̍k? I ê miâ kiò sím-mı̍h, I ê kiáⁿ miâ kiò sím-mı̍h, lí chai mah?

(BCL) 是誰上天閣落來？是誰聚集風佇手中心？是誰包水佇衫仔內？是誰定著地的四極？伊的名叫甚麼？伊的子名叫甚麼？你知嗎？

5

(THR) Siōng-tè ê ōe, ta̍k-kù lóng sī kè thòan-liān ê, Kìⁿ-nā óa-khò I ê, I chiū chòe in ê tîn-pâi.

(BCL) 上帝的話逐句攏是過鍛煉的；見若倚靠伊的，伊就做的盾牌。

6

(THR) I ê ōe, lí m̄-thang ke-thiⁿ; Kiaⁿ-liáu I chek-pī lí, lí chiū hián-bêng sī kóng pe̍h-chha̍t ê.

(BCL) 伊的話，你呣通加添，驚了伊責備你，你就顯明是講白賊的。

7

(THR) Góa kiû Lí nn̄g kiāⁿ sū; Tī góa bē sí ê tāi-seng, m̄-thang bô hō͘ góa.

(BCL) 我求你二件事，佇我未死的代先，呣通無互我：

8

(THR) Kiû Lí hō͘ hu-ké kap pe̍h-chha̍t lī-khui góa hn̄g-hn̄g; Hō͘ góa bô sòng-hiong iā bô hó-gia̍h; Ēng só͘ tio̍h ēng ê bí-niû hō͘ góa chia̍h;

(BCL) 求你互虛假及白賊離開我遠遠；互我無喪鄉也無好額；用所著用的米糧互我食，

9

(THR) Kiaⁿ-liáu góa pá-chiok m̄-jīn Lí; kóng Iâ-hô-hoa sī chī-chūi? Koh kiaⁿ-liáu góa sòng-hiong chiū thau-the̍h; Tì-kàu siat-to̍k góa ê Siōng-tè ê miâ.

(BCL) 驚了我飽足呣認你，講：耶和華是是誰？閣驚了我喪鄉就偷提，致到褻瀆我的上帝的名。

10

(THR) M̄-thang tùi chú-lâng lâi kóng i ê lô͘-po̍k pháiⁿ-ōe, Kiaⁿ-liáu i chiù-chó͘ lí, lí chiū sǹg-chòe ū chōe.

(BCL) 呣通對主人來講伊的奴僕歹話，驚了伊咒詛你，你就算做有罪。

11

(THR) Ū chı̍t-phài ê lâng chiù-chó͘ i ê lāu-pē, Iā bô kā i ê lāu-bú chiok-hok.

(BCL) 有一派的人，咒詛伊的老父，也無給伊的老母祝福。

12

(THR) Ū chı̍t-phài ê lâng, ka-kī khòaⁿ-chòe chheng-khì; Chóng-sī bô sóe-tû i ê ù-òe.

(BCL) 有一派的人，家己看做清氣，總是無洗除伊的污穢。

13

(THR) Ū chı̍t-phài ê lâng ba̍k-chiu-thâu chīn-chāi kôaiⁿ; Ba̍k-chiu-phê iā thí kôaiⁿ-kôaiⁿ.

(BCL) 有一派的人，目睭頭盡在高，目睭皮也展高高。

14

(THR) Ū chı̍t-phài ê lâng i ê gê chhin-chhiūⁿ kiàm, khí chhin-chhiūⁿ to; Beh thun-bia̍t tōe-bīn-chiūⁿ khùn-khó͘ ê lâng, kap sè-kan ê sòng-hiong lâng.

(BCL) 有一派的人，伊的牙親像劍，齒親像刀，欲吞滅地面上困苦的人及世間的喪鄉人。

15

(THR) Gô͘-khî ū nn̄g ê cha-bó͘-kiáⁿ, siông-siông kóng, Hō͘ góa, hō͘ góa. Ū saⁿ-hāng bô ti-chiok ê; Liân hit-hō bô kóng kàu-gia̍h-ê ū sì-hāng;

(BCL) 蜈蜞有二個查某子，常常講：互我，互我！有三項無知足的，連彼號無講「夠額的」有四項：

16

(THR) Chiū-sī im-hú, kap bōe hôai-īn ê chio̍h-thai; Bô kàu-gia̍h chúi ê tōe, kap bô kóng, Kàu-gia̍h ê hé.

