箴言 第 14 章

1

(THR) Tì-hūi ê hū-jîn-lâng ta̍k-ê kiàn-lı̍p i ê ke; Gōng ê hū-jîn-lâng chhin-chhiú húi i.

(BCL) 智慧的婦仁人逐個建立伊的家；戇的婦仁人親手毀伊。

2

(THR) Chiàu chèng-tı̍t lâi kiâⁿ ê lâng kèng-ùi Iâ-hô-hoa; To̍k-to̍k kiâⁿ tāi-chì hêng-ge̍k-ê sī biáu-sī I.

(BCL) 照正直來行的人敬畏耶和華；獨獨行代誌橫逆的，是藐視伊。

3

(THR) Gōng-lâng ê chhùi-lāi ū kiau-ngō͘ ê kóaiⁿ; To̍k-to̍k tì-hūi ê lâng ê chhùi-tûn beh pó-sioh pún-sin.

(BCL) 戇人的嘴內有驕傲的枴；獨獨智慧的人的嘴唇欲保惜本身。

4

(THR) Ke nā bô gû, gû-tiâu chiū khang-khang; Thó͘-sán chōe-chōe sī tùi-tī gû ê la̍t.

(BCL) 家若無牛，牛　就空空；土產多多是對佇牛的力。

5

(THR) Chin-sı̍t ê kan-chèng bô kóng pe̍h-chha̍t; Ké ê kan-chèng kóng pe̍h-chha̍t ōe.

(BCL) 真實的干證無講白賊；假的干證講白賊話。

6

(THR) Bú-bān ê lâng chhē tì-hūi, iā chhē-bô-tio̍h; Chhong-bêng ê lâng khòai-khòai tit-tio̍h chai-bat.

(BCL) 侮慢的人尋智慧，也尋無著；聰明的人快快得著知識。

7

(THR) Kiâⁿ kàu gōng-lâng ê bīn-chêng, Chiū ōe khòaⁿ-kìⁿ i ê chhùi-tûn bô tì-sek.

(BCL) 行到戇人的面前，就會看見伊的嘴唇無智識。

8

(THR) Thong-ta̍t ê lâng ê tì-hūi chāi-tī bêng-pe̍k i ê lō͘; Gōng-lâng ê gōng chiū-sī khúi-chà.

(BCL) 通達的人的智慧在佇明白伊的路；戇人的戇就是詭詐。

9

(THR) Gōng-lâng lia̍h hōan-chōe chòe kún-chhiò; Chèng-tı̍t ê lâng ê tiong-kan ū hô-pêng.

(BCL) 戇人掠犯罪做滾笑；正直的人的中間有和平。

10

(THR) Sim ōe chai ka-kī ê kan-khó͘; Gōa-lâng bô hūn i ê hoaⁿ-hí.

(BCL) 心會知家己的艱苦；外人無份伊的歡喜。

11

(THR) Pháiⁿ-lâng ê chhù beh tó-hōai; Chèng-tı̍t ê lâng ê pò͘-pîⁿ beh heng-ōng.

(BCL) 歹人的厝欲倒壞；正直的人的布棚欲興旺。

12

(THR) Ū chı̍t tiâu lō͘, lâng khòaⁿ-chòe chèng-tı̍t; Kàu-bé chiâⁿ-chòe sí-bô ê lō͘.

(BCL) 有一條路，人看做正直，到尾成做死無的路。

13

(THR) Lâng teh chhiò ê sî, sim iā ū iu-būn; Khòai-lo̍k ê kiat-kio̍k pìⁿ-chòe pi-siong.

(BCL) 人笑的時，心也有憂悶；快樂的結局變做悲傷。

14

(THR) Sim pōe-ge̍k ê lâng beh tùi i ê só͘-kiâⁿ lâi móa-chiok; Hó-lâng iā beh tùi i pún-sin lâi móa-chiok.

(BCL) 心悖逆的人，欲對伊的所行來滿足；好人也欲對伊本身來滿足；

15

(THR) Gōng-tı̍t ê lâng bô chı̍t-kù-ōe m̄-sìn; Thong-ta̍t ê lâng ta̍k-pō͘ kín-sīn.

(BCL) 戇直的人無一句話呣信；通達的人逐步謹慎。

16

(THR) Tì-hūi ê lâng kiaⁿ-hiâⁿ, koh lī-khui pháiⁿ-tāi; Gōng ê lâng hòng-sù, ka-kī óa-khò.

(BCL) 智慧的人驚惶，閣離開歹代；戇的人放肆，家己倚靠。

17

(THR) Khòai siū-khì--ê, kiâⁿ tāi-chì gû-gōng; Kè-bô͘ pháiⁿ--ê, beh tú-tio̍h òan-hūn.

(BCL) 快受氣的，行代誌愚戇；計謀歹的，欲抵著怨恨。

18

(THR) Gōng-tı̍t ê lâng sêng-chiap gû-gōng chòe-gia̍p; Thong-ta̍t ê lâng tit-tio̍h chai-bat chòe bián-liû.

