以賽亞書 第 24 章

1

(THR) Khòaⁿ ah, Iâ-hô-hoa hō͘ tōe khang-hu, pìⁿ-chòe pha-hng, koh chiong tōa-tōe hoan-lìn-tńg, hō͘ khiā-khí ê peh-sìⁿ sì-sòaⁿ.

(BCL) 看啊，耶和華互地空虛，變做拋荒；閣將大地翻輪轉，互徛起的百姓四散。

2

(THR) Hit-sî peh-sìⁿ cháiⁿ-iūⁿ, chè-si ia̍h-sī án-ni; lô͘-po̍k cháiⁿ-iūⁿ, chú-lâng ia̍h-sī án-ni; lú-pī cháiⁿ-iūⁿ, chú-bú ia̍h-sī án-ni; bóe-mı̍h--ê cháiⁿ-iūⁿ, bōe-mı̍h--ê ia̍h-sī án-ni; pàng-chè--ê cháiⁿ-iūⁿ, chioh-chè-ê ia̍h-sī án-ni; the̍h lī-sek--ê cháiⁿ-iūⁿ, chhut lī-sek--ê ia̍h-sī án-ni.

(BCL) 彼時百姓怎樣，祭司亦是按呢；奴僕怎樣，主人亦是按呢；女婢怎樣，主母亦是按呢；買物者怎樣，賣物者亦是按呢；放債者怎樣，借債者亦是按呢；提利息者怎樣，出利息者亦是按呢。

3

(THR) Tōe beh chòe-chı̍t-ē khang-hu, lóng tú-tio̍h chhiúⁿ-kiap; in-ūi chit ê ōe sī Iâ-hô-hoa kóng--ê.

(BCL) 地欲做一下空虛，攏抵著搶劫；因為此個話是耶和華講的。

4

(THR) Tōe-chiūⁿ pi-ai soe-thè, sè-kài hú-pāi soe-thè, tōe-chiūⁿ tiàm-tī kôaiⁿ-ūi ê lâng ia̍h hú-pāi.

(BCL) 地上悲哀衰退，世界腐敗衰退；地上踮佇高位的人亦腐敗。

5

(THR) Tōe hō͘ khiā-khí hit ê téng-bīn ê peh-sìⁿ phah lâ-sâm, in-ūi in hōan-tio̍h hiah ê lu̍t-hoat, hòe-bô lu̍t-lē, pōe-biū éng-óan ê iok.

(BCL) 地互徛起彼個頂面的百姓拍垃墋；因為犯著許個律法，廢無律例，悖謬永遠的約。

6

(THR) Só͘-í tōe hō͘ chiù-chó͘ thun-bia̍t, khiā-khí tī hit téng-bīn--ê siū gí-chōe; tōe-chiūⁿ khiā-khí ê peh-sìⁿ siū-sio, só͘-chhun ê lâng chió-chió.

(BCL) 所以，地互咒詛吞滅；徛起佇彼頂面者受擬罪。地上徛起的百姓受燒，所剩的人少少。

7

(THR) Sin ê chiú pi-ai, phû-tô-chhiū húi-hōai; sim-lāi khòai-lo̍k--ê lóng-chóng thó͘-khùi.

(BCL) 新的酒悲哀，葡萄樹毀壞；心內快樂者攏總吐氣。

8

(THR) Phah-kó͘ ê khòai-lo̍k chēng-chēng, iàn-lo̍k--ê ê siaⁿ-im lóng soah; tôaⁿ-khîm ê khòai-lo̍k ia̍h chēng-chēng.

(BCL) 拍鼓的快樂靜靜；宴樂者的聲音攏息，彈琴的快樂亦靜靜。

9

(THR) In bōe tit-tio̍h chhiùⁿ-koa lim-chiú; kāu-chiú tùi tī lim ê lâng beh chiâⁿ-chòe khó͘.

(BCL) 得著唱歌飲酒；厚酒對佇飲的人，欲成做苦。

10

(THR) Pha-hng ê siâⁿ í-keng thiah-húi; ta̍k-keng chhù lóng koaiⁿ-mn̂g, lâng lóng bōe-tit jı̍p.

(BCL) 拋荒的城已經拆毀；逐間厝攏關門，人攏得入。

11

(THR) Tī koe-lō͘ in-ūi chiú ū pi-ai ê siaⁿ; it-chhè ê hoaⁿ-hí pìⁿ-chòe o͘-àm, tōe-chiūⁿ ê khòai-lo̍k lóng bô--khì.

(BCL) 佇街路因為酒有悲哀的聲；一切的歡喜變做黑暗；地上的快樂攏無去。

12

(THR) Siâⁿ-lāi í-keng pha-hng, siâⁿ-mn̂g lóng húi-hōai.

