路加福音 第 19 章

1

(THR) Iâ-so͘ jı̍p Iâ-lī-ko, teh kè-khì ê sî,

(BCL) 耶穌入耶利哥，過去的時，

2

(THR) ū chı̍t lâng miâ kiò Sat-kai, sī chòe thiu-hiòng ê thâu-lâng, iā sī hó-gia̍h.

(BCL) 有一人名叫撒該，是做抽餉的頭人，也是好額。

3

(THR) I ài beh khòaⁿ Iâ-so͘ sī sím-mı̍h lâng, nā-sī lâng chōe, khòaⁿ bōe tio̍h, in-ūi i seng-khu óe-sòe.

(BCL) 伊愛欲看耶穌是甚麼人；若是人多，看著，因為伊身軀矮細，

4

(THR) Chiū cháu chòe chêng, peh-chiūⁿ sng-châi chhiū, beh khòaⁿ I; in-ūi Iâ-so͘ beh tùi hia kè.

(BCL) 就走做前，絔上桑材樹，欲看伊，因為耶穌欲對遐過。

5

(THR) Iâ-so͘ kàu hit ūi, kia̍h thâu khòaⁿ i kóng, Sat-kai kín-kín lo̍h-lâi, in-ūi kin-á-jı̍t góa tek-khak tio̍h tiàm lí ê ke.

(BCL) 耶穌到彼位，抬頭看伊，講：「撒該，緊緊落來！因為今仔日我的確著你的家。」

6

(THR) Chiū kín-kín lo̍h-lâi, hoaⁿ-hí chiap-la̍p I.

(BCL) 就緊緊落來，歡喜接納伊。

7

(THR) Chèng lâng khòaⁿ-kìⁿ, nga̍uh-nga̍uh-liām kóng, I jı̍p khì hioh tī pháiⁿ lâng ê chhù.

(BCL) 眾人看見，耦耦唸講：「伊入去歇佇歹人的厝。」

8

(THR) Sat-kai khiā-teh, tùi Chú kóng, Chú ah, góa chiong só͘ ū ê chı̍t pòaⁿ hō͘ sòng-hiong lâng; nā sī bat oaiⁿ sím-mı̍h lâng, chiū chiong sì-pē pê i.

(BCL) 撒該徛對主講：「主啊，我將所有的一半互喪鄉人；若是曾彎甚麼人，就將四倍賠伊。」

9

(THR) Iâ-so͘ tùi i kóng, Kin-á-jı̍t chín-kiù kàu tī chit ê ke; ūi-tio̍h i iā sī A-pek-la̍h-hán ê kiáⁿ-sun.

(BCL) 耶穌對伊講：「今仔日拯救到佇此個家，為著伊也是亞伯拉罕的子孫。

10

(THR) In-ūi Jîn-chú kàu, sī beh chhē sit-lo̍h ê, lâi kiù i.

(BCL) 因為人子到，是欲尋失落的，來救伊。」

11

(THR) In thiaⁿ-kìⁿ chiah ê ōe ê sî, Iâ-so͘ koh siat chı̍t ê phì-jū, sī in-ūi I í-keng kūn Iâ-lō͘-sat-léng, in iā phah-sǹg Siōng-tè ê kok beh liâm-piⁿ hián-bêng.

(BCL) 聽見諸個話的時，耶穌閣設一個譬喻，是因為伊已經近耶路撒冷，也拍算上帝的國欲連鞭顯明，

12

(THR) I chiū kóng, Ū chı̍t ê chun-kùi ê lâng khì hn̄g-hn̄g ê só͘-chāi beh siū hong lâi tit-tio̍h kok, chiah tò-tńg lâi.

(BCL) 伊就講：「有一個尊貴的人去遠遠的所在，欲受封來得著國才倒轉來，

13

(THR) Chiū kiò i cha̍p ê lô͘-po̍k, ēng gûn cha̍p kun hō͘ in, tùi in kóng, Khì chòe seng-lí kàu góa tò-lâi.

(BCL) 就叫伊十個奴僕，用銀十斤互，對講：『去做生理，到我倒來。』

14

(THR) Chóng-sī i pún-kok ê peh-sìⁿ òan-hūn i, chhe sù-chiá tè-āu khì kóng, Góan m̄ ài chit lâng chòe góan ê ông.

(BCL) 總是伊本國的百姓怨恨伊，差使者隨後去，講：『阮呣愛此人做阮的王。』

15

(THR) I tit-tio̍h kok tò-tńg lâi, chiū hoan-hù kiò hiah ê tùi i niá gûn ê lô͘-po̍k lâi, ài beh chai in chòe seng-lí só͘ thàn ê.

(BCL) 伊得著國倒轉來，就吩咐叫許個對伊領銀的奴僕來，愛欲知做生理所趁的。

16

(THR) Thâu-chı̍t-ê lâi i ê bīn-chêng kóng, Chú ah, lí chı̍t kun ê gûn í-keng thàn cha̍p kun lah.

