箴言 第 12 章

1

(THR) Hoaⁿ-hí siū kàu-tok--ê, chiū-sī hoaⁿ-hí chai-bat; Òan-hūn chek-pī--ê, chiū-sī cheng-siⁿ.

(BCL) 歡喜受教督的，就是歡喜知識；怨恨責備者，就是精牲。

2

(THR) Hó-lâng beh tit-tio̍h Iâ-hô-hoa ê un-hūi; Siat khúi-kè ê lâng, I beh tēng i ê chōe.

(BCL) 好人欲得著耶和華的恩惠；設詭計的人，伊欲定伊的罪。

3

(THR) Lâng bōe-ōe tùi pháiⁿ lâi kiàn-lı̍p; Gī-lâng ê kun-pún éng bōe iô-tāng.

(BCL) 人會對歹來建立；義人的根本永搖動。

4

(THR) Châi-tek ê hū-jîn-lâng sī tiōng-hu ê bián-liû; Sià-pāi ê hū-jîn-lâng hō͘ tiōng-hu chhin-chhiūⁿ kut hiú-nōa.

(BCL) 才德的婦仁人是丈夫的冕旒；卸敗的婦仁人互丈夫親像骨朽爛。

5

(THR) Gī-lâng ê liām-thâu sī kong-pêng; Pháiⁿ-lâng ê kè-bô͘ sī khúi-chà.

(BCL) 義人的念頭是公平；歹人的計謀是詭詐。

6

(THR) Pháiⁿ-lâng ê ōe sī tng-tán beh hāi lâng; Chèng-tı̍t ê lâng ê chhùi, beh kiù i.

(BCL) 歹人的話是當等欲害人；正直的人的嘴欲救伊。

7

(THR) Pháiⁿ-lâng tó-hōai kui tī bô; Gī-lâng ê ke beh khiā-chāi.

(BCL) 歹人倒壞，歸佇無；義人的家欲徛在。

8

(THR) Lâng beh chiàu i ê tì-hūi tit-tio̍h o-ló; Sim-lāi kōai-biū--ê, beh siū biáu-sī.

(BCL) 人欲照伊的智慧得著謳咾；心內乖謬的欲受藐視。

9

(THR) Siū lâng khòaⁿ-khin--ê, iáu-kú ū lô͘-po̍k ê, Khah-iâⁿ ka-kī chun-tōa, iā khiàm-kheh bí-niû ê.

(BCL) 受人看輕者，猶久有奴僕的，卡贏家己尊大，也欠缺米糧的。

10

(THR) Gī-lâng koan-sim i ê cheng-siⁿ ê o̍ah-miā; Pháiⁿ-lâng ê lîn-bín iā sī chân-jím.

(BCL) 義人關心伊的精牲的活命；歹人的憐憫也是殘忍。

11

(THR) Chèng-choh i ê chhân-hn̂g ê, beh ū bí-niû kàu-gia̍h, Kau-pôe bô hē-lo̍h ê lâng sī bû-ti.

(BCL) 種作伊的田園的，欲有米糧夠額；交陪無下落的人是無知。

12

(THR) Pháiⁿ-lâng him-bō͘ put-gī ê lâng ê lô-bāng; Gī-lâng ê kun-thâu siⁿ-chhut ké-chí.

(BCL) 歹人欣慕不義的人的羅網；義人的根頭生出果子。

13

(THR) Chhùi-tûn ê kè-sit sī pháiⁿ ê lô-bāng; To̍k-to̍k gī-lâng beh thoat-lī hōan-lān.

(BCL) 嘴唇的過失是歹的羅網；獨獨義人欲脫離患難。

14

(THR) Lâng in-ūi chhùi só͘ kiat ê ké-chí beh tit-tio̍h hok-khì móa-móa; Lâng chiàu i ê chhiú só͘ chòe--ê, beh tit-tio̍h pò-èng.

