箴言 第 17 章

1

(THR) Iân-sia̍h móa-chhù iā ū saⁿ-chiⁿ, M̄-ta̍t-tio̍h chı̍t-tè-á piáⁿ-koaⁿ koh ū an-chēng.

(BCL) 筵席滿厝，也有相爭，呣值著一塊仔餅干，閣有安靜。

2

(THR) Lô͘-po̍k gâu pān tāi-chì beh kóan-hat sià-pāi ê kiáⁿ; Koh tī hiaⁿ-tī ê tiong-kan saⁿ-kap pun ke-hé.

(BCL) 奴僕辦代誌，欲管轄卸敗的子，閣佇兄弟的中間相及分家伙。

3

(THR) Khe-á sī beh thòan-liān gûn, lô͘ sī beh thòan-liān kim; To̍k-to̍k Iâ-hô-hoa thòan-liān lâng ê sim.

(BCL) 篋仔是欲鍛煉銀，爐是欲鍛煉金；獨獨耶和華鍛煉人的心。

4

(THR) Kiâⁿ-pháiⁿ-ê liû-sim thiaⁿ kan-chà ê ōe, Kóng pe̍h-chha̍t-ê chù-ì thiaⁿ siâ-ok ê giân-gú.

(BCL) 行歹的，留心聽奸詐的話；講白賊的，注意聽邪惡的言語。

5

(THR) Thí-chhiò sòng-hiong lâng-ê sī lêng-jio̍k chhòng-chō i ê Chú; Hoaⁿ-hí lâng tú-tio̍h chai-ē ê bōe bián-tit siū hêng-ho̍at.

(BCL) 恥笑喪鄉人的，是凌辱創造伊的主；歡喜人抵著災禍的，免得受刑罰。

6

(THR) Kiáⁿ-sun sī lāu-lâng ê bián-liû, Lāu-pē sī kiáⁿ-jî ê êng-kng.

(BCL) 子孫是老人的冕旒；老父是子兒的榮光。

7

(THR) Gōng-lâng kóng tōa-ōe sī bô ha̍p, Hô-hòng ū tō-tek ê lâng kóng pe̍h-chha̍t ah.

(BCL) 戇人講大話是無合，何況有道德的人講白賊啊？

8

(THR) Pò͘-lō͘ ê mı̍h tī siū-tio̍h ê lâng khòaⁿ-chòe pó-chio̍h, Bô-lūn ǹg toh-lo̍h chı̍t hong-bīn lóng heng-thong.

(BCL) 賄賂的物佇受著的人看做寶石，無論向叨落一方面攏亨通。

9

(THR) Jia-iám lâng ê kè-sit-ê sī it-tio̍h jîn-ài, Tāi-chì ta̍uh-ta̍uh liām ê, hō͘ chhin-bı̍t ê pêng-iú léng-tām.

(BCL) 遮掩人的過失的，是憶著仁愛；代誌沓沓唸的，互親密的朋友冷淡。

10

(THR) Bêng-lí ê lâng chı̍t-ē siū chek-pī chiū jı̍p i ê sim, Iâⁿ-kè phah gōng-lâng chı̍t-pah-ē.

(BCL) 明理的人一下受責備就入伊的心，贏過拍戇人一百下。

11

(THR) Pháiⁿ-lâng choan-bū hóan-pōan, Só͘-í beh chhe chân-jím ê sù-chiá khì kong-kek i.

(BCL) 歹人專務反叛，所以欲差殘忍的使者去攻擊伊。

12

(THR) Lêng-khó͘ tú-tio̍h sit-lo̍h kiáⁿ ê hîm-bú, M̄-thang tú-tio̍h gōng-lâng ê gû-tû ok.

(BCL) 寧可抵著失落子的熊母，呣通抵著戇人的愚躇惡。

13

(THR) Ēng pháiⁿ pò hó ê, Chai-ē bô lī-khui i ê ke.

(BCL) 用歹報好的，災禍無離開伊的家。

14

(THR) Saⁿ-chiⁿ ê khí-thâu chhin-chhiūⁿ chúi phòa-khiah; Só͘-í tī kàu-nāu ê tāi-seng tio̍h hō͘ oan-ke soah.

