箴言 第 24 章

1

(THR) Bo̍h-tit him-sōan pháiⁿ-lâng, Iā m̄-thang ài kap in chòe chı̍t-tui.

(BCL) 莫得欣羨歹人，也呣通愛及in做一堆；

2

(THR) In-ūi in ê sim tô͘-bô͘ kiông-pō, In ê chhùi tâm-lūn chân-hāi.

(BCL) 因為in的心圖謀強暴，in的嘴談論殘害。

3

(THR) Chhù tùi tì-hūi lâi khí-chō, Koh tùi chhang-miâ lâi kiàn-lı̍p.

(BCL) 厝對智慧來起造，閣對聰明來建立；

4

(THR) Koh tùi tì-sek chiū hiah ê pâng-keng, Ū ta̍k-hāng pó-pòe kap súi ê châi-bu̍t móa-móa.

(BCL) 閣對智識就許個房間，有逐項寶貝及娞的財物滿滿。

5

(THR) Tì-hūi ê lâng ū tōa lêng-le̍k, Ū tì-sek ê lâng ke-thiⁿ khùi-la̍t.

(BCL) 智慧的人有大能力；有智識的人加添氣力。

6

(THR) Lí beh kau-chiàn tio̍h ēng hó ê kè-chhek, Bô͘-sū chōe, chiū ōe tek-sèng.

(BCL) 你欲交戰，著用好的計策；謀士多，就會得勝。

7

(THR) Tì-hūi chin kôaiⁿ, gōng-lâng bōe-ōe kàu; Tī siâⁿ-mn̂g i bô khui-chhùi.

(BCL) 智慧真高，戇人boe會到，佇城門伊無開嘴。

8

(THR) Siat kè-bô͘ chòe pháiⁿ ê, Lâng beh chheng i chòe jiá chai-ē ê.

(BCL) 設計謀做歹的，人欲稱伊做惹災禍的。

9

(THR) Gōng-lâng ê sim-siūⁿ sī chōe-ok, Bú-bān-ê sī lâng só͘ iàm-ò͘ⁿ.

(BCL) 戇人的心想是罪惡；侮慢的是人所厭惡。

10

(THR) Lí tī hōan-lān ê jı̍t nā thòe-siok, Lí ê khùi-la̍t chiū chió.

(BCL) 你佇患難的日若退縮，你的氣力就少。

11

(THR) Lâng siū thoa kàu sí-tōe, lí tio̍h kiù i; Lâng beh siū thâi, lí m̄-thang bô kiù i.

(BCL) 人受拖到死地，你著救伊；人欲受thai（殺），你呣通無救伊。

12

(THR) Lí nā kóng, Khòaⁿ ah, chit ê sū góan m̄-chai, Hit-ê kàm-chhat lâng ê sim ê, kiám bōe chhún-to̍k mah? Pó-chôan lí ê sìⁿ-miā-ê kiám m̄-chai? I kiám bô chiàu ta̍k-lâng só͘-kiâⁿ-ê pò-èng ta̍k-lâng mah?

(BCL) 你若講：看啊，此個事我呣知，彼個鑑察人的心的豈boe忖度嗎？保全你的生命的豈呣知？伊豈無照逐人所行的報應逐人嗎？

13

(THR) Góa ê kiáⁿ, lí tio̍h chia̍h bı̍t, in-ūi sī hó; Chia̍h bı̍t-pô͘ só͘ tih ê bı̍t chiū chai tiⁿ.

(BCL) 我的子，你著食蜜，因為是好；食蜜房所滴的蜜就知甜。

14

(THR) Tio̍h chai tì-hūi tī lí ê sim iā sī án-ni; Lí nā chhē-tio̍h, chiong-lâi beh ū hó-pò; Lí ê ǹg-bāng iā bô tì-kàu tōan-cho̍at.

(BCL) 著知智慧佇你的心，也是按呢。你若尋著，將來欲有好報；你的向望也無致到斷絕。

15

(THR) Pháiⁿ-lâng ah, m̄-thang bih teh kong-kek gī-lâng ê ke; M̄-thang pāi-hōai i an-hioh ê só͘-chāi.

(BCL) 歹人啊！呣通匿teh攻擊義人的家；呣通敗壞伊安息的所在。

16

(THR) In-ūi gī-lâng po̍ah-tó chhit-pái ōe koh khí-lâi; Pháiⁿ-lâng siū chai-lān chiū tó-hōai.

(BCL) 因為，義人跋倒七擺，會閣起來；歹人受災難就倒壞。

17

(THR) Lí ê tùi-te̍k po̍ah-tó, lí bo̍h-tit hoaⁿ-hí; I tó-hōai, lí ê sim bo̍h-tit khòai-lo̍k.

