路加福音 第 18 章

1

(THR) Iâ-so͘ siat chı̍t ê phì-jū, kà-sī in tio̍h siông-siông kî-tó, m̄-thang ià, kóng,

(BCL) 耶穌設一個譬喻，教示著常常祈禱，

2

(THR) Bó͘ siâⁿ ū chı̍t ê sím-phòaⁿ koaⁿ, bô kiaⁿ Siōng-tè iā bô tùi-tiōng lâng.

(BCL) 呣通厭。講：「某城有一個審判官，無驚上帝，也無對重人。

3

(THR) Tī hit ê siâⁿ-lāi ū chı̍t ê chiú-kóaⁿ lâng ta̍uh-ta̍uh khì kìⁿ i kóng, Ū lâng kap góa chòe tùi-te̍k, kiû lí thòe góa sin-oan.

(BCL) 佇彼個城內有一個守寡人，沓沓去見伊，講：『有人及我做對敵，求你替我伸冤。』

4

(THR) I kú-kú bô beh; āu-lâi siūⁿ kóng, Góa sui-jiân bô kiaⁿ Siōng-tè, bô tùi-tiōng lâng;

(BCL) 伊久久無欲，後來想講：『我雖然無驚上帝，無對重人，

5

(THR) nā-sī in-ūi chit ê chiú-kóaⁿ lâng ta̍uh-ta̍uh lâi kiáu-jiáu, góa beh thòe i sin-oan, bián-tit i éng-éng lâi khó͘-chhó͘ góa.

(BCL) 若是因為此個守寡人沓沓來攪擾，我欲替伊伸冤，免得伊永永來苦楚我！』」

6

(THR) Chú koh kóng, Lín tio̍h thiaⁿ chit ê put-gī ê koaⁿ só͘ kóng ê.

(BCL) 主閣講：「恁著聽此個不義的官所講的。

7

(THR) Hô-hòng Siōng-tè kéng ê peh-sìⁿ mî-jı̍t âu-kiò I, I iā ūi-tio̍h in khoan-iông, kiám bô beh thòe in sin-oan mah?

(BCL) 何況上帝揀的百姓暝日喉叫伊，伊也為著寬容，豈無欲替伸冤嗎？

8

(THR) Góa kā lín kóng, I beh kín-kín thòe in sin-oan. Sui-jiân án-ni, Jîn-chú kàu ê sî, kiám beh tú-tio̍h sè-kan ū sìn mah?

(BCL) 我給恁講，伊欲緊緊替伸冤。雖然按呢，人子到的時，豈欲抵著世間有信嗎？」

9

(THR) Ū óa-khò ka-kī chòe gī lâi khòaⁿ-khin pa̍t lâng ê, Iâ-so͘ siat chı̍t ê phì-jū kā in kóng,

(BCL) 有倚靠家己做義，來看輕別人的，耶穌設一個譬喻給講：

10

(THR) Ū nn̄g lâng chiūⁿ tiān beh kî-tó, chı̍t-ê sī Hoat-lī-sài lâng, chı̍t-ê sī thiu-hiòng ê.

(BCL) 「有二人上殿欲祈禱：一個是法利賽人，一個是抽餉的。

11

(THR) Hoat-lī-sài lâng khiā-teh, ka-kī kî-tó kóng, Siōng-tè ah, góa kám-siā lí, in-ūi góa bô chhin-chhiūⁿ pa̍t lâng, le̍k-sek, put-gī, kan-îm, iā bô chhin-chhiūⁿ chit ê thiu-hiòng ê.

(BCL) 法利賽人徛，家己祈禱講：『上帝啊，我感謝你，因為我無親像別人勒索、不義、姦淫，也無親像此個抽餉的。

12

(THR) Góa chı̍t lé-pài kìm-chia̍h nn̄g pái; koh chiong hōan só͘ tit-tio̍h ê, cha̍p hūn thiu chı̍t hūn.

(BCL) 我一禮拜禁食二擺，閣將凡所得著的十份抽一份。』

13

(THR) Nā-sī hit ê thiu-hiòng ê hn̄g-hn̄g khiā-teh, liân kia̍h ba̍k ǹg thiⁿ iā m̄ káⁿ; kan-ta tûi heng kóng, Siōng-tè ah, lîn-bín góa chit-ê ū chōe ê lâng.

(BCL) 若是彼個抽餉的遠遠徛，連抬目向天也呣敢，干單搥胸講：『上帝啊，憐憫我此個有罪的人！』

14

(THR) Góa kā lín kóng, Chit ê lâng tò-khì i ê chhù tit-tio̍h chheng-chòe-gī iâⁿ-kè hit ê lâng. In-ūi kìⁿ-nā chū-ko ê beh hō͘ i pi-bî; ka-kī pi-bî ê beh ko-seng i.

