路加福音 第 17 章

1

(THR) Iâ-so͘ koh tùi I ê ha̍k-seng kóng, That-gāi lâng ê sū bōe bián-tit ū; chóng-sī khòaⁿ tùi chī-chūi lâi, hit lâng ū chai-ē!

(BCL) 耶穌閣對伊的學生講：「塞礙人的事免得有；總是看對是誰來，彼人有災禍！

2

(THR) Siat-sú hō͘ chiah ê bî-sòe ê chı̍t-ê siū that-gāi, khah hó hō͘ lâng ēng tōa chio̍h-bō tiàu i ê ām-kún, kā i hiat-lo̍h hái.

(BCL) 設使互諸個微細的一個受塞礙，卡好互人用大石磨吊伊的頷頸，給伊落海。

3

(THR) Lín tio̍h ka-kī kín-sīn; nā lín ê hiaⁿ-tī hōan-chōe, tio̍h chek-pī i; i nā hóan-hóe, tio̍h sià-bián i.

(BCL) 恁著家己謹慎！若恁的兄弟犯罪，著責備伊；伊若反悔，著赦免伊。

4

(THR) Nā-sī i chı̍t jı̍t tek-chōe lí chhit pái, iā chhit pái o̍at-tńg kā lí kóng, Góa hóan-hóe lah, lí chiū tio̍h sià-bián i.

(BCL) 若是伊一日得罪你七擺，也七擺越轉給你，講：『我反悔啦』，你就著赦免伊。」

5

(THR) Sù-tô͘ kā Chú kóng, Ke-thiⁿ góan ê sìn.

(BCL) 使徒給主講：「加添阮的信。」

6

(THR) Chú kóng, Lín nā ū sìn chhin-chhiūⁿ chı̍t lia̍p ê kòa-chhài chí, chiū bēng-lēng chit châng sng-châi chhiū kóng, Pu̍ih lí ê kun khì chai tī hái-nı̍h, i iā beh sūn-thàn lí.

(BCL) 主講：「恁若有信親像一粒的芥菜子，就命令此欉桑材樹講：『拔你的根，去栽佇海裡』，伊也欲順趁你。

7

(THR) Lín tiong-kan sím-mı̍h lâng ū lô͘-po̍k teh choh-hn̂g á-sī kò͘-iûⁿ, tùi hn̂g-nı̍h tò-lâi, kiám beh kā i kóng, Chek-sî chē lâi chia̍h mah?

(BCL) 恁中間甚麼人有奴僕作園抑是顧羊，對園裡倒來，豈欲給伊講：『即時坐來食』嗎？

8

(THR) Kiám bô beh kā i kóng, Pī-pān hō͘ góa chia̍h, hâ tòa lâi ho̍k-sāi góa; thèng-hāu góa lim-chia̍h soah, lí chiah thang lim-chia̍h mah?

(BCL) 豈無欲給伊講：『備辦互我食，縖帶來服事我，聽候我飲食息，你才通飲食』嗎？

9

(THR) Lô͘-po̍k kiâⁿ só͘ bēng-lēng ê, kiám ū kā i seh-siā mah?

(BCL) 奴僕行所命令的，豈有給伊說謝嗎？

10

(THR) Án-ni, lín í-keng it-chīn kiâⁿ só͘ bēng-lēng lín ê, chiū tio̍h kóng, Góan sī bô lī-ek ê lô͘-po̍k, kiâⁿ só͘ eng-kai kiâⁿ ê nā-tiāⁿ.

(BCL) 按呢，恁已經一盡行所命令恁的，就著講：『阮是無利益的奴僕，行所應該行的若定。』」

11

(THR) Iâ-so͘ khì Iâ-lō͘-sat-léng ê sî, tùi Sat-má-lī-a kap Ka-lī-lī kau-kài keng-kè.

(BCL) 耶穌去耶路撒冷的時，對撒瑪利亞及加利利交界經過。

12

(THR) Jı̍p chı̍t ê hiuⁿ-siā ê sî, ū cha̍p ê thái-ko ê tú-tio̍h I, hn̄g-hn̄g teh khiā,

(BCL) 入一個鄉社的時，有十個癩的，抵著伊，遠遠徛，

13

(THR) chhut siaⁿ kóng, Iâ-so͘ sian-siⁿ, lîn-bín góan.

(BCL) 出聲講：「耶穌，先生，憐憫阮！」

14

(THR) Iâ-so͘ khòaⁿ-kìⁿ, kā in kóng, Lín khì chiong pún-sin hō͘ chè-si giām. In khì ê sî chiū tit-tio̍h chheng-khì.

(BCL) 耶穌看見，給講：「恁去將本身互祭司驗。」去的時就得著清氣。

15

(THR) Kî-tiong chı̍t lâng khòaⁿ-kìⁿ ka-kī í-keng hó, chiū tò-tńg-lâi tōa siaⁿ o-ló Siōng-tè,

(BCL) 其中一人看見家己已經好，就倒轉來大聲謳咾上帝，

16

(THR) phak-lo̍h tī Iâ-so͘ ê kha-chêng, lâi kám-siā I; chit lâng sī Sat-má-lī-a lâng.

(BCL) 仆落佇耶穌的腳前來感謝伊；此人是撒瑪利亞人。

17

(THR) Iâ-so͘ ìn kóng, Cha̍p lâng kiám bô lóng tit-tio̍h chheng-khì mah? hit káu-ê tī tá-lo̍h?

