以賽亞書 第 43 章

1

(THR) Ngá-kok ah, chhòng-chō lí ê Iâ-hô-hoa, Í-sek-lia̍t ah, hit ê chō-chiâⁿ lí--ê, án-ni kóng, Lí m̄-sái kiaⁿ, in-ūi Góa kiù-sio̍k lí; Góa bat kiò lí ê miâ, tiàu lí; lí sī Góa-ê.

(BCL) 雅各啊，創造你的耶和華，以色列啊，彼個造成你者，按呢講：你呣使驚！因為我救贖你。我曾叫你的名，召你，你是我的。

2

(THR) Lí tùi chúi-tiong keng-kè, Góa tek-khak kap lí saⁿ-kap tī-teh; lí keng-kè kang-hô, chúi tek-khak bô im-ba̍t lí; lí tùi hé-tiong kiâⁿ-kè--khì, tek-khak bô siū sio; hé-iām ia̍h bô to̍h tī lí ê sin-chiūⁿ.

(BCL) 你對水中經過，我的確及你相及佇；你經過江河，水的確無淹密你；你對火中行過去，的確無受燒，火焰亦無佇你的身上。

3

(THR) In-ūi Góa sī Iâ-hô-hoa lí ê Siōng-tè, sī Í-sek-lia̍t ê Sèng--ê, lí ê Kiù-chú; Góa í-keng hō͘ Ai-kı̍p chòe lí sio̍k-hôe ê kè-chîⁿ, hō͘ Kó͘-sı̍t kap Se-pa chòe lí ê thòe-sin.

(BCL) 因為我是耶和華──你的上帝，是以色列的聖者──你的救主；我已經互埃及做你贖回的價錢，互古實及西巴做你的替身。

4

(THR) In-ūi Góa khòaⁿ lí chòe pó-pòe, chòe chun-kùi, koh in-ūi Góa thiàⁿ lí, só͘-í Góa hō͘ lâng thòe lí, hō͘ lia̍t-kok ê lâng thòe lí ê sìⁿ-miā.

(BCL) 因為我看你做寶貝，做尊貴；閣因為我疼你，所以我互人替你，互列國的人替你的生命。

5

(THR) Bo̍h-tit kiaⁿ, in-ūi Góa kap lí saⁿ-kap tī-teh; Góa beh chhōa lí ê hō͘-è tùi tang-hng lâi, koh tùi sai-hng chio-chı̍p lí.

(BCL) 莫得驚，因為我及你相及佇；我欲導你的後裔對東方來，閣對西方招集你。

6

(THR) Góa beh tùi pak-hng kóng, Pàng--chhut-lâi; tùi lâm-hng kóng, Bo̍h-tit khu-liû; chiong Góa ê chèng-kiáⁿ tùi hn̄g-hn̄g chhōa--lâi, chiong Góa ê chèng cha-bó͘-kiáⁿ tùi tōe-ke̍k chhōa tò-lâi.

(BCL) 我欲對北方講，放出來！對南方講，莫得拘留！將我的眾子對遠遠導來，將我的眾查某子對地極導倒來，

7

(THR) Kìⁿ-nā ēng Góa ê miâ lâi chheng--ê sī Góa ūi-tio̍h ka-kī ê êng-kng chhòng-chō--ê; sī Góa só͘ chòe-chiâⁿ, só͘ chhòng-chō ê.

(BCL) 見若用我的名來稱者，是我為著家己的榮光創造者，是我所做成，所創造者。

8

(THR) Lí tio̍h chiong ū ba̍k-chiu ia̍h chhiⁿ-mî, ū hī-khang ia̍h chhàu-hī-lâng ê peh-sìⁿ, lóng-chóng chhōa i chhut-lâi.

(BCL) 你著將有目睭亦睛暝、有耳孔亦臭耳聾的百姓攏總導伊出來！

9

(THR) Bān-kok tio̍h chū-chı̍p, chèng peh-sìⁿ tio̍h chū-hōe; kî-tiong chī-chūi ōe chiong chit-ê kóng-bêng, ia̍h chiong chêng ê sū kóng hō͘ góan thiaⁿ ah? in thang chhōa kan-chèng lâi, ka-kī hián-bêng in chòe-tio̍h, á-sī in thiaⁿ-kìⁿ chiū kóng, Che sī chin-sı̍t.

