以西結書 第 46 章

1

(THR) Chú Iâ-hô-hoa án-ni kóng: Lāi-īⁿ ǹg-tang ê mn̂g tī chòe-kang ê la̍k-jı̍t-lāi tek-khak tio̍h koaiⁿ; to̍k-to̍k tī an-hioh-jı̍t tio̍h khui, ge̍h ê chhoe-it iā tio̍h khui.

(BCL) 主耶和華按呢講：「內院向東的門，佇做工的六日內的確著關；獨獨佇安息日著開，月的初一也著開。

2

(THR) Jîn-kun tio̍h tùi chit ê mn̂g ê lông tùi gōa-bīn jı̍p, khiā tī mn̂g-khiā-piⁿ; chè-si tio̍h pī-pān i ê sio-chè kap i ê siā-un-chè, i tio̍h tī mn̂g-tēng hit tah kèng-pài; jiân-āu chhut-khì, chit ê mn̂g kàu ê-hng-sî m̄-thang koaiⁿ.

(BCL) 人君著對此個門的廊對外面入，徛佇門豎邊。祭司著備辦伊的燒祭及伊的謝恩祭，伊著佇門椗彼叨敬拜，然後出去。此個門到下昏時呣通關。

3

(THR) Tī chiah ê an-hioh-jı̍t, kap ge̍h ê chhoe-it, kok-lāi ê peh-sìⁿ tio̍h tī chit ê mn̂g-kháu kèng-pài tī Iâ-hô-hoa ê bīn-chêng.

(BCL) 佇諸個安息日及月的初一，國內的百姓著佇此個門口，敬拜佇耶和華的面前。

4

(THR) Jîn-kun tī an-hioh-jı̍t só͘ tio̍h hiàn hō͘ Iâ-hô-hoa ê sio-chè, tio̍h bô hâ-chhû ê iûⁿ-ko la̍k-chiah, bô hâ-chhû ê mî-iûⁿ-káng chı̍t-chiah;

(BCL) 人君佇安息日，所著獻互耶和華的燒祭，著無瑕疵的羊羔六隻，無瑕疵的綿羊一隻；

5

(THR) i ê sò͘-chè ūi-tio̍h hit chiah mî-iûⁿ-káng tio̍h chı̍t ê i-hoat, ūi-tio̍h hiah ê iûⁿ-ko ê sò͘-chè sī chiàu i ê le̍k-liōng chı̍t ê i-hoat phòe iû chı̍t him.

(BCL) 伊的素祭為著彼隻綿羊著一個伊法，為著許個羊羔的素祭是照伊的力量，一個伊法配油一欣。

6

(THR) Tng ge̍h ê chhoe-it tio̍h hiàn bô hâ-chhû ê gû-káng chı̍t-chiah, iûⁿ-ko la̍k-chiah, mî-iûⁿ-káng chı̍t-chiah; lóng tio̍h bô hâ-chhû--ê.

(BCL) 當月的初一，著獻無瑕疵的牛一隻，羊羔六隻，綿羊一隻，攏著無瑕疵的。

7

(THR) I iā tio̍h pī-pān sò͘-chè, ūi-tio̍h gû-káng hiàn chı̍t ê i-hoat, ūi-tio̍h mî-iûⁿ-káng hiàn chı̍t ê i-hoat, ūi-tio̍h hiah ê iûⁿ-ko chiū chiàu i ê le̍k-liōng chı̍t ê i-hoat phòe iû chı̍t-him.

(BCL) 伊也著備辦素祭，為著牛獻一個伊法，為著綿羊獻一個伊法，為著許個羊羔就照伊的力量，一個伊法配油一欣。

8

(THR) Jîn-kun jı̍p-lâi ê sî, tio̍h tùi chit ê mn̂g ê lông jı̍p, iā tio̍h tùi chit ê lō͘ chhut.