(BCL) 我給恁講，此個人倒去伊的厝得著稱做義贏過彼個人；因為，見若自高的，欲互伊卑微；家己卑微的，欲高升伊。」

15

(THR) Ū lâng tòa eⁿ-á chiū-kūn Iâ-so͘, beh hō͘ I bong in; Ha̍k-seng khòaⁿ-kìⁿ chiū chek-pī in.

(BCL) 有人帶嬰仔就近耶穌，欲互伊摸；學生看見就責備。

16

(THR) Nā-sī Iâ-so͘ kiò hiah ê eⁿ-á lâi kóng, Iông-ún sòe-kiáⁿ chiū-kūn góa, bo̍h-tit kìm i; in-ūi Siōng-tè ê kok sī chit hō lâng ê.

(BCL) 若是耶穌叫許個嬰仔來，講：「容允細子就近我，莫得禁伊，因為上帝的國是此號人的。

17

(THR) Góa sı̍t-chāi kā lín kóng, Hōan-nā sêng-chiap Siōng-tè ê kok bô chhin-chhiūⁿ sòe-kiáⁿ ê, koat-tòan bōe tit thang jı̍p-khì.

(BCL) 我實在給恁講，凡若承接上帝的國，無親像細子的，決斷得通入去。」

18

(THR) Ū chı̍t ê chòe-koaⁿ ê mn̄g I kóng, Hó ê sian-siⁿ ah, góa tio̍h cháiⁿ-iūⁿ chòe, chiah thang sêng-chiap éng-o̍ah?

(BCL) 有一個做官的問伊講：「好的先生啊，我著怎樣做才通承接永活？」

19

(THR) Iâ-so͘ kā i kóng, Lí siáⁿ-sū chheng-ho͘ góa sī hó ah? Bô chı̍t-ê hó, to̍k-to̍k Siōng-tè nā-tiāⁿ.

(BCL) 耶穌給伊講：「你啥事稱呼我是好啊？無一個好，獨獨上帝若定。

20

(THR) Chiah ê kài lí í-keng chai, Bo̍h-tit kan-îm, Bo̍h-tit thâi-sí lâng, Bo̍h-tit thau-the̍h, Bo̍h-tit lām-sám chòe kan-chèng, Tio̍h kèng lí ê pē-bú.

(BCL) 諸個誡你已經知：『莫得姦淫；莫得死人；莫得偷提；莫得濫糝做干證；著敬你的父母。』」

21

(THR) I chiū kóng, Chiah-ê góa tùi sòe-hàn lóng siú i lah.

(BCL) 伊就講：「諸個我對細漢攏守伊啦。」

22

(THR) Iâ-so͘ thiaⁿ-kìⁿ chiū kā i kóng, Lí iáu khiàm chı̍t hāng, tio̍h bōe lí it-chhè só͘ ū ê lâi hō͘ sòng-hiong lâng, chiū beh ū châi-pó tī thiⁿ-nı̍h; koh lâi tè góa.

(BCL) 耶穌聽見，就給伊講：「你猶欠一項；著賣你一切所有的，來互喪鄉人，就欲有財寶佇天裡；閣來隨我。」

23

(THR) Hit lâng thiaⁿ-kìⁿ chiah ê ōe chin iu-būn, in-ūi i chin hó-gia̍h.

(BCL) 彼人聽見諸個話，真憂悶，因為伊真好額。

24

(THR) Iâ-so͘ khòaⁿ-kìⁿ i chiū kóng, Pù lâng jı̍p Siōng-tè ê kok oh--ah.

(BCL) 耶穌看見伊，就講：「富人入上帝的國啊！

25

(THR) In-ūi lo̍k-tô chhng-kè chiam-phīⁿ, pí pù lâng jı̍p Siōng-tè ê kok, iáu khah khòai.

(BCL) 因為駱駝穿過針鼻比富人入上帝的國猶卡快！」

26

(THR) Thiaⁿ-kìⁿ ê lâng kóng, Án-ni, chī-chūi ōe tit-tio̍h kiù ah?

(BCL) 聽見的人講：「按呢，是誰會得著救啊？」

27

(THR) Iâ-so͘ kóng, Chāi lâng só͘ bōe-ōe ê, chāi Siōng-tè sī ōe.

(BCL) 耶穌講：「在人所會的，在上帝是會。」

28

(THR) Pí-tek kóng, Góan í-keng pàng-sak ka-kī só͘ ū ê lâi tè lí.