(BCL) 頭一個來伊的面前，講：『主啊，你一斤的銀已經趁十斤啦。』

17

(THR) I kā i kóng, Hó ah, hó ê lô͘-po̍k, in-ūi lí tī chì sió-khóa ê sū í-keng chīn-tiong, taⁿ hō͘ lí kóan cha̍p ê siâⁿ.

(BCL) 伊給伊講：『好啊！好的奴僕，因為你佇至小可的事已經盡忠，今互你管十個城。』

18

(THR) Hit ê tē jī ê lâi kóng, Chú ah, lí chı̍t kun ê gûn í-keng tit-tio̍h gō͘ kun lah.

(BCL) 彼個第二個來，講：『主啊，你一斤的銀已經得著五斤啦。』

19

(THR) I iā kā i kóng, Hō͘ lí iā kóan gō͘ ê siâⁿ.

(BCL) 伊也給伊講：『互你也管五個城。』

20

(THR) Koh chı̍t ê lâi kóng, Chú ah, lí khòaⁿ, lí chı̍t kun ê gûn tī chia, góa ēng chhiú-kun pau khǹg-teh;

(BCL) 閣一個來講：『主啊，你看，你一斤的銀佇遮，我用手巾包囥。

21

(THR) in-ūi góa kiaⁿ lí, lí sī giâm-ha̍t ê lâng, the̍h só͘ bô hē ê, koah só͘ bô iā ê.

(BCL) 因為我驚你，你是嚴愒的人；提所無下的，割所無撒的。』

22

(THR) I kā i kóng, Pháiⁿ ê lô͘-po̍k ah, chiū lí só͘ kóng ê góa beh gí-tòan lí. Lí kì-jiân chai góa sī giâm-ha̍t ê lâng, the̍h só͘ bô hē ê, koah só͘ bô iā ê;

(BCL) 伊給伊講：『歹的奴僕啊，就你所講的我欲擬斷你。你既然知我是嚴愒的人，提所無下的，割所無撒的，

23

(THR) siáⁿ-sū m̄ chiong góa ê gûn khì lok tī chîⁿ-tiàm, kàu góa lâi ê sî, thang liân hit ê lī-sek sòa the̍h?

(BCL) 啥事呣將我的銀去橐佇錢店，到我來的時，通連彼個利息續提。』

24

(THR) Chiū kā piⁿ-á khiā ê lâng kóng, Chiong i chı̍t kun ê gûn kā i the̍h-lâi, hō͘ hit ê ū cha̍p kun ê.

(BCL) 就給邊仔徛的人講：『將伊一斤的銀給伊提來，互彼個有十斤的。』

25

(THR) In kā i kóng, Chú ah, i ū cha̍p kun lah.

(BCL) 給伊講：『主啊，伊有十斤啦。』

26

(THR) Góa kā lín kóng, Kìⁿ-nā ū-ê beh hō͘ i; bô-ê, liân i só͘ ū ê iā beh kā i the̍h-khì.

(BCL) 『我給恁講，見若有的，欲互伊；無的，連伊所有的也欲給伊提去。

27

(THR) Nā-sī góa hiah ê tùi-te̍k, m̄ ài góa chòe in ê ông ê, tio̍h thoa in lâi, tī góa ê bīn-chêng thâi-sí in.

(BCL) 若是我許個對敵，呣愛我做的王的，著拖來，佇我的面前死！』」

28

(THR) Iâ-so͘ kóng soah, chìn-chêng kiâⁿ, chiūⁿ Iâ-lō͘-sat-léng.

(BCL) 耶穌講息，進前行，上耶路撒冷。

29

(THR) Kiâⁿ kūn Pek-hoat-kî kap Pek-tāi-nî, tī hit-ê miâ kiò Kaⁿ-ná ê soaⁿ, chiū chhe nn̄g ê ha̍k-seng, kóng,

(BCL) 行近伯法其及伯大尼，佇彼個名叫橄欖的山，就差二個學生，講：

30

(THR) Lín khì tùi-bīn ê hiuⁿ-siā, jı̍p-khì ê sî beh tú-tio̍h chı̍t chiah lû-á pa̍k tī hia, iáu-bē bat ū lâng khiâ ê, tháu-khui kā i khan lâi.

(BCL) 「恁去對面的鄉社，入去的時，欲抵著一隻驢仔縛佇遐，猶未曾有人騎的，解開給伊牽來。

31

(THR) Nā ū lâng mn̄g lín, Tháu lû beh siáⁿ-sū? lín tio̍h kóng, Chú khiàm-ēng i.

(BCL) 若有人問恁解驢欲啥事？恁著講：『主欠用伊。』」

32

(THR) Só͘ chhe ê lâng khì, kó-jiân tú-tio̍h chiàu I só͘ kā in kóng ê.

