箴言 第 10 章

1

(THR) Só͘-lô-bûn ê chim-giân. Tì-hūi ê kiáⁿ hō͘ lāu-pē hoaⁿ-hí; Gû-gōng ê kiáⁿ hō͘ lāu-bú iu-būn.

(BCL) 所羅門的箴言：智慧的子互老父歡喜；愚戇的子互老母憂悶。

2

(THR) Put-gī ê chîⁿ lóng bô lī-ek; Chú-ū kong-gī ōe kiù lâng thoat-lī sí-bô.

(BCL) 不義的錢攏無利益；只有公義會救人脫離死無。

3

(THR) Iâ-hô-hoa bô hō͘ gī-lâng tú-tio̍h iau-gō; Pháiⁿ-lâng só͘ him-bō͘-ê, I bô hō͘ i chiâⁿ.

(BCL) 耶和華無互義人抵著枵餓；歹人所欣慕的，伊無互伊成。

4

(THR) Chhiú pîn-tōaⁿ-ê, beh tú-tio̍h sòng-hiong; Chhiú kut-la̍t-ê, beh tit-tio̍h hó-gia̍h.

(BCL) 手貧憚的，欲抵著喪鄉；手骨力的，欲得著好額。

5

(THR) Hē-thiⁿ chek-chū-ê, sī tì-hūi ê kiáⁿ; Siu-koah ê sî ài-khùn--ê, sī sià-pāi ê kiáⁿ.

(BCL) 夏天積聚的，是智慧的子；收割的時愛睏者，是卸敗的子。

6

(THR) Hok-khì lîm-kàu gī-lâng ê thâu-khak; Kiông-pō jia-iám pháiⁿ-lâng ê chhùi.

(BCL) 福氣臨到義人的頭殼；強暴遮掩歹人的嘴。

7

(THR) Gī-lâng ê kì-liām siū o-ló; Pháiⁿ-lâng ê miâ tek-khak chhàu.

(BCL) 義人的紀念受謳咾；歹人的名的確臭。

8

(THR) Sim-lāi tì-hūi-ê, beh thiaⁿ-siū bēng-lēng, Chhùi kóng gōng-ōe-ê, beh sit-pāi.

(BCL) 心內智慧的，欲聽受命令；嘴講戇話的，欲失敗。

9

(THR) Kiâⁿ chèng-tı̍t lō͘--ê, kiâⁿ-ta̍h an-ún; Thàn oan-khiau lō͘--ê, beh lō͘-hiān.

(BCL) 行正直路的，行踏安穩；趁彎曲路的，欲露現。

10

(THR) Nih-ba̍k hōe-ì--ê, hō͘ lâng iu-būn; Chhùi kóng gōng-ōe--ê, beh sit-pāi.

(BCL) 　目會意的，互人憂悶；嘴講戇話的，欲失敗。

11

(THR) Gī-lâng ê chhùi sī o̍ah-miā ê chúi-chôaⁿ; Kiông-pō jia-iám pháiⁿ-lâng ê chhùi.

(BCL) 義人的嘴是活命的水泉；強暴遮掩歹人的嘴。

12

(THR) Òan-hūn ōe jiá-khí saⁿ-chiⁿ; Jîn-ài ōe jia-khàm lóng-chóng ê kè-sit.

(BCL) 怨恨會惹起相爭；仁愛會遮蓋攏總的過失。

13

(THR) Tī bêng-lí ê lâng chhùi-lāi chhē-tio̍h tì-hūi; Bû-ti ê lâng ê ka-chiah ū kóaiⁿ-á piān-piān.

(BCL) 佇明理的人嘴內尋著智慧；無知的人的尻脊有枴仔便便。

14

(THR) Tì-hūi ê lâng chek-chū kiàn-sek; Gōng-lâng ê chhùi beh khòai-khòai sit-pāi.

(BCL) 智慧的人積聚見識；戇人的嘴欲快快失敗。

15

(THR) Hó-gia̍h lâng ê châi-bu̍t sī i kian-kò͘ ê siâⁿ; Sòng-hiong lâng ê khiàm-kheh sī i sit-pāi ê in-toaⁿ.

(BCL) 好額人的財物是伊堅固的城；喪鄉人的欠缺是伊失敗的因端。

16

(THR) Gī-lâng ê tio̍h-bôa tì-kàu o̍ah; Pháiⁿ-lâng só͘ thàn--ê, tì-kàu ū chōe.