(BCL) 萬國著聚集；眾百姓著聚會。其中是誰會將此個講明，亦將前的事講互阮聽啊？通導干證來，家己顯明做著；抑是聽見就講：這是真實。

10

(THR) Iâ-hô-hoa kóng, Lín sī Góa ê kan-chèng ê, sī Góa só͘ kéng ê lô͘-po̍k; hō͘ lín chai lâi sìn Góa, koh bêng-pe̍k Góa chiū-sī Iâ-hô-hoa; tī Góa ê tāi-seng bô-ū siū-chō ê Siōng-tè, tī Góa ê í-āu ia̍h-bô.

(BCL) 耶和華講：恁是我的干證的，是我所揀的奴僕。互恁知，來信我，閣明白我就是耶和華。佇我的代先無有受造的上帝；佇我的以後亦無。

11

(THR) Chí-ū Góa, Góa sī Iâ-hô-hoa; tû Góa í-gōa bô ū kiù-chú.

(BCL) 只有我，我是耶和華；除我以外無有救主。

12

(THR) Góa bat chí-sī, Góa bat chín-kiù, Góa bat kóng-bêng, koh tī lín tiong-kan bô ū pa̍t-iūⁿ ê Siōng-tè; só͘-í Iâ-hô-hoa kóng, Lín sī Góa ê kan-chèng, Góa chiū-sī Siōng-tè.

(BCL) 我曾指示，我曾拯救，我曾講明，閣佇恁中間無有別樣的上帝。所以耶和華講：恁是我的干證。我就是上帝；

13

(THR) Tùi ū jı̍t-chí í-lâi, Góa chiū-sī Iâ-hô-hoa; bô chı̍t-ê ōe kiù lâng thoat-lī Góa ê chhiú; Góa beh kiâⁿ tāi-chì, chī-chūi ōe chó͘-chí ah?

(BCL) 對有日子以來，我就是耶和華；無一個會救人脫離我的手。我欲行代誌是誰會阻止啊？

14

(THR) Kiù-sio̍k lín ê Chú Iâ-hô-hoa, Í-sek-lia̍t ê Sèng--ê, án-ni kóng, In-ūi lín ê iân-kò͘, Góa í-keng chhe lâng kàu Pa-pí-lûn, koh Góa beh hō͘ Ka-le̍k-tí lâng pāi-lo̍h, chhin-chhiūⁿ tô-cháu ê peh-sìⁿ, lóng chē in hōa-hōa-háu ê chûn.

(BCL) 救贖恁的主──耶和華、以色列的聖者按呢講：因為恁的緣故，我已經差人到巴比倫；閣我欲互迦勒底人敗落親像逃走的百姓，攏坐嘩嘩哮的船。

15

(THR) Góa sī Iâ-hô-hoa lín ê Sèng--ê, sī chhòng-chō Í-sek-lia̍t--ê, sī lín ê Kun-ông.

(BCL) 我是耶和華──恁的聖者，是創造以色列者，是恁的君王。

16

(THR) Iâ-hô-hoa tī tōa-hái-tiong khui-lō͘, tī tōa-chúi-tiong khui-lō͘;

(BCL) 耶和華佇大海中開路，佇大水中開路，

17

(THR) hō͘ chhia, bé, peng-teng, ióng-béng ê lâng lóng chhut-lâi; (in chòe chı̍t-ē tó--lo̍h-khì, bōe koh khí--lâi; in bia̍t-bô chhin-chhiūⁿ sit--khì ê hé;)

(BCL) 互車、馬、兵丁、勇猛的人攏出來，做一下倒落去，閣起來；滅無，親像熄去的火。

18

(THR) Iâ-hô-hoa án-ni kóng, Lín m̄-thang kì-liām chêng ê sū, ia̍h m̄-thang siūⁿ chá-sî ê tāi-chì.

