箴言 第 18 章

1

(THR) Ka-kī hun-piat-ê sī kiû i só͘ ì-ài, Koh thòng-hūn it-chhè chin ê tì-hūi.

(BCL) 家己分別的，是求伊所意愛，閣痛恨一切真的智慧。

2

(THR) Gōng-lâng bô hoaⁿ-hí bêng-lí, To̍k-to̍k ài hián-bêng i ê sim-ì.

(BCL) 戇人無歡喜明理，獨獨愛顯明伊的心意。

3

(THR) Pháiⁿ-lâng lâi, biáu-sī iā tè i lâi; Kiàn-siàu kàu, lêng-jio̍k kap i kàu.

(BCL) 歹人來，藐視也隨伊來；見誚到，凌辱及伊到。

4

(THR) Lâng chhùi-lāi ê ōe chhin-chhiūⁿ chhim ê chúi, Tì-hūi ê chúi-chôaⁿ chhin-chhiūⁿ teh lâu ê khoe-chúi.

(BCL) 人嘴內的話親像深的水；智慧的水泉親像流的溪水。

5

(THR) Thé-thiap pháiⁿ-lâng ê chêng-biān, Phòaⁿ-tòan lâi oan-óng gī-lâng, lóng sī m̄-hó.

(BCL) 體貼歹人的情面，判斷來冤枉義人，攏是呣好。

6

(THR) Gōng-lâng khui-chhùi chiū khí oan-ke, I ê chhùi sī kiò lâng phah.

(BCL) 戇人開嘴就起冤家，伊的嘴是叫人拍。

7

(THR) Gōng-lâng ê chhùi sī i ê pāi-bô, I ê chhùi-tûn sī i ê lêng-hûn ê lô-bāng.

(BCL) 戇人的嘴是伊的敗無；伊的嘴唇是伊的靈魂的羅網。

8

(THR) O̍h-ōe ê lâng ê giân-gú chhin-chhiūⁿ hó-chia̍h ê mı̍h, Chhim jı̍p lâng ê pak-lāi.

(BCL) 學話的人的言語親像好食的物，深入人的腹內。

9

(THR) Chòe-kang sǹg-hēng ê, Kap chân-hāi-ê chòe hiaⁿ-tī.

(BCL) 做工算行的，及殘害的做兄弟。

10

(THR) Iâ-hô-hoa ê miâ sī kian-kò͘ ê tâi, Gī ê lâng cháu--jı̍p-khì, chiū tit-tio̍h an-ún.

(BCL) 耶和華的名是堅固的台；義的人走入去就得著安穩。

11

(THR) Hó-gia̍h lâng ê châi-bu̍t sī i kian-kò͘ ê siâⁿ, Chiàu i phah-sǹg sī chhin-chhiūⁿ kôaiⁿ ê chhiûⁿ.

(BCL) 好額人的財物是伊堅固的城，照伊拍算，是親像高的牆。

12

(THR) Pāi-hōai ê tāi-seng lâng ê sim sī kiau-ngō͘, Chun-kùi ê thâu-chêng sī khiam-pi.

(BCL) 敗壞的代先，人的心是驕傲；尊貴的頭前是謙卑。

13

(THR) Bē thiaⁿ ê tāi-seng chiū ìn, Chiū-sī i ê gōng kap lêng-jio̍k.

(BCL) 未聽的代先就應，就是伊的戇及凌辱。

14

(THR) Lâng ê sim-sîn ōe jím-siū i ê pīⁿ-thiàⁿ; Sim-sîn siū-siong, chī-chūi ōe tng-tit-khí ah?

(BCL) 人的心神會忍受伊的病疼；心神受傷，是誰會當得起啊？

15

(THR) Chhong-bêng ê lâng ê sim tit-tio̍h chai-bat, Tì-hūi lâng ê hī-khang kiû chai-bat.

(BCL) 聰明的人的心得著知識；智慧人的耳孔求知識。

16

(THR) Lé-mı̍h sī thòe lâng khui lō͘, Chhōa i kàu tāi-jîn ê bīn-chêng.

(BCL) 禮物是替人開路，導伊到大人的面前。

17

(THR) Tāi-seng piān-lūn-ê chhin-chhiūⁿ ū gī-lí, To̍k-to̍k chhù-piⁿ lâi chiū cha-chhat i.

(BCL) 代先辯論的，親像有義理；獨獨厝邊來，就查察伊。

18

(THR) Thiu-chhiam ōe hō͘ oan-ke soah, Iā ōe pâi-kái tī ū sè-le̍k ê lâng ê tiong-kan.

(BCL) 抽籤會互冤家息，也會排解佇有勢力的人的中間。

19

(THR) Siū khek-khui ê hiaⁿ-tī beh tit-tio̍h i koh hô, pí chhú kian-kò͘ ê siâⁿ khah-oh; Chit-hō ê saⁿ-chiⁿ chhin-chhiūⁿ iâⁿ-chē ê mn̂g-kông.

(BCL) 受剋虧的兄弟，欲得著伊復和，比取堅固的城卡；此號的相爭親像營寨的門楗。

20

(THR) Lâng kóng-ōe ê hāu-kó ōe hō͘ i ê pak-tó͘ chhiong-móa, I ê chhùi-tûn só͘ chhut ê, beh hō͘ i pá-chiok.

(BCL) 人講話的效果，會互伊的腹肚充滿；伊的嘴唇所出的，欲互伊飽足。

21

(THR) Siⁿ-sí ê kôan chāi-tī chhùi-chı̍h; Thiàⁿ-i--ê beh chia̍h i ê ké-chí.

(BCL) 生死的權在佇嘴舌，疼伊者，欲食伊的果子。

22

(THR) Tit-tio̍h bó͘ ê chiū-sī tit-tio̍h hok-khì, Iā sī tit-tio̍h Iâ-hô-hoa ê un-hūi.

(BCL) 得著某的，就是得著福氣，也是得著耶和華的恩惠。

23

(THR) Sòng-hiong lâng khún-chhiat lâi kiû, Hó-gia̍h lâng pháiⁿ siaⁿ-sàu lâi ìn.

(BCL) 喪鄉人懇切來求；好額人歹聲嗽來應。

24

(THR) Chōe-chōe pêng-iú ê, ka-kī chhú pāi-bô, Ū chı̍t ê ti-kí-ê pí hiaⁿ-tī khah chhin.

(BCL) 多多朋友的，家己取敗無；有一個知己的比兄弟卡親。

Bible Color Mark

• 台語漢字羅馬本
• 巴克禮全羅