(BCL) 人因為嘴所結者果子，欲得著福氣滿滿；人照伊的手所做的，欲得著報應。

15

(THR) Gōng-lâng khòaⁿ ka-kī ê lō͘ chòe chèng-tı̍t; To̍k-to̍k tì-hūi ê lâng thiaⁿ lâng khó͘-khǹg.

(BCL) 戇人看家己的路做正直；獨獨智慧的人聽人苦勸。

16

(THR) Gōng-lâng ê m̄-gōan liâm-piⁿ hián-chhut; Thong-ta̍t ê lâng khǹg-ba̍t kiàn-siàu.

(BCL) 戇人的呣願連鞭顯出；通達的人囥密見誚，

17

(THR) Kóng sı̍t-ōe--ê, hián-bêng kong-gī; Lām-sám kan-chèng--ê, hián-chhut khúi-khiat.

(BCL) 講實話的，顯明公義；濫糝干證的，顯出詭譎。

18

(THR) Kóng-ōe sò-sèng--ê, chhin-chhiūⁿ to ê chha̍k-lâng; Tì-hūi ê lâng ê chı̍h ōe i-hó lâng.

(BCL) 講話躁性的，親像刀的鑿人；智慧的人的舌會醫好人。

19

(THR) Sêng-sı̍t ê chhùi éng-óan kian-kò͘; Pe̍h-chha̍t ê chı̍h put-kò tiap-á-kú.

(BCL) 誠實的嘴，永遠堅固；白賊的舌，不過霎仔久。

20

(THR) Tô͘-bô͘ pháiⁿ-tāi--ê, sim chûn khúi-chà; Khǹg lâng hô-hó--ê, beh tit-tio̍h hoaⁿ-hí.

(BCL) 圖謀歹代的，心存詭詐；勸人和好的，欲得著歡喜。

21

(THR) Gī-lâng bô tú-tio̍h chai-hāi; Pháiⁿ-lâng tú-tio̍h chai-hō móa-móa.

(BCL) 義人無抵著災害；歹人抵著災禍滿滿。

22

(THR) Pe̍h-chha̍t ê chhùi-tûn sī Iâ-hô-hoa só͘ iàm-ò͘ⁿ; Kiâⁿ tāi-chì sêng-sı̍t--ê, sī I só͘ hoaⁿ-hí.

(BCL) 白賊的嘴唇是耶和華所厭惡；行代誌誠實的，是伊所歡喜。

23

(THR) Thong-ta̍t ê lâng ún-khǹg chai-bat; Gōng-lâng ê sim hián-chhut gû-gōng;

(BCL) 通達的人隱囥知識；戇人的心顯出愚戇。

24

(THR) Un-khûn ê lâng i ê chhiú beh chiáng-kôan; Pîn-tōaⁿ ê lâng beh chòe lâng ê khó͘-kang.

(BCL) 殷勤的人伊的手欲掌權；貧憚的人欲做人的苦工。

25

(THR) Lâng ê sim khòa-lū, hō͘ i lóe-chì; Chı̍t-kù hó-ōe, hō͘ i hoaⁿ-hí.

(BCL) 人的心掛慮，互伊餒志；一句好話，互伊歡喜。

26

(THR) Gī-lâng ín-chhōa i ê chhù-piⁿ; Pháiⁿ-lâng ê lō͘ hō͘ lâng sit-bê.

(BCL) 義人引導伊的厝邊；歹人的路互人失迷。

27

(THR) Pîn-tōaⁿ ê lâng bô pek phah-la̍h só͘ tit-tio̍h--ê; Un-khûn ê lâng tit-tio̍h lâng pó-kùi ê châi-bu̍t.

(BCL) 貧憚的人無拍獵所得著者；殷勤的人得著人寶貴的財物。

28

(THR) Tī kong-gī ê lō͘ ū o̍ah-miā; I ê lō͘-kèng pēng bô sí-bô.

(BCL) 佇公義的路有活命；伊的路徑並無死無。

Bible Color Mark

• 台語漢字羅馬本
• 巴克禮全羅