(BCL) 城內已經拋荒；城門攏毀壞。

13

(THR) In-ūi tī tōe-chiūⁿ, bān peh-sìⁿ ê tiong-kan, beh chhin-chhiūⁿ phah-kè-liáu ê kaⁿ-ná-chhiū, koh chhin-chhiūⁿ phû-tô bán-liáu iáu chhun--ê chı̍t-iūⁿ.

(BCL) 因為佇地上萬百姓的中間，欲親像拍過了的橄欖樹，閣親像葡萄挽了猶剩的一樣。

14

(THR) Chiah ê lâng beh chhut tōa-siaⁿ, beh hoaⁿ-hí kiò; in ūi-tio̍h Iâ-hô-hoa ê ui-giâm, tùi hái--nih lâi âu-kiò.

(BCL) 諸個人欲出大聲欲歡喜叫；為著耶和華的威嚴，對海裡來喉叫。

15

(THR) In-ūi án-ni lín tio̍h tī tang-hng êng-kng Iâ-hô-hoa; tī chiah ê hái-sū êng-kng Iâ-hô-hoa Í-sek-lia̍t Siōng-tè ê miâ.

(BCL) 因為按呢，恁著佇東方榮光耶和華；佇諸個海嶼榮光耶和華──以色列上帝的名。

16

(THR) Góan thiaⁿ-kìⁿ tùi tōe-ke̍k ū lâng chhiùⁿ-koa, kóng, Êng-kng kui tī gī ê lâng. Chóng-sī góa kóng, Góa siau-bia̍t lah, góa siau-bia̍t lah; góa ū chai-ē ah, khúi-chà--ê kiâⁿ khúi-chà, khúi-chà-ê tōa kiâⁿ khúi-chà.

(BCL) 阮聽見對地極有人唱歌，講：榮光歸佇義的人。總是我講：我消滅啦！我消滅啦，我有災禍啊！詭詐的行詭詐；詭詐的大行詭詐。

17

(THR) Tōe-chiūⁿ khiā-khí ê peh-sìⁿ ah, kiaⁿ-hiâⁿ, hām-khiⁿ, o̍ah-tauh lóng lîm-kàu lí.

(BCL) 地上徛起的百姓啊，驚惶、陷坑、活罩攏臨到你。

18

(THR) Siám-pī kiaⁿ-hiâⁿ ê siaⁿ--ê, beh po̍ah-lo̍h hām-khiⁿ; tùi hām-khiⁿ khí-lâi--ê beh hō͘ o̍ah-tauh tauh-tio̍h; in-ūi thiⁿ-téng ê thang-á lóng khui, tōe ê kun-ki ia̍h tín-tāng.

(BCL) 閃避驚惶者聲的欲跋落陷坑；對陷坑起來者欲互活罩罩著；因為天頂的窗仔攏開，地的根基也振動。

19

(THR) Tōe chòe chı̍t-ē phò-hōai, tōe it-chīn pang-lı̍h, tōe tōa-tōa iô-choah.

(BCL) 地做一下破壞，地一盡崩裂，地大大搖泏。

20

(THR) Tōe beh tian-tian tó-tó, chhin-chhiūⁿ chiú-chùi ê lâng; koh iô-lâi iô-khì, chhin-chhiūⁿ tiàu-chhn̂g; chōe-kòa tāng-tāng teh--in, tek-khak tó--lo̍h-khì, bōe-ōe koh khí-lâi.

(BCL) 地欲顛顛倒倒，親像酒醉的人；閣搖來搖去，親像吊床。罪過重重壓，的確倒落去，會閣起來。

21

(THR) Kàu hit-jı̍t Iâ-hô-hoa tī kôaiⁿ ê só͘-chāi chek-ho̍at kôaiⁿ ê só͘-chāi ê chèng kun-peng; tī tōe-chiūⁿ beh chek-ho̍at tōe-chiūⁿ ê lia̍t-ông.

(BCL) 到彼日，耶和華佇高的所在責罰高的所在的眾軍兵，佇地上欲責罰地上的列王。

22

(THR) In beh siū chū-chı̍p, chhin-chhiūⁿ hōan-lâng siū chū-chı̍p tī hām-khiⁿ; ia̍h beh siū koaiⁿ tī kaⁿ-lāi; chōe-chōe jı̍t liáu-āu, chiū beh ū lîm-kàu in--ê.

(BCL) 欲受聚集，親像犯人受聚集佇陷坑，亦欲受關佇監內，多多日了後，就欲有臨到者。

23

(THR) Hit-sî ge̍h beh kiàn-siàu, jı̍t beh làu-khùi; in-ūi bān-kun ê Iâ-hô-hoa beh tī Sek-an soaⁿ tī Iâ-lō͘-sat-léng chòe-ông, tī I ê tióng-ló ê bīn-chêng beh ū êng-kng.

(BCL) 彼時，月欲見誚，日欲漏氣；因為萬軍的耶和華欲佇錫安山，佇耶路撒冷做王；佇伊的長老的面前，欲有榮光。

Bible Color Mark

• 台語漢字羅馬本
• 巴克禮全羅