箴言 第 23 章

1

(THR) Lí nā kap koaⁿ-tiúⁿ chē-toh, Tio̍h chù-ì hit-ê tī lí bīn-chêng ê;

(BCL) 你若及官長坐桌，著注意彼個佇你面前的。

2

(THR) Lí nā sī tham-chia̍h ê lâng, Chiū tio̍h ēng to hē tī nâ-âu.

(BCL) 你若是貪食的人，就著用刀下佇嚨喉。

3

(THR) M̄-thang tham i ê hó chia̍h-mı̍h; In-ūi sī phiàn-lâng ê chia̍h-mı̍h.

(BCL) 呣通貪伊的好食物，因為是騙人的食物。

4

(THR) M̄-thang thoa-bôa lâi kiû hó-gia̍h; M̄-thang óa-khò ka-kī ê chhang-miâ.

(BCL) 呣通拖磨來求好額，呣通倚靠家己的聰明。

5

(THR) Lí kiám beh chù-ba̍k tī hit ê khang-hu--ê mah? In-ūi chîⁿ-châi ka-kī beh hoat-sı̍t, chhin-chhiūⁿ eng-chiáu pe chiūⁿ thiⁿ.

(BCL) 你豈欲注目佇彼個空虛的嗎？因為錢財家己欲發翅，親像鷹鳥飛上天。

6

(THR) M̄-thang chia̍h kian-līn ê lâng ê pn̄g, Iā m̄-thang tham i ê hó chu-bī.

(BCL) 呣通食堅吝的人的飯，也呣通貪伊的好滋味；

7

(THR) In-ūi i ê sim án-ni siūⁿ, i chòe lâng iā án-ni; I sui-jiân tùi lí kóng, Chhiáⁿ chia̍h, chhiáⁿ lim, Chóng-sī i ê sim bô ì-hiòng lí.

(BCL) 因為伊的心按呢想，伊做人也按呢。伊雖然對你講，請食，請飲，總是伊的心無意向你。

8

(THR) Chiū lí só͘ chia̍h hit-tiám-á beh thò͘--chhut-lâi; Só͘ kóng ê hó-ōe kui tī khang-khang.

(BCL) 就你所食彼點仔欲吐出來；所講的好話歸佇空空。

9

(THR) M̄-thang kóng-ōe hō͘ gōng-lâng thiaⁿ, In-ūi i beh khòaⁿ-khin lí tì-hūi ê ōe.

(BCL) 呣通講話互戇人聽，因為伊欲看輕你智慧的話。

10

(THR) M̄-thang î-sóa chá-sî só͘ lı̍p ê tōe-kài, Iā m̄-thang chhim-jı̍p bô-pē ê kiáⁿ ê chhân-tōe.

(BCL) 呣通移徙早時所立的地界，也呣通侵入無父的子的田地。

11

(THR) In-ūi sio̍k-hôe in-ê, ū tōa kôan-lêng, I beh tùi lí lâi sin in ê oan.

(BCL) 因為贖回in的有大權能，伊欲對你來伸in的冤。

12

(THR) Tio̍h choan-sim ǹg tī kà-sī, Àⁿ hī-khang tī tì-hūi ê ōe.

(BCL) 著專心向佇教示，俯耳孔佇智慧的話。

13

(THR) Gín-ná m̄-thang bô kàu-tok; Lí ēng chhê phah i bōe tì-kàu sí.

(BCL) 囝仔呣通無教督；你用箠拍伊，boe致到死。

14

(THR) Lí ēng chhê phah i, Chiū thang kiù i ê lêng-hûn bián lo̍h im-hú.

(BCL) 你用箠拍伊，就通救伊的靈魂免落陰府。

15

(THR) Góa ê kiáⁿ, lí ê sim nā ū tì-hūi, Góa ê sim tek-khak chin hoaⁿ-hí.

(BCL) 我的子，你的心若有智慧，我的心的確真歡喜。

16

(THR) Lí ê chhùi nā kóng chèng-tı̍t, Góa ê sim-tn̂g iā beh khòai-lo̍k.

(BCL) 你的嘴若講正直，我的心腸也欲快樂。

17

(THR) Lí m̄-thang him-sōan pháiⁿ-lâng, to̍k-to̍k tio̍h thong-jı̍t kèng-ùi Iâ-hô-hoa.

(BCL) 你呣通欣羨歹人，獨獨著通日敬畏耶和華；

18

(THR) In-ūi iáu ū chiong-lâi ê pò-èng, Lí ê ǹg-bāng iā bōe-ōe tōan-cho̍at.

(BCL) 因為猶有將來的報應，你的向望也boe會斷絕。

19

(THR) Góa ê kiáⁿ, lí tio̍h thiaⁿ, tio̍h ū tì-hūi; Koh ín-chhōa lí ê sim tī chèng-tı̍t ê lō͘.

