箴言 第 15 章

1

(THR) Un-hô ê ìn-tap ōe hō͘ siū-khì soah; Kóng-ōe sò-pō ōe kek-khí siū-khì.

(BCL) 溫和的應答，會互受氣息；講話躁暴，會激起受氣。

2

(THR) Tì-hūi ê lâng ê chı̍h gâu kóng chai-bat; Gōng-lâng ê chhùi thò͘-chhut gû-gōng.

(BCL) 智慧的人的舌講知識；戇人的嘴吐出愚戇。

3

(THR) Iâ-hô-hoa ê ba̍k-chiu ta̍k só͘-chāi tī-teh; Hó-pháiⁿ lóng teh kàm-chhat.

(BCL) 耶和華的目睭逐所在佇；好歹攏鑑察。

4

(THR) Sûn-liông ê chı̍h sī o̍ah-miā ê chhiū; Nā ū kōai-biū--ê, chiū ōe sún-siong sim-sîn.

(BCL) 純良的舌是活命的樹；若有乖謬者就會損傷心神。

5

(THR) Gōng-lâng khòaⁿ-khin lāu-pē ê kàu-tok; Gōan siū chek-pī-ê, tit-tio̍h kiàn-sek.

(BCL) 戇人看輕老父的教督；願受責備的，得著見識。

6

(THR) Gī-lâng ê chhù-lāi ū chōe-chōe châi-pó; Pháiⁿ-lâng sò͘-thàn--ê, sī chòe i ê hām-hāi.

(BCL) 義人的厝內有多多財寶；歹人所趁的是做伊的陷害。

7

(THR) Tì-hūi ê lâng ê chhùi-tûn pò-iông chai-bat; Gōng-lâng ê sim lóng bô án-ni.

(BCL) 智慧的人的嘴唇報揚知識；戇人的心攏無按呢。

8

(THR) Pháiⁿ-lâng hiàn-chè sī Iâ-hô-hoa só͘ iàm-ò͘ⁿ; Chèng-tı̍t ê lâng kî-tó sī I só͘ hoaⁿ-hí.

(BCL) 歹人獻祭，是耶和華所厭惡；正直的人祈禱，是伊所歡喜。

9

(THR) Pháiⁿ-lâng ê lō͘ sī Iâ-hô-hoa só͘ iàm-ò͘ⁿ; To̍k-to̍k tui-jip kong-gī-ê, chiū tit I thiàⁿ.

(BCL) 歹人的路，是耶和華所厭惡；獨獨追公義的，就得伊疼。

10

(THR) Pàng-sak chiàⁿ-lō͘-ê, beh siū tāng-tāng ê chek-ho̍at; Òan-hūn chek-pī-ê, beh tì-kàu sí-bô.

(BCL) 放拺正路的，欲受重重的責罰；怨恨責備的，欲致到死無。

11

(THR) Im-hú kap Bia̍t-bô lóng tī Iâ-hô-hoa ê ba̍k-chiu-chêng; Hô-hòng sè-kan lâng ê sim ah?

(BCL) 陰府及滅無攏佇耶和華的目睭前，何況世間人的心啊？

12

(THR) Bú-bān ê lâng m̄-ài siū chek-pī, Iā bô beh chiū-kūn tì-hūi ê lâng.

(BCL) 侮慢的人呣愛受責備；也無欲就近智慧的人。

13

(THR) Khòai-lo̍k ê sim ōe hō͘ bīn chhiò-chhiò; Sim nā iu-būn, ōe sún-siong sim-sîn.

(BCL) 快樂的心，會互面笑笑；心若憂悶，會損傷心神。

14

(THR) Chhang-miâ ê lâng ê sim chhē chai-bat; Gōng-lâng ê chhùi it-bī hò͘ⁿ gû-gōng.

(BCL) 聰明的人的心尋知識；戇人的嘴一味好愚戇。

15

(THR) Khùn-khó͘ ê lâng ê jı̍t-chí lóng ū chai-ē; Sim khòai-lo̍k ê lâng iân-sia̍h bô tn̄g.

(BCL) 困苦的人的日子攏有災禍；心快樂的人，筵席無斷。

16

(THR) Hó-gia̍h iā ū khòa-lū; M̄-ta̍t-tio̍h sòng-hiong lâi kèng-ùi Iâ-hô-hoa.

(BCL) 好額也有掛慮，呣值著喪鄉來敬畏耶和華。

17

(THR) Chia̍h chhài-soe, tāi-ke saⁿ-thiàⁿ, Iâⁿ-kè chia̍h pûi ê gû-á, tāi-ke saⁿ òan-hūn.