(BCL) 彼得講：「阮已經放拺家己所有的來隨你。」

29

(THR) Iâ-so͘ kā in kóng, Góa sı̍t-chāi kā lín kóng, Bô ū lâng ūi-tio̍h Siōng-tè ê kok lâi pàng-sak chhù-the̍h, á-sī bó͘, á-sī hiaⁿ-tī, á-sī pē-bú, á-sī kiáⁿ-jî,

(BCL) 耶穌給講：「我實在給恁講，無有人為著上帝的國來放拺厝宅，抑是某，抑是兄弟，抑是父母，抑是子兒，

30

(THR) iā bô tī chit-sì tit-tio̍h kúi-nā pē khah chōe, lâi-sè tit-tio̍h éng-o̍ah.

(BCL) 也無佇此世得著幾若倍卡多，來世得著永活。」

31

(THR) Iâ-so͘ tòa cha̍p-jī ê ha̍k-seng, tùi in kóng, Lí khòaⁿ, lán chiah-ê chiūⁿ Iâ-lō͘-sat-léng, kìⁿ-nā tùi sian-ti só͘ kì ê lóng beh èng-giām tī Jîn-chú.

(BCL) 耶穌帶十二個學生，對講：「你看，咱諸個上耶路撒冷，見若對先知所記的攏欲應驗佇人子。

32

(THR) In-ūi I beh siū ké-sàng hō͘ īⁿ-pang lâng, koh siū hì-lāng lêng-jio̍k phùi-nōa;

(BCL) 因為伊欲受解送互異邦人；閣受戲弄，凌辱，呸涎，

33

(THR) in beh piⁿ-phah lâi hāi-sí I; tē saⁿ jı̍t I beh koh-o̍ah.

(BCL) 欲鞭拍，來害死伊；第三日伊欲復活。」

34

(THR) Hiah ê tāi-chì ha̍k-seng bô chı̍t hāng ōe hiáu-tit; koh chit ê ōe tùi tī in sī ún-ba̍t, in iā m̄ chai I só͘ kóng ê.

(BCL) 許個代誌學生無一項會曉得，閣此個話對佇是隱密；也呣知伊所講的。

35

(THR) Kūn Iâ-l?-ko ê sî, ū chı̍t ê chhiⁿ-mî ê chē tī lō͘-piⁿ teh khit-chia̍h;

(BCL) 近耶利哥的時，有一個睛暝的坐佇路邊乞食。

36

(THR) thiaⁿ-kìⁿ chōe-chōe lâng keng-kè, chiū mn̄g sī sím-mı̍h tāi-chì.

(BCL) 聽見多多人經過，就問是甚麼代誌。

37

(THR) Lâng kā i kóng, Ná-sat-le̍k Iâ-so͘ tùi chia kè.

(BCL) 人給伊講，拿撒勒耶穌對遮過。

38

(THR) I chiū âu-kiò kóng, Tāi-pı̍t ê hō͘-è, Iâ-so͘, khó-lîn góa.

(BCL) 伊就喉叫講：「大衛的後裔耶穌，可憐我！」

39

(THR) Thâu-chêng kiâⁿ ê lâng chek-pī i, kah i tio̍h chēng-chēng; nā-sī i it-hoat tōa siaⁿ âu-kiò kóng, Tāi-pı̍t ê hō͘-è ah, khó-lîn góa.

(BCL) 頭前行的人責備伊，教伊著靜靜；若是伊益發大聲喉叫講：「大衛的後裔啊，可憐我！」

40

(THR) Iâ-so͘ thêng-kha, kah lâng khan i lâi; í-keng kūn-óa, chiū mn̄g i kóng,

(BCL) 耶穌停腳，教人牽伊來，已經近倚，就問伊講：

41

(THR) Ài góa kā lí chòe sím-mı̍h? I chiū kóng, Chú ah, góa ài tit-tio̍h khòaⁿ-kìⁿ.

(BCL) 「愛我給你做甚麼？」伊就講：「主啊，我愛得著看見，」

42

(THR) Iâ-so͘ kā i kóng, Lí thang tit-tio̍h khòaⁿ-kìⁿ, lí ê sìn ū kiù lí lah.

(BCL) 耶穌給伊講：「你通得著看見！你的信有救你啦。」

43

(THR) I liâm-piⁿ tit-tio̍h khòaⁿ-kìⁿ, chiū tè Iâ-so͘ kui êng-kng Siōng-tè; chèng lâng khòaⁿ-kìⁿ iā lóng kui êng-kng Siōng-tè.

(BCL) 伊連鞭得著看見，就隨耶穌，歸榮光上帝。眾人看見也攏歸榮光上帝。

Bible Color Mark

• 台語漢字羅馬本
• 巴克禮全羅