以賽亞書 第 42 章

1

(THR) Khòaⁿ ah, Góa ê lô͘-po̍k, Góa só͘ hû-chhî ê, Góa só͘ kéng-sóan ê, Góa ê sim só͘ hoaⁿ-hí--ê, Góa ū chiong Góa ê sîn hō͘ i, i beh chiong kong-lí thôan hō͘ gōa-pang.

(BCL) 看啊，我的奴僕──我所扶持的，我所揀選的、我的心所歡喜者！我有將我的神互伊；伊欲將公理傳互外邦。

2

(THR) I bô soan-hoa, bô chhut-siaⁿ, ia̍h bô hō͘ koe-lō͘--nih thiaⁿ-kìⁿ i ê siaⁿ.

(BCL) 伊無喧嘩，無出聲，亦無互街路裡聽見伊的聲。

3

(THR) Siū-siong ê lô͘-úi, i bô at-chı̍h, beh hoa ê teng-hé, i bô phah-sit; i chiàu chin-sı̍t, chiong kong-lí thôan-pò͘.

(BCL) 受傷的蘆葦，伊無遏折；欲熄的燈火，伊無拍熄。伊照真實將公理傳報。

4

(THR) I bô chhìn-sim, ia̍h bô sit-táⁿ, tı̍t-kàu i tī tōe-chiūⁿ siat-lı̍p kong-lí; hái-sū lóng thèng-hāu i ê kà-sī.

(BCL) 伊無凊心，亦無失膽，致到伊佇地上設立公理；海嶼攏聽候伊的教示。

5

(THR) Iâ-hô-hoa Siōng-tè, chhòng-chō chiah ê thiⁿ lâi thí-khui i, khui-khoah tōe kap i só͘-chhut--ê, ēng o̍ah-khì hō͘ tōe-chiūⁿ ê chèng peh-sìⁿ, ēng sîn-hûn hō͘ kiâⁿ tī hit téng-bīn ê lâng ê, kóng,

(BCL) 耶和華上帝，創造諸個天來展開伊，開闊地及伊所出的，用活氣互地上的眾百姓，用神魂互行佇彼頂面的人的，講：

6

(THR) Góa Iâ-hô-hoa ēng kong-gī tiàu--lí, beh khan lí ê chhiú, pó-siú lí, hō͘ lí chòe peh-sìⁿ ê iok ê tiong-pó, chòe gōa-pang lâng ê kng;

(BCL) 我──耶和華用公義召你，欲牽你的手，保守你，互你做百姓的約的中保，做外邦人的光，

7

(THR) lâi khui chhiⁿ-mî ê ba̍k-chiu, chhōa siū-koaiⁿ--ê chhut-kaⁿ; hō͘ tiàm tī o͘-àm--ê chhut kaⁿ-lô.

(BCL) 來開睛暝的目睭，導受關者出監，互踮佇黑暗者出監牢。

8

(THR) Góa sī Iâ-hô-hoa, che sī Góa ê miâ, Góa bô chiong Góa ê êng-kng kui hō͘ pa̍t ê sîn, ia̍h bô chiong Góa ê miâ-siaⁿ kui-hō͘ tiau-khek ê ngó͘-siōng.

(BCL) 我是耶和華，這是我的名；我無將我的榮光歸互別個神，亦無將我的名聲歸互雕刻的偶像。

9

(THR) Khòaⁿ ah, chêng ê sū í-keng chiâⁿ, taⁿ Góa ia̍h beh chiong sin ê sū kóng-bêng; chiah ê sū bē hoat-khí í-chêng, Góa chiū kóng hō͘ lín thiaⁿ.

(BCL) 看啊，前的事已經成，今我亦欲將新的事講明，諸個事未發起以前，我就講互恁聽。

10

(THR) Kè-hái-ê, kap hái-lāi só͘-ū--ê, hái-sū kap kî-tiong khiā-khí ê peh-sìⁿ, lóng tio̍h ǹg Iâ-hô-hoa chhiùⁿ sin ê koa, tùi tōe-ke̍k o-ló I.

(BCL) 過海的及海內所有的，海嶼及其中徛起的百姓，攏著向耶和華唱新的歌，對地極謳咾伊。

11

(THR) Khòng-iá kap kî-tiong ê siâⁿ, kap Ki-ta̍t lâng khiā-khí ê hiuⁿ-siā, lóng tio̍h chhut-siaⁿ; Se-la̍h khiā-khí ê peh-sìⁿ tio̍h chhiùⁿ-koa, tī soaⁿ-téng--ê tio̍h chhut tōa-siaⁿ.

(BCL) 曠野及其中的城，及基達人徛起的鄉社攏著出聲；西拉徛起的百姓著唱歌，佇山頂的著出大聲。

12

(THR) In tio̍h chiong êng-kng kui hō͘ Iâ-hô-hoa, tī hái-sū-tiong pò-iông I ê miâ-siaⁿ.

(BCL) 著將榮光歸互耶和華，佇海嶼中報揚伊的名聲。

13

(THR) Iâ-hô-hoa beh chhin-chhiūⁿ ióng-béng ê lâng chhut-khì; beh chhin-chhiūⁿ kau-chiàn ê lâng kek-tōng jia̍t-sim ; beh âu-kiò, tōa-siaⁿ hoah, beh ēng tōa khùi-la̍t kong-kek I ê tùi-te̍k.

(BCL) 耶和華欲親像勇猛的人出去，欲親像交戰的人激動熱心，欲喉叫，大聲喝，欲用大氣力攻擊伊的對敵。

14

(THR) Góa kú-kú bô khui-chhùi, chēng-chēng ka-kī at-chí; taⁿ Góa beh âu-kiò, chhin-chhiūⁿ beh siⁿ ê hū-jîn-lâng; Góa beh hā-hā-chhóan bōe chih khùi.