(BCL) 相爭的起頭親像水破隙，所以，佇到鬧的代先著互冤家息。

15

(THR) Gí-tiāⁿ pháiⁿ lâng chòe-gī, tēng gī-lâng chòe ū-chōe ê, Chí(**Chit) nn̄g hāng lóng sī Iâ-hô-hoa só͘ iàm-ò͘ⁿ.

(BCL) 擬定歹人做義，定義人做有罪的，此二項攏是耶和華所厭惡。

16

(THR) Gōng-lâng kì-jiân bô bêng-lí, Siáⁿ-sū ū chîⁿ the̍h tī chhiú--nih bóe tì-hūi?

(BCL) 戇人既然無明理，啥事有錢提佇手裡買智慧？

17

(THR) Pêng-iú sî-siông saⁿ chhin-ài, Hiaⁿ-tī ê chhut-sì ūi-tio̍h kiù hōan-lān.

(BCL) 朋友時常相親愛，兄弟的出世為著救患難。

18

(THR) Tī chhù-piⁿ ê bīn-chêng tah-èng chòe pó-jīn, Hit-hō lâng chiū-sī gōng-lâng.

(BCL) 佇厝邊的面前答應做保認，彼號人就是戇人。

19

(THR) Ài saⁿ-chiⁿ ê lâng sī ài hōan-chōe; Mn̂g-hō͘ chhòng kôaiⁿ ê lâng sī ka-kī chhú pāi-hōai.

(BCL) 愛相爭的人，是愛犯罪；門戶創高的人，是家己取敗壞。

20

(THR) Sim kōai-phiah--ê bô thang chhē--tio̍h hok-khì; Chı̍h péng-lâi péng-khì-ê hām-lo̍h tī hōan-lān.

(BCL) 心乖僻的，無通尋著福氣；舌反來反去的，陷落佇患難。

21

(THR) Siⁿ gōng-kiáⁿ sī ka-kī ê iu-būn, Gōng-lâng ê pē lóng bô thang hoaⁿ-hí.

(BCL) 生戇子，是家己的憂悶；戇人的父攏無通歡喜。

22

(THR) Hoaⁿ-hí ê sim sī hó-io̍h, Iu-siong ê sim-sîn hō͘ kut ko͘-tâ.

(BCL) 歡喜的心是好藥；憂傷的心神互骨枯焦。

23

(THR) Pháiⁿ-lâng àm-chīⁿ siū pò͘-lō͘, Beh hō͘ àn-kiāⁿ péng-lìn-tńg.

(BCL) 歹人暗靜受賄賂，欲互案件反輪轉。

24

(THR) Tì-hūi sī tī bêng-lí ê lâng ê bīn-chêng, Gōng-lâng ê ba̍k-chiu khòaⁿ tī tōe ê ke̍k-thâu.

(BCL) 智慧是佇明理的人的面前；戇人的目睭看佇地的極頭。

25

(THR) Gû-gōng ê kiáⁿ hō͘ lāu-pē hôan-ló, Hō͘ lāu-bú iu-khó͘.

(BCL) 愚戇的子互老父煩惱，互老母憂苦。

26

(THR) Hêng-ho̍at gī ê lâng sī m̄-hó, Phah péng-kong ê koaⁿ-hú iā-sī án-ni.

(BCL) 刑罰義的人是呣好；拍秉公的官府也是按呢。

27

(THR) Giân-gú chió-ê ū tì-sek, Sèng-chêng hāi-chāi-ê ū chhang-miâ.

(BCL) 言語少的，有智識；性情獬在的，有聰明。

28

(THR) Gōng ê lâng nā chēng-chēng iā sǹg chòe tì-hūi; Chhùi-ba̍t-ê iā sǹg-chòe chhang-miâ.

(BCL) 戇的人若靜靜也算做智慧；嘴密的也算做聰明。

Bible Color Mark

• 台語漢字羅馬本
• 巴克禮全羅