(BCL) 耶穌應講：「十人豈無攏得著清氣嗎？彼九個佇叨落？

18

(THR) Chit-ê pa̍t cho̍k ê lâng í-gōa, iáu bô pa̍t lâng tò-tńg-lâi kui êng-kng Siōng-tè mah?

(BCL) 此個別族的人以外，猶無別人倒轉來歸榮光上帝嗎？」

19

(THR) Chiū kā hit lâng kóng, Khí-lâi chòe lí khì, lí ê sìn ū kiù lí.

(BCL) 就給彼人講：「起來，做你去！你的信有救你。」

20

(THR) Hoat-lī-sài lâng mn̄g Siōng-tè ê kok tī-sî ōe lîm-kàu. Iâ-so͘ ìn kóng, Siōng-tè ê kok lîm-kàu m̄ sī hián-jiân;

(BCL) 法利賽人問：「上帝的國底時會臨到？」耶穌應講：「上帝的國臨到呣是顯然。

21

(THR) iā bōe kóng-tit, Tī chia, á-sī, Tī hia, in-ūi Siōng-tè ê kok sī tī lín lāi-tiong.

(BCL) 也講得：『佇遮！抑是佇遐！』因為上帝的國是佇恁內中。」

22

(THR) Koh tùi ha̍k-seng kóng, Sî-jı̍t beh kàu, lín chin ài khòaⁿ-kìⁿ Jîn-chú ê chı̍t jı̍t, iā bô thang khòaⁿ-kìⁿ.

(BCL) 閣對學生講：「時日欲到，恁真愛看見人子的一日，也無通看見。

23

(THR) Beh ū lâng kā lín kóng, Lí khòaⁿ, tī hia! Lí khòaⁿ, tī chia! lín bo̍h-tit khì, bo̍h-tit tè in.

(BCL) 欲有人給恁講：你看，佇遐！你看，佇遮！恁莫得去，莫得隨！

24

(THR) In-ūi chhin-chhiūⁿ sih-nà tùi thiⁿ chit piⁿ teh sih, kng chiò kàu thiⁿ hit piⁿ, Jîn-chú tī I ê jı̍t iā beh án-ni.

(BCL) 因為親像閃爁對天此邊閃，光照到天彼邊，人子佇伊的日也欲按呢。

25

(THR) Chóng-sī I tek-khak tio̍h tāi-seng siū chōe-chōe kan-khó͘, iā hō͘ chit sè-tāi khì-sak.

(BCL) 總是伊的確著代先受多多艱苦，也互此世代棄拺。

26

(THR) Chhin-chhiūⁿ tī Ná-a ê jı̍t cháiⁿ-iūⁿ, tī Jîn-chú ê jı̍t iā beh án-ni.

(BCL) 親像佇挪亞的日怎樣，佇人子的日也欲按呢。

27

(THR) In teh lim-chia̍h, teh kè-chhōa, kàu Ná-a jı̍p tōa chûn ê jı̍t, tōa chúi kàu, bia̍t in chèng lâng.

(BCL) 飲食嫁娶，到挪亞入大船的日，大水到滅眾人。

28

(THR) Koh chhin-chhiūⁿ tī Lô-tek ê jı̍t, in teh lim-chia̍h, bóe-bōe, chèng-choh, khí-chhù;

(BCL) 閣親像佇羅得的日；飲食，買賣，種作，起厝。

29

(THR) nā-sī Lô-tek chhut Só͘-to-má ê jı̍t, tùi thiⁿ lo̍h hé kap jiû-n̂g, bia̍t chèng lâng;

(BCL) 若是羅得出所多瑪的日，對天落火及硫磺，滅眾人。

30

(THR) tī Jîn-chú hián-hiān ê jı̍t iā beh án-ni.

(BCL) 佇人子顯現的日也欲按呢。

31

(THR) Tng hit jı̍t tī chhù-téng ê, i ê mı̍h tī chhù-lāi, bo̍h-tit lo̍h-lâi the̍h i; tī hn̂g-nı̍h ê iā bo̍h-tit tò-tńg-lâi.

(BCL) 當彼日，佇厝頂的，伊的物佇厝內，莫得落來提伊；佇園裡的，也莫得倒轉來。

32

(THR) Tio̍h kì-tit Lô-tek ê bó͘.

(BCL) 著記得羅得的某。

33

(THR) Kìⁿ-nā tì-ì kò͘ i ê sìⁿ-miā ê, beh sit-lo̍h i; kìⁿ-nā sit-lo̍h i ê, beh pó-chôan i.

(BCL) 見若致意顧伊的生命的，欲失落伊；見若失落伊的，欲保全伊。

34

(THR) Góa kā lín kóng, Hit mî nn̄g lâng siāng chhn̂g, chı̍t-ê chhú-khì, chı̍t-ê pàng-khì.

(BCL) 我給恁講，彼暝二人像床，一個取去，一個放去。

35

(THR) Nn̄g ê hū-jîn-lâng tâng oe bō, chı̍t-ê chhú-khì, chı̍t-ê pàng-khì.

(BCL) 二個婦仁人同挨磨，一個取去，一個放去。」

36

(THR)

(BCL) ｛有二人佇園裡，一個取去，一個放　。〔台語羅馬譯本無此節！〕｝

37

(THR) In ìn I kóng, Chú ah, tī sím-mı̍h só͘-chāi ah? I kā in kóng, Sin-si nā tī hia, eng-chiáu iā beh chū-chı̍p tī hia.

(BCL) 應伊講：「主啊，佇甚麼所在啊？」伊給講：「身屍若佇遐，鷹鳥也欲聚集佇遐。」

Bible Color Mark

• 台語漢字羅馬本
• 巴克禮全羅