以賽亞書 第 28 章

1

(THR) Chai-ē ah, Í-hoat-liân ê chùi-hàn kiau-ngō͘ ê bián-liû, kap i súi ê chng-thāⁿ teh siā ê hoe, chiū-sī tì tī hiah-ê hō͘ chiú só͘ khùn-khó͘--ê, in ê pûi ê soaⁿ-kok ê thâu.

(BCL) 災禍啊！以法蓮的醉漢，驕傲的冕旒，及伊娞的妝飾謝的花，就是戴佇許個互酒所困苦者，的肥的山谷的頭。

2

(THR) Khòaⁿ Chú ū chı̍t-ê tōa kôan-lêng tōa khùi-la̍t--ê, chhin-chhiūⁿ chı̍t-chūn ê tōa-pha̍uh, chhin-chhiūⁿ húi-bia̍t ê kông-hong, chhin-chhiūⁿ hiong-lâu ê tōa-chúi, I beh ēng tōa-la̍t hiat i tī tōe--nih.

(BCL) 看，主有一個大權能大氣力者，親像一陣的大雹，親像毀滅的狂風，親像洶流的大水，伊欲用大力伊佇地裡。

3

(THR) Í-hoat-liân ê chùi-hàn kiau-ngō͘ ê bián-liû beh siū ta̍h tī kha-ē.

(BCL) 以法蓮的醉漢，驕傲的冕旒欲受踏佇腳下。

4

(THR) I súi ê chng-thāⁿ teh siā ê hoe chiū-sī tī pûi ê soaⁿ-kok ê thâu, beh chhin-chhiūⁿ hē-thiⁿ í-chêng khí-thâu se̍k ê bû-hoa-kó; kìⁿ-nā khòaⁿ-kìⁿ--ê chiū chù-ì khòaⁿ, chı̍t-ē kàu-chhiú chiū thun--lo̍h-khì.

(BCL) 伊娞的妝飾謝的花，就是佇肥的山谷的頭，欲親像夏天以前起頭熟的無花果；見若看見的就注意看，一下到手就吞落去。

5

(THR) Tng hit-jı̍t bān-kun ê Iâ-hô-hoa beh chòe I hiah-ê só͘ chhun ê peh-sìⁿ êng-kng ê bō, súi ê bián-liû.

(BCL) 當彼日，萬軍的耶和華欲做伊許個所剩的百姓榮光的帽、娞的冕旒。

6

(THR) Ia̍h chòe chē-ūi lâi sím-phòaⁿ--ê kong-gī ê sîn, ia̍h chòe siâⁿ-mn̂g-kháu phah-thè tùi-te̍k--ê ê khùi-la̍t.

(BCL) 亦做坐位來審判者公義的神，亦做城門口拍退對敵者的氣力。

7

(THR) To̍k-to̍k chit-hō lâng tùi chiú lâi chha-biū, tùi kāu-chiú lâi bê-lō͘; chè-si kap sian-ti lóng tùi kāu-chiú lâi chha-biū, hō͘ chiú só͘ thun-chia̍h, tùi kāu-chiú lâi bê-lō͘; tùi-tī be̍k-sī chiū chha-chhok, tùi tī sím-phòaⁿ bô pêng-ún.

(BCL) 獨獨此號人對酒來差謬，對厚酒來迷路。祭司及先知攏對厚酒來差謬，互酒所吞食，對厚酒來迷路。對佇默示就差錯，對佇審判無平穩。

8

(THR) In-ūi ta̍k tè toh lâ-sâm, thò͘ kàu móa-móa, bô chı̍t-ūi chheng-khì.

(BCL) 因為逐塊桌垃墋吐到滿滿，無一位清氣。

9

(THR) I beh ēng tì-hūi kà-sī chī-chūi ah? beh hō͘ chī-chūi bêng-pe̍k só͘-thôan-ê ah? sī hit-hō tú-á tn̄g-lin lī-khui heng-chêng--ê mah?

(BCL) 伊欲用智慧教示是誰啊？欲互是誰明白所傳的啊？是彼號抵仔斷奶離開胸前的嗎？

10

(THR) In-ūi bēng-lēng koh bēng-lēng, bēng-lēng koh bēng-lēng; lu̍t-lē koh lu̍t-lē, lu̍t-lē koh lu̍t-lē, chit-ūi tām-po̍h, hit-ūi tām-po̍h.