(BCL) 我的子，你著聽，著有智慧，閣引導你的心佇正直的路。

20

(THR) Hò͘ⁿ lim-chiú ê, tham-chia̍h bah ê, Lí m̄-thang kap i óng-lâi, kiat-kau á chòe-tīn.

(BCL) 好飲酒的，貪食肉的，你呣通及伊往來，結交抑做陣；

21

(THR) In-ūi hò͘ⁿ-chiú tham-chia̍h-ê, beh tì-kàu sòng-hiong; Ài khùn-ê beh tì-kàu chhēng phòa-saⁿ.

(BCL) 因為好酒貪食的，欲致到喪鄉；愛睏的，欲致到穿破衫。

22

(THR) Lí tio̍h thiaⁿ-thàn siⁿ lí ê lāu-pē; Lí ê lāu-bú lāu ê sî, iā m̄-thang khòaⁿ-khin i.

(BCL) 你著聽趁生你的老父；你的老母老的時，也呣通看輕伊。

23

(THR) Tio̍h bóe chin-lí, m̄-thang bōe-chhut; Tì-hūi, kà-sī, kap bêng-lí, iā tio̍h án-ni.

(BCL) 著買真理，呣通賣出；智慧、教示、及明理也著按呢。

24

(THR) Gī-lâng ê lāu-pē beh tōa khòai-lo̍k; Lâng siⁿ-tio̍h tì-hūi ê kiáⁿ beh in-ūi i lâi hoaⁿ-hí.

(BCL) 義人的老父欲大快樂；人生著智慧的子，欲因為伊來歡喜。

25

(THR) Lí tio̍h hō͘ lí ê pē-bú hoaⁿ-hí, Hō͘ siⁿ lí ê bú khòai-lo̍k.

(BCL) 你著互你的父母歡喜，互生你的母快樂。

26

(THR) Góa ê kiáⁿ, tio̍h chiong lí ê sim hiàn hō͘ góa, Lí ê ba̍k-chiu iā tio̍h hoaⁿ-hí góa hiah ê lō͘.

(BCL) 我的子，著將你的心獻互我；你的目睭也著歡喜我許個路。

27

(THR) In-ūi chhiong-ki sī chhim-khiⁿ, Îm-hū sī o̍eh ê chíⁿ.

(BCL) 因為娼妓是深坑；淫婦是狹的井。

28

(THR) I teh tng-tán chhin-chhiūⁿ chha̍t, Tī lâng ê tiong-kan ke-thiⁿ khúi-chà ê lâng.

(BCL) 伊teh當等親像賊；佇人的中間加添詭詐的人。

29

(THR) Chī-chūi ū chai-ē? chī-chūi ū iu-būn? chī-chūi ū saⁿ-chiⁿ? Chī-chūi ū thó͘-khùi? chī-chūi bô iân-kò͘ siū siong? Chī-chūi ba̍k-chiu âng-bū?

(BCL) 是誰有災禍？是誰有憂悶？是誰有相爭？是誰有吐氣？是誰無緣故受傷？是誰目睭紅霧？

30

(THR) Chiū-sī hit-hō lim-chiú m̄-chai soah, Sì-kòe chhē tiau-hô ê chiú, hit-hō lâng.

(BCL) 就是彼號飲酒呣知息，四界尋調和的酒，彼號人。

31

(THR) Chiú chiâⁿ-chòe âng, Tī poe-lāi chiâⁿ-chòe sek-chúi; Lim-liáu ku̍t-âu, lí m̄-thang khòaⁿ i.

(BCL) 酒成做紅，佇杯內成做色水，飲了滑喉，你呣通看伊，

32

(THR) Kàu-bé chhin-chhiūⁿ chôa teh kā lí, Chhin-chhiūⁿ to̍k-chôa teh chhioh lí.

(BCL) 到尾親像蛇teh咬你，親像毒蛇teh螯你。

33

(THR) Lí ê ba̍k-chiu beh khòaⁿ kî-īⁿ ê sū, Lí ê sim beh hoat-chhut kōai-biū.

(BCL) 你的目睭欲看奇異的事；你的心欲發出乖謬。

34

(THR) Lí beh chhin-chhiūⁿ tó tī hái-tiong, Á-sī chhin-chhiūⁿ khùn tī chûn-ûi-téng ê lâng.

(BCL) 你欲親像倒佇海中，抑是親像睏佇船桅頂的人。

35

(THR) Lí beh kóng, Lâng phah góa, góa bô siū-siong, Lâng kòng góa, góa m̄-chai; Góa tī-sî cheng-sîn? góa koh khì chhē chiú.

(BCL) 你欲講：人拍我，我無受傷；人摃我，我呣知。我底時精神，我閣去尋酒。

Bible Color Mark

• 台語漢字羅馬本
• 巴克禮全羅