(BCL) 你的對敵跋倒，你莫得歡喜；伊倒壞，你的心莫得快樂；

18

(THR) Kiaⁿ-liáu Iâ-hô-hoa khòaⁿ-kìⁿ, chiū bô hoaⁿ-hí, Chiū hō͘ I ê siū-khì lī-khui hit-ê lâng.

(BCL) 驚了耶和華看見就無歡喜，就互伊的受氣離開彼個人。

19

(THR) M̄-thang ūi-tio̍h chòe-pháiⁿ ê lâng lâi bōe khat-tit, Iā bo̍h-tit him-siān pháiⁿ-lâng.

(BCL) 呣通為著做歹的人來boe khat得，也莫得欣羨歹人；

20

(THR) In-ūi pháiⁿ-lâng bô hó bé-kéng, Pháiⁿ-lâng ê teng beh hoa--khì.

(BCL) 因為，歹人無好尾景；歹人的燈欲熄去。

21

(THR) Góa ê kiáⁿ ah, lí tio̍h kèng-ùi Iâ-hô-hoa kap kun-ông, Bo̍h-tit kap hóan-hok ê lâng kiat-kau.

(BCL) 我的子啊，你著敬畏耶和華及君王，莫得及反覆的人結交，

22

(THR) In-ūi in ê chai-hāi hut-jiân khí, In ê nî-hè ê cho̍at, chī-chūi ōe chai?

(BCL) 因為in的災害忽然起。in的年歲的絕，是誰會知？

23

(THR) Ē-bīn só͘ kì-ê iā-sī tì-hūi lâng ê ōe. Sím-phòaⁿ ê sî khòaⁿ lâng ê chêng-biān sī m̄-hó.

(BCL) 下面所記的也是智慧人的話：審判的時看人的情面是呣好。

24

(THR) Tùi pháiⁿ-lâng kóng, Lí sī kong-gī, Chit ê lâng bān peh-sìⁿ beh chiù-chó͘ i, lia̍t-pang beh iàm-ò͘ⁿ i.

(BCL) 對歹人講「你是公義」，此個人萬百姓欲咒詛伊，列邦欲厭惡伊。

25

(THR) Chek-pī pháiⁿ-lâng-ê beh tit-tio̍h hoaⁿ-hí, Hó-ōe ê chiok-hok iā beh lîm-kàu i.

(BCL) 責備歹人的，欲得著歡喜；好話的祝福也欲臨到伊。

26

(THR) Ēng ha̍p-gî ê ōe ìn-tap ê, Chhin-chhiūⁿ ēng chhùi kā lâng chim.

(BCL) 用合宜的話應答的，親像用嘴給人唚。

27

(THR) Lí tio̍h tāi-seng pī-pān gōa-thâu ê sū, Chhân-hn̂g liāu-lí chheng-chhó, Chiah thang khí-chhù.

(BCL) 你著代先備辦外頭的事，田園料理清楚，才通起厝。

28

(THR) M̄-thang bô iân-kò͘ chòe kan-chèng lâi kong-kek chhù-piⁿ; Lí kiám beh ēng chhùi-tûn lâi khi-phiàn lâng?

(BCL) 呣通無緣故做干證來攻擊厝邊，你豈欲用嘴唇來欺騙人。

29

(THR) M̄-thang kóng i cháiⁿ-iūⁿ khóan-thāi góa, góa iā án-ni khóan-thāi i; Góa beh chiàu hit lâng só͘ kiâⁿ ê lâi pò i.

(BCL) 呣通講：伊怎樣款待我，我也按呢款待伊；我欲照彼人所行的來報伊。

30

(THR) Góa keng-kè pîn-tōaⁿ ê lâng ê chhân, Bû-ti ê lâng ê phû-tô-hn̂g.

(BCL) 我經過貧憚的人的田、無知的人的葡萄園，

31

(THR) Khòaⁿ-kìⁿ chhì-phè piàn-piàn hoat, Chháu-chhì jia-khàm tōe-bīn; Chio̍h-chhiûⁿ iā tó--lo̍h-khì.

(BCL) 看見莿帕遍遍發，草茦遮蓋地面，石牆也倒落去。

32

(THR) Góa khòaⁿ-liáu chiū liû-sim siūⁿ, Góa khòaⁿ-liáu chiū siū kà-sī.

(BCL) 我看了就留心想；我看了就受教示。

33

(THR) Koh khùn tiap-á-kú, koh bîn tiap-á-kú, Sok-chhiú the tiap-á-kú;

(BCL) 閣睏霎仔久，閣眠霎仔久，束手撐霎仔久，

34

(THR) Lí ê sòng-hiong beh chhin-chhiūⁿ chha̍t lâi, Lí ê khiàm-kheh chhin-chhiūⁿ chhēng chiàn-kah-ê lâi.

(BCL) 你的喪鄉欲親像賊來，你的欠缺親像穿戰甲的來。

Bible Color Mark

• 台語漢字羅馬本
• 巴克禮全羅