(BCL) 因為命令閣命令，命令閣命令，律例閣律例，律例閣律例，此位淡薄，彼位淡薄。

11

(THR) Bōe--lah; Chú beh ēng pa̍t-iūⁿ ê chhùi-tûn kap bô siâng-lūi ê chı̍h, tùi chit ê peh-sìⁿ kóng-ōe.

(BCL) 啦，主欲用別樣的嘴唇及無像類的舌，對此個百姓講話。

12

(THR) I bat tùi in kóng, Chit-ê chiū-sī an-hioh, lín tio̍h hō͘ ià-siān ê lâng tit-tio̍h an-hioh; koh kóng, Chit-ê chiū-sī khùiⁿ-o̍ah; chóng-sī in m̄-khéng thiaⁿ.

(BCL) 伊曾對講：此個就是安息，恁著互厭倦的人得著安息，閣講此個就是快活，總是呣肯聽。

13

(THR) Só͘-í Iâ-hô-hoa tùi in kóng ê ōe, sī bēng-lēng koh bēng-lēng, bēng-lēng koh bēng-lēng; lu̍t-lē koh lu̍t-lē, lu̍t-lē koh lu̍t-lē; chit-ūi tām-po̍h, hit-ūi tām-po̍h; tì-kàu in khì, chiū hiàⁿ-āu po̍ah-tó, koh po̍ah kàu chhùi-chhùi, hām-lo̍h lô-bāng, siū lia̍h-tio̍h.

(BCL) 所以，耶和華對講的話，是命令閣命令，命令閣命令，律例閣律例，律例閣律例，此位淡薄，彼位淡薄，致到去就向後跋倒，閣跋到碎碎，陷落羅網受掠著。

14

(THR) Só͘-í lín chiah ê bú-bān ê lâng, chiū-sī kóan-hat tiàm tī Iâ-lō͘-sat-léng chiah ê peh-sìⁿ--ê, tio̍h thiaⁿ Iâ-hô-hoa ê ōe.

(BCL) 所以，恁諸個侮慢的人，就是管轄踮佇耶路撒冷諸個百姓者，著聽耶和華的話。

15

(THR) In-ūi lín bat kóng, Góan kap sí-bô lı̍p-iok, kap im-hú kiat-bêng, chai-ē tōa liû-hêng ê sî tek-khak bô kàu tī góan; in-ūi góan ēng pe̍h-chha̍t chòe siám-pī ê só͘-chāi, tī hu-ké ê só͘-chāi ka-kī bih.

(BCL) 因為恁曾講：阮及死無立約，及陰府結盟；災禍大流行的時的確無到佇阮，因為阮用白賊做閃避的所在，佇虛假的所在家己匿。

16

(THR) Só͘-í Chú Iâ-hô-hoa án-ni kóng, Khòaⁿ ah, Góa tī Sek-an hē chı̍t tè chio̍h chòe tōe-ki, sī í-keng chhì-giām ê chio̍h, kian-kò͘ ê tōe-ki, pó-kùi ê chhù-kak; óa-khò i ê lâng tek-khak bô tio̍h-kip.

(BCL) 所以，主耶和華按呢講：看啊，我佇錫安下一塊石做地基，是已經試驗的石，堅固的地基，寶貴的厝角；倚靠伊的人的確無著急。

17

(THR) Góa beh ēng kong-pêng chòe chún-chîn ēng kong-gī chòe tūi-sòaⁿ; peng-pha̍uh beh phah-tó hu-ké siám-pī ê só͘-chāi, tōa-chúi beh im-ba̍t siám-bih ê só͘-chāi.

(BCL) 我欲用公平做準繩，用公義做墜線，冰雹欲拍倒虛假閃避的所在；大水欲淹密閃匿的所在。

18

(THR) Lín kap sí-bô só͘ lı̍p ê iok tek-khak hòe-bô, kap im-hú só͘ kiat ê bêng tek-khak khiā-bōe-tiâu; chai-ē tōa liû-hêng ê sî, lín beh siū i thún-ta̍h.

(BCL) 恁及死無所立的約的確廢無，及陰府所結的盟的確徛住。災禍大流行的時恁欲受伊　踏；

19

(THR) Ta̍k-pái keng-kè, beh chiong lín lia̍h-khì; in-ūi ta̍k chá-khí i beh keng-kè, bô làng jı̍t-mî; bêng-pe̍k só͘-thôan-ê, kan-ta kiaⁿ-hiâⁿ.

