箴言 第 11 章

1

(THR) Khúi-chà ê thian-phêng sī Iâ-hô-hoa só͘ iàm-ò͘ⁿ; Kong-pêng ê tô-chí sī I só͘ hoaⁿ-hí.

(BCL) 詭詐的天秤是耶和華所厭惡；公平的鉈子是伊所歡喜。

2

(THR) Kiau-ngō͘ lâi, kiàn-siàu ia̍h lâi; Chóng-sī tì-hūi sī kap khiam-pi ê lâng saⁿ-kap tī-teh.

(BCL) 驕傲來，見誚亦來；總是智慧是及謙卑的人相及佇。

3

(THR) Chèng-tı̍t ê lâng, i ê chin-sı̍t beh ín-chhōa i; Kan-chà ê lâng, i ê kōai-phiah beh pāi-hōai i.

(BCL) 正直的人，伊的真實欲引導伊；奸詐的人，伊的乖僻欲敗壞伊。

4

(THR) Tōa siū-khì ê jı̍t, chîⁿ-châi bô lī-ek; Chí-ū kong-gī ōe kiù lâng thoat-lī sí-bô.

(BCL) 大受氣的日錢財無利益；只有公義會救人脫離死無。

5

(THR) Ôan-chôan ê lâng ê gī beh pho͘-pîⁿ i ê lō͘; To̍k-to̍k pháiⁿ-lâng beh in-ūi i ê pháiⁿ po̍ah-tó.

(BCL) 完全的人的義欲舖平伊的路；獨獨歹人欲因為伊的歹跋倒。

6

(THR) Chèng-tı̍t ê lâng ê gī beh chín-kiù i; Kan-chá ê lâng beh hō͘ in ê pháiⁿ lia̍h-tio̍h.

(BCL) 正直的人的義欲拯救伊；奸詐的人欲互的歹掠著。

7

(THR) Pháiⁿ-lâng chı̍t-ē sí, i ê ǹg-bāng beh bô--khì; Chōe-jîn só͘ him-bō͘-ê, iā bô--khì.

(BCL) 歹人一下死，伊的向望欲無去；罪人所欣慕的也無去。

8

(THR) Gī-lâng tit-tio̍h thoat-lī hōan-lān; Ū pháiⁿ-lâng chòe i ê thòe-sin.

(BCL) 義人得著脫離患難，有歹人做伊的替身。

9

(THR) Bô kèng-khiân ê lâng ēng chhùi hāi chhù-piⁿ; To̍k-to̍k gī-lâng tùi chai-bat tit-tio̍h kiù.

(BCL) 無敬虔的人用嘴害厝邊；獨獨義人對知識得著救。

10

(THR) Gī-lâng heng-thong, thong-siâⁿ hoaⁿ-hí; Pháiⁿ-lâng bia̍t-bô, lâng lóng chhut hoaⁿ-hí ê siaⁿ.

(BCL) 義人亨通，通城歡喜；歹人滅無，人攏出歡喜的聲。

11

(THR) Siâⁿ in-ūi chèng-tı̍t ê lâng ê chiok-hok chiū heng-khí; Chóng-sī in-ūi pháiⁿ-lâng ê chhùi chiū chhia-tó.

(BCL) 城因為正直的人的祝福就興起，總是因為歹人的嘴就捙倒。

12

(THR) Biáu-sī chhù-piⁿ--ê, sī bû-ti ê lâng; Chóng-sī bêng-lí ê lâng chēng-chēng bô chòe-siaⁿ.

(BCL) 藐視厝邊者，是無知的人；總是明理的人靜靜無做聲。

13

(THR) Sì-kòe kiâⁿ, kóng lâng ê tn̂g-té, lāu-siat pì-bı̍t ê sū; Sim sêng-sı̍t ê lâng khǹg-ba̍t tāi-chì.

(BCL) 四界行，講人的長短，漏泄祕密的事；心誠實的人，囥密代誌。

14

(THR) Bô tì-hūi ê chí-tō, peh-sìⁿ chiū sit-pāi; Bô͘-sū chōe, chiū tit-tio̍h an-ún.

(BCL) 無智慧的指導，百姓就失敗；謀士多，就得著安穩。

15

(THR) Kā siⁿ-hūn lâng chòe pó-jīn, beh tōa siū khek-khui; M̄-ài kā lâng tah-èng--ê, chiū tit-tio̍h an-ún.

(BCL) 給生份人做保認，欲大受剋虧；呣愛給人答應的，就得著安穩。

16

(THR) Hó tek-hēng ê hū-jîn-lâng tit-tio̍h miâ-siaⁿ; Kiông-béng ê ta-po͘-lâng tit-tio̍h chîⁿ-châi.