(BCL) 戇直的人承接愚戇做業；通達的人得著知識做冕旒。

19

(THR) Pháiⁿ-lâng phak tī hó-lâng ê bīn-chêng; Chōe-jîn phak tī gī-lâng ê mn̂g-kháu.

(BCL) 歹人仆佇好人的面前；罪人仆佇義人的門口。

20

(THR) Sòng-hiong lâng liân chhù-piⁿ iā òan-hūn i; Hó-gia̍h lâng pêng-iú chin-chōe.

(BCL) 喪鄉人連厝邊也怨恨伊；好額人朋友真多。

21

(THR) Khòaⁿ-khin chhù-piⁿ ê, chit-hō lâng ū chōe; Lîn-bín sòng-hiong ê, hit-hō lâng ū hok-khì.

(BCL) 看輕厝邊的，此號人有罪；憐憫喪鄉的，彼號人有福氣。

22

(THR) Kè-bô͘ pháiⁿ ê, kiám bô jı̍p bê-lō͘ mah? Kè-bô͘ hó ê, beh tit-tio̍h lîn-bín kap sêng-sı̍t.

(BCL) 計謀歹的，豈無入迷路嗎？計謀好的，欲得著憐憫及誠實。

23

(THR) Pah-poaⁿ ê tio̍h-bôa lóng ū lī-ek; Chhùi-tûn kóng chōe-chōe ōe chiū tì-kàu sòng-hiong.

(BCL) 百般的著磨攏有利益；嘴唇講多多話就致到喪鄉。

24

(THR) Tì-hūi ê lâng ê chîⁿ-châi chòe in ê bián-liû; Gōng-lâng ê gōng kàu-bé sī gōng.

(BCL) 智慧的人的錢財做的冕旒；戇人的戇到尾是戇。

25

(THR) Chin-sı̍t ê kan-chèng kiù lâng ê sìⁿ-miā; Kóng pe̍h-chha̍t ê, sī khúi-chà.

(BCL) 真實的干證，救人的性命；講白賊的是詭詐。

26

(THR) Kèng-ùi Iâ-hô-hoa ū kian-kò͘ ê óa-khò; I ê kiáⁿ-jî ū tô-siám ê só͘-chāi.

(BCL) 敬畏耶和華，有堅固的倚靠；伊的子兒有逃閃的所在。

27

(THR) Kèng-ùi Iâ-hô-hoa chiū-sī o̍ah-miā ê chúi-chôaⁿ, Ōe hō͘ lâng lī-khui sí-bô ê lô-bāng.

(BCL) 敬畏耶和華就是活命的水泉，會互人離開死無的羅網。

28

(THR) Kok-ông ê êng-kng chāi-tī peh-sìⁿ ê chōe; Jîn-kun soe-pāi chāi-tī peh-sìⁿ ê chió.

(BCL) 國王的榮光在佇百姓的多；人君衰敗在佇百姓的少。

29

(THR) Bô khòai-khòai siū-khì-ê, tōa-tōa ū chhang-miâ; Sò-sèng-ê tōa hián-chhut gû-gōng.

(BCL) 無快快受氣的，大大有聰明；躁性的，大顯出愚戇。

30

(THR) Sim-lāi an-chēng sī jio̍k-thé ê o̍ah-miā; Òan-tò͘ sī kut-lāi ê hiú-nōa.

(BCL) 心內安靜是肉體的活命；怨妒是骨內的朽爛。

31

(THR) Khek-po̍k sòng-hiong-ê, sī siat-to̍k chhòng-chō i ê Chú; Lîn-bín khiàm-kheh-ê, sī chun-kèng Chú.

(BCL) 刻薄喪鄉的，是褻瀆創造伊的主；憐憫欠缺的，是尊敬主。

32

(THR) Pháiⁿ-lâng tī i só͘ kiâⁿ ê pháiⁿ beh tú-tio̍h chhia-tó; Gī-lâng kàu sí ū ǹg-bāng.

(BCL) 歹人佇伊所行的歹欲抵著捙倒；義人到死有向望。

33

(THR) Tì-hūi an-jiân tiàm tī chhang-miâ ê lâng ê sim; Gōng-lâng ê pak-lāi beh lō͘-hiān.

(BCL) 智慧安然踮佇聰明的人的心；戇人的腹內欲露現。

34

(THR) Kong-gī hō͘ pang-kok seng-kôaiⁿ; Kìⁿ-ū chōe-ok ê peh-sìⁿ siū lêng-jio̍k.

(BCL) 公義互邦國升高；見有罪惡的百姓受凌辱。

35

(THR) Ēng tì-hūi kiâⁿ tāi-chì ê chhe-ēng tit-tio̍h ông ê un-hūi; To̍k-to̍k sià-pāi-ê, ōe tú-tio̍h i siū-khì.

(BCL) 用智慧行代誌的差用得著王的恩惠；獨獨卸敗的會抵著伊受氣。

Bible Color Mark

• 台語漢字羅馬本
• 巴克禮全羅