箴言 第 25 章

1

(THR) Í-ē iā sī Só͘-lô-bûn ê chim-giân, sī Iû-tāi ông Hi-se-ka ê lâng só͘ chhau ê.

(BCL) 以下也是所羅門的箴言，是猶大王希西家的人所抄的。

2

(THR) Chiong tāi-chì pì-ba̍t, sī Siōng-tè ê êng-kng; Chiong tāi-chì chhâ-bêng, sī kun-ông ê êng-kng.

(BCL) 將代誌秘密是上帝的榮光；將代誌查明是君王的榮光。

3

(THR) Thiⁿ ê kôaiⁿ, tōe ê kāu, Kun-ông ê sim iā chhâ-bōe-chhut.

(BCL) 天的高，地的厚，君王的心也查出。

4

(THR) Tû-khì gûn ê che-tái, Chiah ū khì-kū thang hō͘ thòan-liān ê lâng ēng;

(BCL) 除去銀的渣滓，才有器具通互鍛煉的人用。

5

(THR) Tû-khì ông ê bīn-chêng ê pháiⁿ-lâng, I ê kok-ūi sī tùi kong-gī lâi kian-kò͘.

(BCL) 除去王的面前的歹人，伊的國位是對公義來堅固。

6

(THR) Tī ông ê bīn-chêng m̄-thang ka-kī chun tōa, Iā m̄-thang khiā tī tāi-jîn ê ūi.

(BCL) 佇王的面前呣通家己尊大；也呣通徛佇大人的位。

7

(THR) Khah-hó ū lâng tùi lí kóng, Chhiáⁿ lí chiūⁿ-lâi chia, M̄-thang tī lí só͘ kìⁿ ông-chhin ê bīn-chêng, Kiò lí lo̍h-khì.

(BCL) 卡好有人對你講：請你上來遮，呣通佇你所見王親的面前叫你落去。

8

(THR) M̄-thang kín-kín chhut-khì kap lâng oan-ke, Bián-tit kàu-bé siū lí ê chhù-piⁿ lêng-jio̍k ê sî, Lí m̄-chai beh cháiⁿ-iūⁿ chòe.

(BCL) 呣通緊緊出去及人冤家，免得到尾受你的厝邊凌辱的時，你呣知欲怎樣做，

9

(THR) Lí kap chhù-piⁿ kè-kàu, tio̍h kap i pún-sin hun-hē; M̄-thang lō͘-chhut pa̍t-lâng pì-bı̍t ê sū;

(BCL) 你及厝邊計較，著及伊本身分系，呣通露出別人秘密的事，

10

(THR) Kiaⁿ-liáu thiaⁿ-kìⁿ ê lâng ōe mē lí, Lí ê chhàu-miâ chiū oh-tit thoat-lī.

(BCL) 驚了聽見的人會罵你，你的臭名就得脫離。

11

(THR) Kóng-ōe ha̍p-gî, Chhin-chhiūⁿ kim ê pîn-kó hē tī gûn ê nâ-á.

(BCL) 講話合宜，親像金的蘋果下佇銀的籃仔。

12

(THR) Tì-hūi ê lâng ê chek-pī, tī sūn-thàn ê lâng ê hī-khang, Chhin-chhiūⁿ kim ê hī-kau kap hó-kim ê siú-sek.

(BCL) 智慧的人的責備，佇順趁的人的耳孔，親像金的耳及好金的首飾。

13

(THR) Tiong-sìn ê sù-chiá tùi-tī chhe i ê, Chhin-chhiūⁿ siu-koah ê sî ū sng-seh ê liâng-léng; In-ūi i hō͘ chú-lâng ê sim khòaⁿ-o̍ah.

(BCL) 忠信的使者對佇差伊的，親像收割的時有霜雪的涼冷，因為伊互主人的心快活。

14

(THR) Bô-iáⁿ sàng mı̍h lâi khoa-kháu ê, Sī chhin-chhiūⁿ ū hong ū hûn iā bô lo̍h-hō͘.

(BCL) 無影送物來誇口的，是親像有風有雲也無落雨。

15

(THR) Tn̂g-tn̂g thun-lún, chiū koaⁿ-tiúⁿ iā siū i khó͘-khǹg; Un-jiû ê chhùi-chı̍h ōe at-chı̍h kut-thâu.