(BCL) 耶和華按呢講：恁呣通紀念前的事，亦呣通想早時的代誌。

19

(THR) Khòaⁿ ah, Góa beh chòe chı̍t-hāng sin ê sū, taⁿ teh hoat-hiān, lín kiám m̄-chai mah? Góa beh tī khòng-iá khui tō-lō͘, tī soa-bô͘ khui kang-hô.

(BCL) 看啊，我欲做一項新的事；今發現，恁豈呣知嗎？我欲佇曠野開道路，佇沙漠開江河。

20

(THR) Soaⁿ--nih ê cháu-siù beh chun-tiōng Góa, soaⁿ-káu kap tô-chiáu ia̍h beh án-ni; in-ūi Góa hō͘ khòng-iá ū chúi, hō͘ soa-bô͘ ū hô, thang hō͘ Góa ê peh-sìⁿ, Góa só͘-kéng--ê, lim.

(BCL) 山裡的走獸欲尊重我；山狗及鴕鳥亦欲按呢。因為我互曠野有水，互沙漠有河，通互我的百姓、我所揀者飲。

21

(THR) Chit ê peh-sìⁿ sī Góa ūi-tio̍h ka-kī só͘ chō--ê, beh pò-iông Góa ê miâ-siaⁿ.

(BCL) 此個百姓是我為著家己所造的，欲報揚我的名聲。

22

(THR) Ngá-kok ah, lí bô ū kiû-kiò Góa; Í-sek-lia̍t ah, lí hóan-tńg iàm-hôan Góa.

(BCL) 雅各啊，你無有求叫我；以色列啊，你反轉厭煩我。

23

(THR) Lí bô tòa lí ê iûⁿ chòe sio-chè lâi hō͘ Góa; ia̍h bô ū ēng chè-mı̍h chun-kèng Góa. Góa bô in-ūi só͘-hiàn ê mı̍h hō͘ lí tio̍h-bôa, ia̍h bô in-ūi jú-hiuⁿ hō͘ lí ià-siān.

(BCL) 你無帶你的羊做燒祭來互我，亦無有用祭物尊敬我；我無因為所獻的物互你著磨，亦無因為乳香互你厭倦。

24

(THR) Lí bô ēng gûn ūi Góa bóe chhiong-pô͘, ia̍h bô ēng chè-mı̍h ê iû hō͘ Góa pá-chiok; hóan-tńg hō͘ Góa in-ūi lí ê chōe-ok tio̍h-bôa, hō͘ Góa in-ūi lí ê chōe-kòa ià-siān.

(BCL) 你無用銀為我買菖蒲，亦無用祭物的油互我飽足；反轉互我因為你的罪惡著磨，互我因為你的罪過厭倦。

25

(THR) Chí-ū Góa in-ūi ka-kī ê iân-kò͘, chhat-bia̍t lí chiah ê kè-sit; Góa ia̍h bô kì-liām lí chiah ê chōe-ok.

(BCL) 只有我因為家己的緣故擦滅你諸個過失；我亦無紀念你諸個罪惡。

26

(THR) Lí tio̍h tiám-chhíⁿ Góa; lí Góa thang saⁿ-kap piān-lūn; lí thang pâi-lia̍t lí ê chêng-lí, thang tit-tio̍h chheng-chòe-gī.

(BCL) 你著點醒我，你我通相及辯論；你通排列你的情理，通得著稱做義。

27

(THR) Lí khai-ki ê chó͘ hōan-chōe, lí ê tiong-pó pōe-ge̍k Góa.

(BCL) 你開基的祖犯罪；你的中保悖逆我。

28

(THR) Só͘-í Góa beh lêng-jio̍k sèng-só͘ ê siú-léng, hō͘ Ngá-kok siū chiù-chó͘, hō͘ Í-sek-lia̍t siū lóe-mē.

(BCL) 所以，我欲凌辱聖所的首領，互雅各受咒詛，互以色列受詈罵。

Bible Color Mark

• 台語漢字羅馬本
• 巴克禮全羅