箴言 第 13 章

1

(THR) Tì-hūi ê kiáⁿ thiaⁿ lāu-pē ê kàu-tok; Bú-bān ê lâng m̄-thiaⁿ chek-pī.

(BCL) 智慧的子聽老父的教督；侮慢的人呣聽責備。

2

(THR) Lâng in-ūi chhùi só͘ kiat ê ké-chí beh hióng-siū hok-khì; Kan-chà ê lâng beh tú-tio̍h kiông-pō.

(BCL) 人因為嘴所結的果子，欲享受福氣；奸詐的人欲抵著強暴。

3

(THR) Iok-sok chhùi-chı̍h--ê, pó-chôan i ê o̍ah-miā; Sûi-piān khui-chhùi--ê, tì-kàu pāi-bô.

(BCL) 約束嘴舌的，保全伊的活命；隨便開嘴的，致到敗無。

4

(THR) Pîn-tōaⁿ lâng ê sim him-bō͘, iā bô só͘ tit-tio̍h; Un-khûn ê lâng beh tit-tio̍h sim-móa ì-chiok.

(BCL) 貧憚人的心欣慕，也無所得著；殷勤的人欲得著心滿意足。

5

(THR) Gī-lâng iàm-chiān pe̍h-chha̍t ōe; Pháiⁿ-lâng ū chhàu-miâ koh kiàn-siàu.

(BCL) 義人厭賤白賊話；歹人有臭名閣見誚。

6

(THR) Kong-gī pó-hō͘ kiâⁿ chèng-tı̍t-ê; Siâ-ok pāi-hōai hōan-chōe ê lâng.

(BCL) 公義保護行正直的；邪惡敗壞犯罪的人。

7

(THR) Ū lâng ka-kī chng-chòe hó-gia̍h, iā bô pòaⁿ-hāng; Ū lâng ka-kī chng-chòe sòng-hiong, sı̍t-chāi ū chōe-chōe châi-bu̍t.

(BCL) 有人家己妝做好額，也無半項；有人家己妝做喪鄉，實在有多多財物。

8

(THR) Lâng ê chîⁿ-châi thang sio̍k-hôe i ê o̍ah-miā; Nā-sī sòng-hiong lâng bô thiaⁿ lâng ê háng-hoah.

(BCL) 人的錢財通贖回伊的活命；若是喪鄉人無聽人的哄喝。

9

(THR) Gī-lâng ê kng beh bêng-liāng; Pháiⁿ-lâng ê teng beh sit.

(BCL) 義人的光欲明亮；歹人的燈欲熄。

10

(THR) Kiau-ngō͘ kan-ta khí saⁿ-chiⁿ; Saⁿ-kap chham-siông--ê, chiū ū tì-hūi.

(BCL) 驕傲干單起相爭；相及參詳者，就有智慧。

11

(THR) M̄-sī tùi tio̍h-bôa lâi tit-tio̍h ê chîⁿ ōe siau-bô; Lâu-kōaⁿ lâi chek-chū--ê, beh ná ke-thiⁿ.

(BCL) 呣是對著磨來得著的錢會消無；流汗來積聚者，欲愈加添。

12

(THR) Só͘ ǹg-bāng--ê iân-chhiân kú, chiū tì-kàu sim thàng-thiàⁿ; Só͘ ì-ài--ê chı̍t-ē kàu, chiū-sī o̍ah-miā ê chhiū.

(BCL) 所向望的延延久，就致到心痛疼；所意愛的一下到，就是活命的樹。

13

(THR) Biáu-sī tō-lí ê, ka-kī chhú bia̍t-bô; Kèng-ùi kài-bēng ê beh tit-tio̍h pò-siúⁿ.

(BCL) 藐視道理的，家己取滅無；敬畏誡命的，欲得著報賞。

14

(THR) Tì-hūi ê lâng ê hoat-tō͘ sī o̍ah-miā ê chúi-chôaⁿ, Ōe hō͘ lâng lī-khui sí-bô ê lô-bāng.

(BCL) 智慧的人的法度是活命的水泉，會互人離開死無的羅網。

15

(THR) Siān-liông ê chhang-miâ hō͘ lâng tit-tio̍h un-tián; Kan-chà ê lâng ê lō͘ sī khâm-khia̍t.

(BCL) 善良的聰明互人得著恩典；奸詐的人的路是嵁硈。

16

(THR) Thong-ta̍t ê lâng lóng ēng tì-hūi kiâⁿ tāi-chì; To̍k-to̍k gōng-lâng pò-iông gōng-sū.

(BCL) 通達的人攏用智慧行代誌；獨獨戇人報揚戇事。

17

(THR) Pháiⁿ ê sù-chiá hām-lo̍h tī chai-ē; Tiong-sìn ê khim-chhe ōe hō͘ lâng khong-kiān.

(BCL) 歹的使者陷落佇災禍；忠信的欽差會互人康健。

18

(THR) Khì-cho̍at kàu-tok--ê, beh tú-tio̍h sòng-hiong kap lêng-jio̍k; Gōan siū chek-pī--ê, beh tit-tio̍h êng-kng.

(BCL) 棄絕教督者，欲抵著喪鄉及凌辱；願受責備者，欲得著榮光。

19

(THR) Só͘-ài-ê tit-tio̍h chiâⁿ, sim chiū hoaⁿ-hí; Lī-khui pháiⁿ-tāi sī gōng-lâng só͘ iàm-ò͘ⁿ.

(BCL) 所愛的得著成，心就歡喜；離開歹代，是戇人所厭惡。

20

(THR) Kap tì-hūi ê lâng saⁿ-kap kiâⁿ ōe chiâⁿ-chòe tì-hūi; Kap gû-gōng ê lâng chòe-phōaⁿ ōe siū sún-siong.

(BCL) 及智慧的人相及行，會成做智慧；及愚戇的人做伴，會受損傷。

21

(THR) Chai-ē beh tui-jip pháiⁿ-lâng; Nā-sī gī ê lâng beh tit-tio̍h pò-siúⁿ.

(BCL) 災禍欲追歹人；若是義的人欲得著報賞。

22

(THR) Hó-lâng lâu sán-gia̍p hō͘ kiáⁿ-sun; Pháiⁿ-lâng só͘ chek-chū ê chîⁿ-châi kui tī gī-lâng.

(BCL) 好人留產業互子孫；歹人所積聚的錢財歸佇義人。

23

(THR) Sòng-hiong lâng chèng-choh tit-tio̍h chōe-chōe bí-niû; Iā ū in-ūi put-gī lâi tú-tio̍h bia̍t-bô--ê.

(BCL) 喪鄉人種作得著多多米糧，也有因為不義，來抵著滅無的。

24

(THR) M̄-kam ēng chhê ê sī òan-hūn i ê kiáⁿ; Nā-sī thiàⁿ-i--ê, chiū chiàu-sî chek-tok i.

(BCL) 呣甘用箠的，是怨恨伊的子；若是疼伊者，就照時責督伊。

25

(THR) Gī-lâng tit-tio̍h chia̍h hō͘ i ê sim móa-chiok; Pháiⁿ-lâng ê pak-tó͘ tek-khak iau.

(BCL) 義人得著食互伊的心滿足；歹人的腹肚的確枵。

Bible Color Mark

• 台語漢字羅馬本
• 巴克禮全羅