(BCL) 好德行的婦仁人得著名聲；強猛的查甫人得著錢財。

17

(THR) Jîn-chû ê lâng lī-ek ka-kī ê sìⁿ-miā; Chân-jím ê lâng hāi ka-kī ê seng-khu.

(BCL) 仁慈的人利益家己的生命；殘忍的人害家己的身軀。

18

(THR) Pháiⁿ-lâng keng-êng, tit-tio̍h hu-ké ê kang-chîⁿ; Iā gī ê chéng-chí--ê, tit-tio̍h sı̍t-chāi ê hāu-kó.

(BCL) 歹人經營，得著虛假的工錢；撒義的種子的，得著實在的效果。

19

(THR) Tn̂g-tn̂g kiâⁿ-gī--ê, beh tit-tio̍h o̍ah; Tui-jip pháiⁿ-tāi--ê, beh tì-kàu sí;

(BCL) 長長行義的，欲得著活；追歹代的，欲致到死。

20

(THR) Sim-lāi kōai-phiah--ê, sī Iâ-hô-hoa só͘ iàm-ò͘ⁿ; Kiâⁿ tāi-chì ôan-chôan--ê, sī I só͘ hoaⁿ-hí.

(BCL) 心內乖僻者，是耶和華所厭惡；行代誌完全的，是伊所歡喜。

21

(THR) Pháiⁿ-lâng chhiú khan chhiú, tek-khak bōe bián siū hêng-ho̍at; Gī-lâng ê hō͘-è beh tit-tio̍h chín-kiù.

(BCL) 歹人手牽手，的確免受刑罰；義人的後裔欲得著拯救。

22

(THR) Hū-jîn-lâng súi, iā bô bêng-lí, Chhin-chhiūⁿ kim-khôan kòa tī ti ê phīⁿ.

(BCL) 婦仁人娞也無明理，親像金環掛佇豬的鼻。

23

(THR) Gī-lâng só͘ ì-ài--ê, lóng sī hó; Pháiⁿ-lâng só͘ ǹg-bāng--ê, kiat-kio̍k sī siū-khì.

(BCL) 義人所意愛的攏是好；歹人所向望的結局是受氣。

24

(THR) Ū lâng ná the̍h-chhut, chiū ná ke-thiⁿ; Ū lâng kian-līn, chiū hóan-tńg sòng-hiong.

(BCL) 有人愈提出，就愈加添；有人堅吝，就反轉喪鄉。

25

(THR) Ài siá-sì--ê, beh tit-tio̍h hong-sēng; Lūn-te̍k lâng-ê, beh tit-tio̍h lūn-te̍k.

(BCL) 愛捨施的，欲得著豐盛；潤澤人的，欲得著潤澤。

26

(THR) Tún gō͘-kak m̄ thiò--ê, peh-sìⁿ beh chiù-chó͘ i; Kam-gōan thiò-chhut--ê, beh tit-tio̍h chiok-hok.

(BCL) 囤五殼呣糶的，百姓欲咒詛伊；甘願糶出的，欲得著祝福。

27

(THR) Chhut-la̍t chòe hó-ê, beh tit-tio̍h un-hūi; Choan-bū hāi lâng-ê, hāi beh kàu i ê seng-khu.

(BCL) 出力做好的，欲得著恩惠；專務害人的，害欲到伊的身軀。

28

(THR) Óa-khò ka-kī ê chîⁿ-châi--ê, beh po̍ah-tó; Gī-lâng beh heng-ōng, chhin-chhiūⁿ chhiⁿ-chhùi ê chhiū-hio̍h.

(BCL) 倚靠家己的錢財的，欲跋倒；義人欲興旺，親像青翠的樹葉。

29

(THR) Kiáu-jiáu ka-kī ê ke--ê, só͘ chiap-siū--ê sī hong; Gû-gōng ê lâng beh chòe sim-lāi tì-hūi ê lâng ê lô͘-po̍k.

(BCL) 攪擾家己的家的，所接受的是風；愚戇的人欲做心內智慧的人的奴僕。

30

(THR) Gī-lâng só͘ kiat ê ké-chí sī o̍ah-miā ê chhiū; Tì-hūi ê lâng tit-tio̍h lâng ê lêng-hûn.

(BCL) 義人所結的果子是活命的樹；智慧的人，得著人的靈魂。

31

(THR) Khòaⁿ ah, gī-lâng tī sè-kan siū pò-èng; Hô-hòng pháiⁿ-lâng kap ū-chōe ê lâng ah?

(BCL) 看啊，義人佇世間受報應，何況歹人及有罪的人啊？

Bible Color Mark

• 台語漢字羅馬本
• 巴克禮全羅