(BCL) 逐擺經過欲將恁掠去。因為逐早起伊欲經過，無閬日暝。明白所傳的干單驚惶。

20

(THR) Bîn-chhn̂g té, hō͘ lâng bōe chhun-tı̍t; mî-phē o̍eh, hō͘ lâng kah bōe-ba̍t.

(BCL) 眠床短，互人伸直；棉被狹，互人蓋密。

21

(THR) In-ūi Iâ-hô-hoa beh khí-lâi, chhin-chhiūⁿ tī Pí-la̍h-sim soaⁿ, I beh siū-khì chhin-chhiūⁿ tī Ki-piàn ê soaⁿ-kok; thang chòe I ê kang, chiū-sī hán-tit chòe ê kang, thang chiâⁿ I ê sū, chiū-sī kî-īⁿ ê sū.

(BCL) 因為耶和華欲起來，親像佇毗拉心山；伊欲受氣，親像佇基遍的山谷，通做伊的工，就是罕得做的工；通成伊的事，就是奇異的事。

22

(THR) Taⁿ lín m̄-thang bú-bān, kiaⁿ-liáu pa̍k lín ê soh khún khah-ân; in-ūi góa tùi Chú, bān-kun ê Iâ-hô-hoa thiaⁿ-kìⁿ, í-keng koat-tòan beh tī chôan-tōe-chiūⁿ kiâⁿ só͘ tiāⁿ-tio̍h bia̍t-bô ê sū.

(BCL) 今恁呣通侮慢，驚了縛恁的索捆卡緊；因為我對主──萬軍的耶和華聽見，已經決斷欲佇全地上行所定著滅無的事。

23

(THR) Lín tio̍h àⁿ hī-khang thiaⁿ góa ê siaⁿ, liû-sim thiaⁿ góa ê ōe.

(BCL) 恁著俯耳孔聽我的聲，留心聽我的話。

24

(THR) Hit-ê lôe-hn̂g beh iā-chéng--ê, kiám-sī siông-siông teh lôe mah? kiám-sī siông-siông teh ku̍t lâi pē i ê thô͘ mah?

(BCL) 彼個犁園欲撒種的，豈是常常犁嗎？豈是常常掘來耙伊的土嗎？

25

(THR) I í-keng chhòng-pîⁿ thô͘-bīn, kiám bô iā poeh-kak, chai má-khûn, chiàu-chōa chèng sió-be̍h, tī tiāⁿ-tio̍h ê só͘-chāi chèng tōa-be̍h, tī hn̂g-piⁿ chèng chho͘-be̍h mah?

(BCL) 伊已經創平土面，豈無撒八角，栽花麻，照畷種小麥，佇定著的所在種大麥，佇園邊種粗麥嗎？

26

(THR) In-ūi i ê Siōng-tè ēng ha̍p-gî ê hoat-tō͘ chí-tiám i, koh kà-sī i.

(BCL) 因為伊的上帝用合宜的法度指點伊，閣教示伊。

27

(THR) Poeh-kak m̄-sī ēng lāi ê khì-kū phah--ê, má-khûn m̄-sī ēng chhia-lûn lún--ê; chiū-sī ēng thûi-á phah poeh-kak, ēng kóaiⁿ-á phah má-khûn.

(BCL) 八角呣是用利的器具拍的，麻芹呣是用車輪碖的，就是用槌仔拍八角，用枴仔拍花芹。

28

(THR) Chòe-piáⁿ ê gō͘-kak kiám khoeh hō͘ i chhùi mah? Bô--lah, bô tn̂g-tn̂g phah i; sui-jiân ēng chhia-lûn bé-tôe phah-sòaⁿ i, ia̍h bô hō͘ i chhùi--khì.

(BCL) 做餅的五穀豈夾互伊碎嗎？無啦，無長長拍伊；雖然用車輪、馬蹄拍散伊，亦無互伊碎去。

29

(THR) Che ia̍h chhut tī bān-kun ê Iâ-hô-hoa; I ê kè-e̍k kî-biāu, I ê tì-hūi khoah-tōa.

(BCL) 這亦出佇萬軍的耶和華──伊的計劃奇妙；伊的智慧闊大。

Bible Color Mark

• 台語漢字羅馬本
• 巴克禮全羅