(BCL) 人君入來的時著對此個門的廊入，也著對此個路出。

9

(THR) Tī ta̍k ê choeh-kî, kok-lāi ê peh-sìⁿ tiâu-kìⁿ Iâ-hô-hoa ê sî, tùi pak-mn̂g jı̍p-lâi kèng-pài-ê tio̍h tùi lâm-mn̂g chhut-khì; tùi lâm-mn̂g jı̍p-lâi-ê tio̍h tùi pak-mn̂g chhut-khì; m̄-thang tùi só͘ jı̍p ê mn̂g o̍at-tò-tńg, tio̍h tı̍t-tı̍t chìn-chêng chhut-khì.

(BCL) 「佇逐個節期，國內的百姓朝見耶和華的時，對北門入來敬拜的，著對南門出去；對南門入來的，著對北門出去。呣通對所入的門越倒轉，著直直進前出去。

10

(THR) Peh-sìⁿ jı̍p-khì ê sî, jîn-kun iā tio̍h tī in ê tiong-kan jı̍p-khì; peh-sìⁿ chhut-khì, jîn-kun iā tio̍h kap in chhut-khì.

(BCL) 百姓入去的時，人君也著佇的中間入去；百姓出去，人君也著及出去。

11

(THR) Tī choeh-kî kap tāi-hōe ê sî, sò͘-chè tio̍h ūi-tio̍h chı̍t-chiah gû-káng hiàn chı̍t ê i-hoat, ūi-tio̍h chı̍t-chiah mî-iûⁿ-káng hiàn chı̍t ê i-hoat, ūi-tio̍h hiah ê iûⁿ-ko chiū chiàu i ê le̍k-liōng, chı̍t ê i-hoat phòe iû chı̍t-him.

(BCL) 「佇節期及大會的時，素祭著為著一隻牛獻一個伊法，為著一隻綿羊獻一個伊法，為著許個羊羔就照伊的力量，一個伊法配油一欣。

12

(THR) Jîn-kun nā pī-pān kam-sim ê chè, sio-chè á-sī siā-un-chè chòe kam-sim ê chè, hiàn hō͘ Iâ-hô-hoa, tio̍h ū lâng kā i khui ǹg-tang ê mn̂g, i tio̍h pī-pān i ê sio-chè kap i ê siā-un-chè chhin-chhiūⁿ tī an-hioh-jı̍t só͘ chòe chı̍t-iūⁿ; jiân-āu i tio̍h chhut-khì; chhut-khì-liáu tio̍h ū lâng kā i koaiⁿ-mn̂g.

(BCL) 人君若備辦甘心的祭，燒祭抑是謝恩祭，做甘心的祭獻互耶和華，著有人給伊開向東的門。伊著備辦伊的燒祭及伊的謝恩祭，親像佇安息日所做一樣，然後伊著出去。出去了，著有人給伊關門。」

13

(THR) Ta̍k-jı̍t lí tio̍h pī-pān bô hâ-chhû, bē móa-nî ê iûⁿ-ko chı̍t-chiah, chòe sio-chè hiàn hō͘ Iâ-hô-hoa; ta̍k chá-khí tio̍h pī-pān i.

(BCL) 「逐日，你著備辦無瑕疵未滿年的羊羔一隻，做燒祭獻互耶和華；逐早起著備辦伊。

14

(THR) Ta̍k chá-khí iā tio̍h pī-pān saⁿ-kap hiàn ê sò͘-chè, chı̍t i-hoat la̍k-hūn ê chı̍t-hūn, kap chı̍t him iû saⁿ-hūn ê chı̍t-hūn chhiau-hô mī-hún; chit ê sò͘-chè tio̍h siông-siông hiàn hō͘ Iâ-hô-hoa, chòe éng-óan tiāⁿ-tio̍h ê lē.

(BCL) 逐早起也著備辦相及獻的素祭，一伊法六份的一份，及一欣油三份的一份，摶和麵粉。此個素祭著常常獻互耶和華做永遠定著的例。

15

(THR) Ta̍k chá-khí in tio̍h án-ni pī-pān iûⁿ-ko, sò͘-chè, kap iû, chòe siông-siông hiàn ê sio-chè.

(BCL) 逐早起著按呢備辦羊羔、素祭，及油做常常獻的燒祭。」

16

(THR) Chú Iâ-hô-hoa án-ni kóng: Jîn-kun nā chiong sán-gia̍p hō͘ i ê kiáⁿ ê chı̍t-ê, chiū-sī chòe i ê gia̍p, kui tī i hiah ê kiáⁿ, sī in sêng-chiap chòe gia̍p--ê.