(BCL) 所差的人去，果然抵著照伊所給講的。

33

(THR) Tháu lû-á ê sî, chú-lâng tùi in kóng, Tháu lû-á beh siáⁿ-sū?

(BCL) 解驢仔的時，主人對講：「解驢仔欲啥事？」

34

(THR) In kóng, Chú khiàm-ēng i.

(BCL) 講：「主欠用伊。」

35

(THR) Chiū khan i chiū-kūn Iâ-so͘; chiong in ê saⁿ pho̍ah tī lû-á téng, hû Iâ-so͘ khiâ i.

(BCL) 就牽伊就近耶穌，將的衫披佇驢仔頂，扶耶穌騎伊。

36

(THR) I kiâⁿ ê sî, lâng ēng in ê saⁿ pho͘ tī lō͘-nı̍h.

(BCL) 伊行的時，人用的衫舖佇路裡。

37

(THR) Í-keng kūn, beh lo̍h Kaⁿ-ná soaⁿ, kui tīn ê ha̍k-seng chiū hoaⁿ-hí, tōa siaⁿ o-ló Siōng-tè, ūi-tio̍h só͘ khòaⁿ-kìⁿ lóng-chóng ê kôan-lêng;

(BCL) 已經近，欲落橄欖山，歸陣的學生就歡喜，大聲謳咾上帝，為著所看見攏總的權能，

38

(THR) kóng, Tī Chú ê miâ lâi ê ông, eng-kai tit-tio̍h o-ló, tī thiⁿ-nı̍h hô-pêng, tī chì-kôaiⁿ ê ūi êng-kng.

(BCL) 講：佇主的名來的王應該得著謳咾！佇天裡和平；佇至高的位榮光。

39

(THR) Chèng lâng tiong ū kúi-nā ê Hoat-lī-sài lâng tùi I kóng, Sian-siⁿ ah, tio̍h chek-pī lí ê ha̍k-seng.

(BCL) 眾人中有幾若個法利賽人對伊講：「先生啊，著責備你的學生！」

40

(THR) I ìn kóng, Góa kā lín kóng, in nā chēng-chēng, hiah ê chio̍h-thâu beh âu-kiò.

(BCL) 伊應講：「我給恁講，若靜靜，許個石頭欲喉叫。」

41

(THR) Í-keng kūn, khòaⁿ-kìⁿ siâⁿ chiū ūi-tio̍h i thî-khàu, kóng,

(BCL) 已經近，看見城，就為著伊啼哭，

42

(THR) Siat-sú lí tī chit jı̍t nā chai koan-hē pêng-an ê sū! chóng-sī taⁿ tùi lí ê ba̍k-chiu ún-ba̍t.

(BCL) 講：「設使你佇此日若知關係平安的事；總是今對你的目睭隱密。

43

(THR) In-ūi sî-jı̍t beh kàu, lí ê tùi-te̍k beh chiu-ûi khí thô͘-siâⁿ lâi ûi lí, sì-bīn khùn-khó͘ lí;

(BCL) 因為時日欲到，你的對敵欲周圍起土城，來圍你，四面困苦你，

44

(THR) koh beh hō͘ lí kap lí lāi-tiong ê kiáⁿ-jî lóng tó tōe; bô lâu nn̄g tè chio̍h saⁿ-tha̍h; in-ūi lí m̄ chai kòan-kò͘ lí ê jı̍t.

(BCL) 閣欲互你及你內中的子兒攏倒地，無留二塊石相褡，因為你呣知眷顧你的日。」

45

(THR) Í-keng jı̍p tiān-tn̂g, chiū kóaⁿ-chhut hiah ê bōe mı̍h ê;

(BCL) 已經入殿堂，就趕出許個賣物的，

46

(THR) kā in kóng, Ū kì-chài kóng, Góa ê chhù beh chòe kî-tó ê chhù, nā-sī lín hō͘ i chòe chha̍t-siū.

(BCL) 給講：「有記載講：我的厝欲做祈禱的厝，若是恁互伊做賊巢。」

47

(THR) Iâ-so͘ jı̍t-jı̍t tī tiān-nı̍h kà-sī lâng. Chiah ê chè-si-thâu keng-ha̍k-sū í-kı̍p peh-sìⁿ ê sī-tōa kè-bô͘ beh bia̍t I;

(BCL) 耶穌日日佇殿裡教示人。諸個祭司頭經學士以及百姓的序大計謀欲滅伊，

48

(THR) chóng-sī chhē bô pō͘, in-ūi peh-sìⁿ lóng tì-ì thiaⁿ I.

(BCL) 總是尋無步，因為百姓攏致意聽伊。

Bible Color Mark

• 台語漢字羅馬本
• 巴克禮全羅