(BCL) 我久久無開嘴，靜靜家己遏止；今我欲喉叫，親像欲生的婦仁人；我欲哈哈喘接氣。

15

(THR) Góa beh hō͘ tōa-soaⁿ sió-soaⁿ pìⁿ-chòe pha-hng, hō͘ hit téng-bīn ê hoe-chháu lóng ko͘-tâ; Góa beh hō͘ kang-hô pìⁿ-chòe chiu-sū, hō͘ chúi-tî lóng ta--khì.

(BCL) 我欲互大山小山變做拋荒，互彼頂面的花草攏枯焦；我欲互江河變做洲嶼，互水池攏乾去。

16

(THR) Góa beh chhōa chhiⁿ-mî--ê kiâⁿ in m̄-bat ê tō-lō͘; chhōa in kiâⁿ m̄-bat ê lō͘-kèng; tī in ê bīn-chêng hō͘ o͘-àm pìⁿ-chòe kng-bêng, hō͘ oan-khiau pìⁿ-chòe pîⁿ-tı̍t. Chiah ê sū Góa lóng beh kiâⁿ, ia̍h bô pàng-sak in.

(BCL) 我欲導睛暝者行呣識的道路，導行呣識的路徑；佇的面前互黑暗變做光明，互彎曲變做平直。諸個事我攏欲行，亦無放拺。

17

(THR) Óa-khò tiau-khek ê ngó͘-siōng, tùi chù-chō ê ngó͘-siōng kóng, Lí sī góan ê Siōng-tè, chit-hō lâng siū kóaⁿ-cháu, tōa kiàn-siàu.

(BCL) 倚靠雕刻的偶像，對鑄造的偶像講：你是阮的上帝；此號人受趕走，大見誚。

18

(THR) Lín chhàu-hī-lâng-ê tio̍h thiaⁿ; lín chhiⁿ-mî--ê tio̍h khòaⁿ, hō͘ lín ōe khòaⁿ-kìⁿ.

(BCL) 恁臭耳聾者，著聽！恁睛暝者，著看！互恁會看見。

19

(THR) Góa ê lô͘-po̍k í-gōa, chī-chūi chhiⁿ-mî ah? Chī-chūi chháu-hī lâng chhin-chhiūⁿ Góa só͘ chhe ê sù-chiá ah? chī-chūi chhiⁿ-mî chhin-chhiūⁿ hit-ê kap Góa hô-hó--ê, á-sī chhiⁿ-mî chhin-chhiūⁿ Iâ-hô-hoa ê lô͘-po̍k ah?

(BCL) 我的奴僕以外是誰睛暝啊？是誰臭耳聾親像我所差的使者啊？是誰睛暝親像彼個及我和好者？抑是睛暝親像耶和華的奴僕啊？

20

(THR) Lí khòaⁿ-kìⁿ chōe-chōe tāi-chì ia̍h bô chù-ì; khui hī-khang, iā bô thiaⁿ-kìⁿ.

(BCL) 你看見多多代誌亦無注意，開耳孔也無聽見。

21

(THR) Iâ-hô-hoa in-ūi ka-kī ê kong-gī, hoaⁿ-hí hō͘ lu̍t-hoat chòe tōa chòe chun-kùi.

(BCL) 耶和華因為家己的公義，歡喜互律法做大，做尊貴。

22

(THR) Chóng-sī chit ê peh-sìⁿ sī siū chhiúⁿ-to̍at--ê; tī soaⁿ-hia̍t siū tng-tio̍h, koaiⁿ-ba̍t tī kaⁿ--nih; in hō͘ lâng lia̍h-tio̍h, bô lâng chín-kiù; hō͘ lâng chhiúⁿ-lia̍h--khì, bô lâng kóng, Pàng i tò--khì.

(BCL) 總是此個百姓是受搶奪者，佇山穴受當著，關密佇監裡；互人掠著，無人拯救，互人搶掠去，無人講放伊倒去。

23

(THR) Lín tiong-kan chī-chūi khéng àⁿ hī-khang thiaⁿ che? chī-chūi khéng liû-sim, āu-lâi thiaⁿ-thàn i ah?

(BCL) 恁中間是誰肯俯耳孔聽這，是誰肯留心，後來聽趁伊啊？

24

(THR) Chī-chūi chiong Ngá-kok kau i hō͘ lâng chhiúⁿ, chiong Í-sek-lia̍t kau hō͘ chha̍t ah? kiám-m̄-sī Iâ-hô-hoa, lán só͘ tek-chōe--ê mah? in m̄-khéng kiâⁿ I ê tō-lō͘, ia̍h m̄-khéng thiaⁿ-thàn I ê lu̍t-hoat.

(BCL) 是誰將雅各交伊互人搶，將以色列交賊啊？豈呣是耶和華，咱所得罪的嗎？呣肯行伊的道路，亦呣肯聽趁伊的律法。

25

(THR) Só͘-í I chiong béng-lia̍t ê siū-khì, kap cheng-chiàn ê hiông-béng, piàⁿ tī i ê sin-chiūⁿ; tī i ê sì-ûi chhin-chhiūⁿ hé-to̍h, i iáu m̄-chai; hé sio-tio̍h i, i ia̍h bô khòa-ì.

(BCL) 所以，伊將猛烈的受氣及爭戰的兇猛傾佇伊的身上。佇伊的四圍親像火，伊猶呣知，火燒著伊，伊亦無掛意。

Bible Color Mark

• 台語漢字羅馬本
• 巴克禮全羅