(BCL) 長長吞，就官長也受伊苦勸；溫柔的嘴舌會遏折骨頭。

16

(THR) Lí ū tit-tio̍h bı̍t bô? chia̍h kàu-gia̍h chiū hó; Kiaⁿ-liáu lí chia̍h kè-gia̍h chiū thò͘--chhut-lâi.

(BCL) 你有得著蜜無？食夠額就好，驚了你食過額就吐出來。

17

(THR) Lí ê kha m̄-thang chia̍p-chia̍p khì chhù-piⁿ ê ke, Kiaⁿ-liáu i iàm-chiān lí, gīn-sîn lí.

(BCL) 你的腳呣通捷捷去厝邊的家，驚了伊厭賤你、哏神你。

18

(THR) Lām-sám kan-chèng hām-hāi chhù-piⁿ ê lâng, Chiū-sī chhin-chhiūⁿ thûi kap to kap lāi-chìⁿ.

(BCL) 濫糝干證陷害厝邊的人，就是親像槌，及刀，及利箭。

19

(THR) Hōan-lān ê sî, óa-khò bô tiong-sìn ê lâng, Chhin-chhiūⁿ pháiⁿ ê chhùi-khí, thu̍t-lûn ê kha.

(BCL) 患難的時倚靠無忠信的人，親像歹的嘴齒，脫輪的腳，

20

(THR) Tùi siong-sim ê lâng chhiùⁿ-koa, Chhin-chhiūⁿ tang-thiⁿ ê sî thǹg-saⁿ, koh chhin-chhiūⁿ piàⁿ-chhò͘ tī kiⁿ ê téng-bīn.

(BCL) 對傷心的人唱歌，親像冬天的時褪衫，閣親像傾醋佇鹼的頂面。

21

(THR) Lí ê tùi-te̍k nā iau, tio̍h ēng bí-niû hō͘ i chia̍h; Chhùi-ta, tio̍h ēng chúi hō͘ i lim;

(BCL) 你的對敵若枵，著用米糧互伊食；嘴乾，著用水互伊飲；

22

(THR) In-ūi lí sī ēng jia̍t-jia̍t ê hé-thòaⁿ thia̍p tī i ê thâu-khak-téng; Iâ-hô-hoa iā beh pò-siúⁿ lí.

(BCL) 因為你是用熱熱的火炭疊佇伊的頭殼頂；耶和華也欲報賞你。

23

(THR) Pak-hong ōe tì-kàu lo̍h hō͘; Húi-pòng lâng ê chı̍h ōe tì-kàu lâng pìⁿ-bīn.

(BCL) 北風會致到落雨，誹謗人的舌會致到人變面。

24

(THR) Lêng-khó͘ tiàm tī chhù-téng ê kak-thâu, Bo̍h-tit kap chháu-nāu ê hū-jîn-lâng saⁿ-kap tòa tī khoan-khoah ê chhù.

(BCL) 寧可踮佇厝頂的角頭，莫得及吵鬧的婦仁人相及住佇寬闊的厝。

25

(THR) Ū hó siau-sit tùi hn̄g-hn̄g lâi, Chhin-chhiūⁿ ēng léng-chúi hō͘ chhùi-ta ê lâng lim.

(BCL) 有好消息對遠遠來，親像用冷水互嘴乾的人飲。

26

(THR) Gī-lâng tī pháiⁿ-lâng ê bīn-chêng thè-niū, Chhin-chhiūⁿ ta̍h-lô ê chúi-chôaⁿ, phah lâ-sâm ê chíⁿ.

(BCL) 義人佇歹人的面前退讓，親像踏濁的水泉，拍垃墋的井。

27

(THR) Chia̍h bı̍t chōe-chōe sī m̄-hó; Lâng kiû ka-kī ê êng-kng bōe-sǹg-tit êng-kng.

(BCL) 食蜜多多是呣好；人求家己的榮光算得榮光。

28

(THR) Lâng bô iok-sok ka-kī ê sim, Sī chhin-chhiūⁿ húi-hōai ê siâⁿ bô chhiûⁿ.

(BCL) 人無約束家己的心，是親像毀壞的城無牆。

Bible Color Mark

• 台語漢字羅馬本
• 巴克禮全羅