(BCL) 義人的著磨致到活；歹人所趁的致到有罪。

17

(THR) Thiaⁿ-siū khòan-kài--ê, sī kiâⁿ tī o̍ah-miā ê lō͘; Khì-sak chek-pī--ê, chiū-sī kiâⁿ bê-lō͘.

(BCL) 聽受勸戒者，是行佇活命的路；棄拺責備者，就是行迷路。

18

(THR) Khǹg-ba̍t i ê òan-hūn--ê, chhùi kóng pe̍h-chha̍t; Húi-pòng lâng--ê, sī gōng-lâng.

(BCL) 囥密伊的怨恨者，嘴講白賊；誹謗人者，是戇人。

19

(THR) Kāu-ōe ê lâng bōe-bián ū kè-sit; Iok-sok chhùi-chı̍h--ê, sī ū tì-hūi.

(BCL) 厚話的人免有過失；約束嘴舌的是有智慧。

20

(THR) Gī-lâng ê chı̍h, chhin-chhiūⁿ bûn-gûn; Pháiⁿ-lâng ê sim bô sím-mı̍h kà-tı̍t.

(BCL) 義人的舌親像紋銀；歹人的心無甚麼價值。

21

(THR) Gī-lâng ê chhùi pôe-ióng chōe-chōe lâng; Gōng-lâng in-ūi bû-ti lâi sí.

(BCL) 義人的嘴培養多多人；戇人因為無知來死。

22

(THR) Iâ-hô-hoa ê sù-hok, hō͘ lâng hó-gia̍h; Iā bô chham iu-būn tī lāi-bīn.

(BCL) 耶和華的賜福互人好額，也無參憂悶佇內面。

23

(THR) Gû-gōng ê lâng lia̍h kiâⁿ-pháiⁿ chòe kún-chhiò; Chóng-sī bêng-lí ê lâng lia̍h tì-hūi chòe hoaⁿ-hí.

(BCL) 愚戇的人掠行歹做滾笑；總是明理的人掠智慧做歡喜。

24

(THR) Pháiⁿ-lâng só͘ kiaⁿ--ê, beh lîm-kàu i; Gī-lâng só͘ ài ê, beh tit-tio̍h ún-chún.

(BCL) 歹人所行的，欲臨到伊；義人所愛的，欲得著允准。

25

(THR) Kông-hong chı̍t-ē kè, pháiⁿ-lâng kui tī bô; Gī-lâng sī éng-óan ê tōe-ki.

(BCL) 狂風一下過，歹人歸佇無；義人是永遠的地基。

26

(THR) Lâng chhe pîn-tōaⁿ ê lâng, Sī chhin-chhiūⁿ chhùi-khí tú-tio̍h chhò͘, ba̍k-chiu tú-tio̍h hé-hun.

(BCL) 人差貧憚的人，是親像嘴齒抵著醋，目睭抵著火薰。

27

(THR) Kèng-ùi Iâ-hô-hoa, chiū ke-thiⁿ jı̍t-chí; Chóng-sī pháiⁿ-lâng ê nî-hè beh kiám-chió.

(BCL) 敬畏耶和華就加添日子；總是歹人的年歲欲減少。

28

(THR) Gī-lâng ê ǹg-bāng sī hoaⁿ-hí; Pháiⁿ-lâng ê him-bō͘ sī khang-khang.

(BCL) 義人的向望是歡喜；歹人的欣慕是空空。

29

(THR) Iâ-hô-hoa ê lō͘ tùi-tī chèng-tı̍t ê lâng chòe ōe-só͘; Tùi-tī kiâⁿ-pháiⁿ ê lâng chòe húi-bia̍t.

(BCL) 耶和華的路對佇正直的人做衛所，對佇行歹的人做毀滅。

30

(THR) Gī-lâng éng-óan bô î-sóa; Pháiⁿ-lâng bōe tit-tio̍h khiā-khí tī tōe-chiūⁿ.

(BCL) 義人永遠無移徙；歹人得著徛起佇地上。

31

(THR) Gī-lâng ê chhùi siⁿ-chhut tì-hūi; Kōai-biū ê chı̍h beh siū koah-tn̄g.

(BCL) 義人的嘴生出智慧；乖謬的舌欲受割斷。

32

(THR) Gī-lâng ê chhùi-tûn chai thang hō͘ lâng hoaⁿ-hí; Pháiⁿ-lâng ê chhùi kóng kōai-biū ê ōe.

(BCL) 義人的嘴唇知通互人歡喜；歹人的嘴講乖謬的話。

Bible Color Mark

• 台語漢字羅馬本
• 巴克禮全羅