(BCL) 就是陰府及懷孕的石胎，無夠額水的地，及無講夠額的火。

17

(THR) Hì-lāng lāu-pē, Khòaⁿ-khin m̄-thiaⁿ-thàn lāu-bú ê ōe, Hit-hō lâng ê ba̍k-chiu beh hō͘ soaⁿ-kok-tiong ê o͘-a teh--chhut-lâi. Hō͘ eng-á-kiáⁿ só͘ chia̍h.

(BCL) 戲弄老父、看輕呣聽趁老母的話，彼號人的目睭欲互山谷中的烏鴉啄出來，互鷹仔子所食。

18

(THR) Góa só͘ siūⁿ-bōe-chhut ê kî-biāu, ū saⁿ-hāng; Liân góa só͘ m̄-chai-ê ū sì-hāng.

(BCL) 我所想出的奇妙有三項，連我所呣知的有四項：

19

(THR) Chiū-sī eng-chiáu tī khong-tiong ê lō͘; Chôa tī chio̍h-pôaⁿ-téng ê lō͘; Chûn tī hái-tiong ê lō͘; Lâm kap lú kau-ha̍p ê lō͘.

(BCL) 就是鷹鳥佇空中的路；蛇佇石磐頂的路；船佇海中的路；男及女交合的路。

20

(THR) Îm-hū ê lō͘ iā sī án-ni, I chia̍h-liáu chhit i ê chhùi; Chiū kóng, Góa bô kiâⁿ pháiⁿ.

(BCL) 淫婦的路也是按呢：伊食了，拭伊的嘴就講：我無行歹。

21

(THR) Ūi-tio̍h saⁿ-hāng tōe iô-choah, Liân tam-tng bōe-khí-ê ū sì-hāng.

(BCL) 為著三項地搖泏，連擔當起的有四項：

22

(THR) Chiū-sī lô͘-po̍k chòe ông. Gōng-lâng chia̍h kàu-gia̍h;

(BCL) 就是奴僕做王；戇人食夠額；

23

(THR) Bô lâng-iân ê lú-chú chhut-kè; Lú-pī sòa-chiap chú-bú.

(BCL) 無人緣的女子出嫁；女婢續接主母。

24

(THR) Tōe-bīn-chiūⁿ ū sì-hāng bî-sòe ê mı̍h, Chóng-sī ke̍k tì-sek.

(BCL) 地面上有四項微細的物，總是極智識：

25

(THR) Káu-hiā sī bô-la̍t ê chéng-lūi, Chóng-sī tī hē-thiⁿ ê sî pī-pān bí-niû.

(BCL) 蚼蟻是無力的種類，總是佇夏天的時備辦米糧。

26

(THR) Sa-hoan sī lóan-jio̍k ê chéng-lūi, Chóng-sī tī chio̍h-pôaⁿ-tiong khí-chhù.

(BCL) 沙番是軟弱的種類，總是佇石磐中起厝。

27

(THR) Chháu-meh bô kun-ông, Chóng-sī lóng ōe hun-tūi chhut-khì.

(BCL) 草蜢無君王，總是攏會分隊出去。

28

(THR) Siān-lâng ēng chhiú khîⁿ, Chóng-sī tiàm tī ông-kiong.

(BCL) 　蟲用手擒，總是踮佇王宮。繕

29

(THR) Pō͘-kiâⁿ ui-hong-ê ū saⁿ-hāng, Liân kiâⁿ-ta̍h ui-hong-ê ū sì-hāng.

(BCL) 步行威風的有三項，連行踏威風的有四項：

30

(THR) Sai, chiū-sī iá-siù tiong tē-it béng ê, Bô ūi-tio̍h pa̍t-mı̍h lâi siám-pī.

(BCL) 獅──就是野獸中第一猛的、無為著別物來閃避，

31

(THR) La̍h-káu, kap kang ê soaⁿ-iûⁿ; Í-kı̍p bô lâng tí-te̍k ê kun-ông.

(BCL) 獵狗及公的山羊，以及無人抵敵的君王。

32

(THR) Lí nā chū-ko gōng-gōng chòe, Á-sī chûn pháiⁿ liām-thâu; tio̍h ēng chhiú ng chhùi.

(BCL) 你若自高戇戇做，抑是存歹念頭，著用手掩嘴。

33

(THR) Phah gû-leng ōe chiâⁿ ni-iû, Phah-tio̍h phīⁿ ōe chhut-huih; Chhin-chhiūⁿ án-ni kek siū-khì ōe khí saⁿ-chiⁿ.

(BCL) 拍牛奶會成奶油；拍著鼻會出血。親像按呢，激受氣會起相爭。

Bible Color Mark

• 台語漢字羅馬本
• 巴克禮全羅