(BCL) 主耶和華按呢講：「人君若將產業互伊的子的一個，就是做伊的業，歸佇伊許個子是承接做業的。

17

(THR) Chóng-sī i nā chiong i ê sán-gia̍p ê chı̍t-hūn hō͘ i ê jîn-sîn ê chı̍t-ê, sī chòe jîn-sîn-ê kàu chū-iû ê nî, hit-sî iû-gôan kui tī jîn-kun; lūn-kàu i ê sán-gia̍p tio̍h lâu hō͘ i hiah ê kiáⁿ.

(BCL) 總是伊若將伊的產業的一份互伊的人臣的一個，是做人臣的到自由的年，彼時猶原歸佇人君。論到伊的產業，著留互伊許個子。

18

(THR) Jîn-kun m̄-thang chhiúⁿ-to̍at peh-sìⁿ ê sán-gia̍p, lâi kóaⁿ in lī-khui in só͘ sêng-chiap-ê; i tio̍h tùi ka-kī ê gia̍p-tiong chiong sán-gia̍p hō͘ i ê kiáⁿ; bián-tit Góa ê peh-sìⁿ sì-sòaⁿ, ta̍k-lâng lī-khui i só͘ sêng-chiap--ê.

(BCL) 人君呣通搶奪百姓的產業，來趕離開所承接的；伊著對家己的業中，將產業互伊的子；免得我的百姓四散，逐人離開伊所承接的。」

19

(THR) I chiū chhōa góa tùi mn̂g-piⁿ ê lō͘ jı̍p-lâi kàu chè-si ǹg pak hiah ê sèng ê pâng-keng; khòaⁿ ah, āu-bīn sai-sì ū chı̍t só͘-chāi.

(BCL) 伊就導我對門邊的路入來到祭司向北許個聖的房間，看啊，後面西勢有一所在。

20

(THR) I chiū kā góa kóng, Che sī chè-si chú pó͘-kè-sit-chè kap sio̍k-chōe-chè, í-kı̍p pek sò͘-chè ê só͘-chāi; bián-tit tòa-kàu gōa-īⁿ, hō͘ peh-sìⁿ chiâⁿ-chòe sèng.

(BCL) 伊就給我講：「這是祭司煮補過失祭及贖罪祭，以及素祭的所在；免得帶到外院，互百姓成做聖。」

21

(THR) I koh chhōa góa chhut-khì kàu gōa-īⁿ, hō͘ góa keng-kè īⁿ sì ê kak-thâu; khòaⁿ ah, tī hit ê īⁿ ta̍k ê kak-thâu kok ū chı̍t ê īⁿ.

(BCL) 伊閣導我出去到外院，互我經過院四個角頭，看啊，佇彼個院逐個角頭各有一個院。

22

(THR) Tī īⁿ ê sì kak-thâu ū īⁿ, sì-bīn ū chhiûⁿ ûi-teh; ta̍k ê īⁿ, tn̂g sì-cha̍p tiú, khoah saⁿ-cha̍p; sì ê kak-thâu ê īⁿ, in ê chhùn-chhioh lóng chı̍t-iūⁿ.

(BCL) 佇院的四角頭有院，四面有牆圍，逐個院長四十肘，闊三十。四個角頭的院，的寸尺攏一樣，

23

(THR) Sì ê īⁿ ê chiu-ûi ū khí chı̍t-lia̍t, i ê ē-bīn lóng ū chú-mı̍h ê só͘-chāi.

(BCL) 四個院的周圍有起一列，伊的下面攏有煮物的所在。

24

(THR) I kā góa kóng, Chiah-ê chiū-sī chú-mı̍h ê chàu-kha; tiān-lāi chiah-ê chòe chhe-ēng--ê tī-chia chú peh-sìⁿ ê chè-sū.

(BCL) 伊給我講：「諸個就是煮物的灶腳，殿內諸個做差用者佇遮煮百姓的祭祀。」

Bible Color Mark

• 台語漢字羅馬本
• 巴克禮全羅