(BCL) 食菜蔬，大家相疼，贏過食肥的牛仔，大家相怨恨。

18

(THR) Pháiⁿ sèng-tē ê lâng jiá-khí oan-ke; Bô khòai-khòai siū-khì ê lâng ōe hō͘ saⁿ-chiⁿ soah.

(BCL) 歹性地的人惹起冤家；無快快受氣的人會互相爭息。

19

(THR) Pìn-tōaⁿ ê lâng ê lō͘ sī chhin-chhiūⁿ chhì-phè ê lî-pa; Chèng-tı̍t ê lâng ê lō͘ chiâⁿ-chòe tōa-lō͘.

(BCL) 貧憚的人的路是親像莿帕的籬笆；正直的人的路成做大路。

20

(THR) Tì-hūi ê kiáⁿ hō͘ lāu-pē hoaⁿ-hí; Gōng-lâng khòaⁿ-khin i ê lāu-bú.

(BCL) 智慧的子互老父歡喜；戇人看輕伊的老母。

21

(THR) Bû-ti ê lâng lia̍h gû-gōng chòe hoaⁿ-hí; Bêng-lí ê lâng chiàu chèng-tı̍t lâi kiâⁿ.

(BCL) 無知的人掠愚戇做歡喜；明理的人照正直來行。

22

(THR) Bô saⁿ-kap chham-siông, só͘ kè-bô͘ ōe sit-pāi; Bô͘-sū chōe-chōe, só͘ kè-bô͘ ōe chiâⁿ.

(BCL) 無相及參詳，所計謀會失敗；謀士多多，所計謀會成。

23

(THR) Lâng ê chhùi ìn-tap ha̍p-gî, chiū ōe hoaⁿ-hí; Ha̍p-sî ê ōe hó kàu cháiⁿ-iūⁿ!

(BCL) 人的嘴應答合宜，就會歡喜；合時的話好到怎樣！

24

(THR) Tì-hūi ê lâng ū o̍ah-miā ê lō͘ lâi chiūⁿ-khì, Tit-tio̍h lī-khui tī ē-tóe ê im-hú.

(BCL) 智慧的人有活命的路來上去，得著離開佇下底的陰府。

25

(THR) Iâ-hô-hoa beh thiah-húi kiau-ngō͘ ê lâng ê chhù, Beh an-tiāⁿ kóaⁿ-hū ê tōe-kài.

(BCL) 耶和華欲拆毀驕傲的人的厝，欲安定寡婦的地界。

26

(THR) Pháiⁿ ê kè-bô͘ sī Iâ-hô-hoa só͘ iàm-ò͘ⁿ; Nā-sī hó ê ōe sī chheng-kiat.

(BCL) 歹的計謀是耶和華所厭惡；若是好的話是清潔。

27

(THR) Tham-châi-ê, hām-hāi ka-kī ê ke, Òan-hūn pò͘-lō͘ ê, tit-tio̍h o̍ah.

(BCL) 貪財的，陷害家己的家；怨恨賄賂的，得著活。

28

(THR) Gī-lâng ê sim siūⁿ-liáu chiah ìn; Pháiⁿ-lâng ê chhùi thò͘-chhut pháiⁿ-tāi.

(BCL) 義人的心，想了才應；歹人的嘴吐出歹代。

29

(THR) Iâ-hô-hoa lī-khui pháiⁿ-lâng hn̄g-hn̄g; Chóng-sī I thiaⁿ gī-lâng ê kî-tó.

(BCL) 耶和華離開歹人遠遠，總是伊聽義人的祈禱。

30

(THR) Ba̍k-chiu ê kng-bêng hō͘ sim hoaⁿ-hí; Hó siau-sit ōe lūn-te̍k kut.

(BCL) 目睭的光明，互心歡喜；好消息，會潤澤骨。

31

(THR) Thiaⁿ-thàn o̍ah-miā ê chek-pī ê, Beh khiā-khí tī tì-hūi ê lâng ê tiong-kan.

(BCL) 聽趁活命的責備的，欲徛起佇智慧的人的中間。

32

(THR) M̄ thiaⁿ kéng-kài-ê, sī khòaⁿ-khin ka-kī; Chóng-sī thiaⁿ-thàn chek-pī-ê, chiū tit-tio̍h kiàn-sek.

(BCL) 呣聽警戒的，是看輕家己；總是聽趁責備的，就得著見識。

33

(THR) Kèng-ùi Iâ-hô-hoa sī tì-hūi ê kà-sī; Khiam-pi chiū-sī êng-kng ê tāi-seng.

(BCL) 敬畏耶和華是智慧的教示；謙卑就是榮光的代先。

Bible Color Mark

• 台語漢字羅馬本
• 巴克禮全羅