以西結書 第 31 章

1

(THR) Cha̍p-it--nî, saⁿ-ge̍h chhoe-it, Iâ-hô-hoa ê ōe lîm-kàu góa kóng:

(BCL) 十一年三月初一，耶和華的話臨到我講：

2

(THR) Jîn-chú ah, lí tio̍h tùi Ai-kı̍p ông Hoat-ló, í-kı̍p i ê chèng-lâng kóng, Lí hiah tōa-tè, sī chhin-chhiūⁿ chī-chūi?

(BCL) 「人子啊，你著對埃及王法老以及伊的眾人講：你許大塊是親像是誰？

3

(THR) Khòaⁿ ah, A-su̍t bat chòe Lī-pa-lùn ê pek-hiuⁿ-chhiū, ki-ōaiⁿ chin súi, ìm-ńg chhin-chhiūⁿ chhiū-nâ, chhiū-sin kôaiⁿ-tōa, ki-bé chhun jı̍p hûn-tiong.

(BCL) 看啊，亞述曾做黎巴嫩的柏香樹，枝椏真娞，蔭影親像樹林，樹身高大，枝尾伸入雲中。

4

(THR) Hiah ê chúi iúⁿ i tōa-châng, chhim-ian hō͘ i hoat chin-kôaiⁿ, i hiah ê kang-hô se̍h-lâu tī chai-chèng i ê só͘-chāi; thiah-chhe ê chúi, lâu kàu chhân-hn̂g ê chhiū-ba̍k.

(BCL) 許個水養伊大欉；深淵互伊發真高。伊許個江河踅流佇栽種伊的所在，拆叉的水，流到田園的樹木。

5

(THR) Só͘-í i kôaiⁿ-tōa pôaⁿ-kè chhân--nih ê chèng-chhiū; i ê ki chin-ām; i ê ōaiⁿ chin-tn̂g; in-ūi tī i hoat-siⁿ ê sî ū chúi chōe-chōe.

(BCL) 所以高大過田裡的眾樹；伊的枝真艷，伊的椏真長，因為佇伊發生的時有水多多。

6

(THR) Khong-tiong ê pe-chiáu, lóng tī ki-téng choh-siū; chhân-iá ê cháu-siù lóng tī ki-ē siⁿ-kiáⁿ; chōe-chōe tōa-kok lóng tiàm tī i ê ìm-ē.

(BCL) 空中的飛鳥攏佇枝頂作巢；田野的走獸攏佇枝下生子；多多大國攏踮佇伊的蔭下。

7

(THR) Chhiū tōa, ki tn̂g, chiâⁿ-chòe chin súi; in-ūi kun soan tī tōa chúi-piⁿ.

(BCL) 樹大枝長，成做真娞，因為根旋佇大水邊。

8

(THR) Siōng-tè hn̂g-lāi ê pek-hiuⁿ-chhiū jia i bōe-tio̍h; chhêng-chhiū put-kı̍p i ê ki, png-chhiū put-kı̍p i ê ōaiⁿ, Siōng-tè hn̂g-lāi chiah ê chhiū lóng bōe pí-tit i ê súi.

(BCL) 上帝園內的柏香樹遮伊著；松樹不及伊的枝；楓樹不及伊的椏；上帝園內諸個樹攏比得伊的娞。

9

(THR) Góa hō͘ i ê ki-ōaiⁿ bō͘-sēng, chiâⁿ-chòe súi; tì-kàu Siōng-tè hn̂g-lāi Ai-tiân it-chhè ê chhiū, lóng òan-tò͘ i.

(BCL) 我互伊的枝椏茂盛，成做娞，致到上帝園內伊甸一切的樹攏怨妒伊。」

10

(THR) Só͘-í Chú Iâ-hô-hoa án-ni kóng, In-ūi lí kôaiⁿ-tōa, ki-bé chhun jı̍p hûn-tiong, i ê sim in-ūi i ê kôaiⁿ-tōa lâi chū-ko,

(BCL) 所以主耶和按呢講：「因為你高大，枝尾伸入雲中，伊的心因為伊的高大來自高，

11

(THR) án-ni, Góa beh chiong i kau tī lia̍t-kok tiong ū tōa sè-le̍k--ê; i tek-khak beh pān--i, in-ūi i ê chōe-ok, Góa kóaⁿ-tio̍k i.

(BCL) 按呢，我欲將伊交佇列國中有大勢力者；伊的確欲辦伊。因為伊的罪惡，我趕逐伊。

12

(THR) Gōa-pang-lâng, chiū-sī lia̍t-pang-tiong kiông-pō--ê, chiong i chhò-tn̄g, hiat-ka̍k, i ê ōaiⁿ ka-la̍uh tī soaⁿ--nih kap it-chhè ê soaⁿ-kok-tiong; i ê ki chı̍h tī hit só͘-chāi ê hô-piⁿ; tōe-chiūⁿ ê chèng peh-sìⁿ í-keng lo̍h-khì, lī-khui i ê ìm-ńg.

(BCL) 外邦人，就是列邦中強暴者，將伊剉斷擲。伊的椏磕落佇山裡及一切的山谷中，伊的枝折，佇彼所在的河邊。地上的眾百姓已經落去，離開伊的蔭影。

13

(THR) Khong-tiong ê pe-chiáu, lóng beh hioh tī chit ê soe-pāi ê chhiū-téng; chhân-iá ê cháu-siù lóng beh tòa tī i ê chhiū-ki;

(BCL) 空中的飛鳥攏欲歇佇此個衰敗的樹頂，田野的走獸攏欲住佇伊的樹枝，

14

(THR) thang hō͘ chúi-piⁿ chiah ê chhiū, bô in-ūi kôaiⁿ tōa lâi chū-ko; ia̍h bô chiong ki-bé chhun-jı̍p hûn-tiong; koh hiah ê tit-tio̍h chúi lūn-te̍k ū sè-le̍k ê, ia̍h bōe tit-tio̍h kôaiⁿ-tōa lâi khiā--khí-lâi; in-ūi in tī sè-kan lâng ê tiong-kan, kap lo̍h im-kan ê lâng, lóng kau hō͘ sí-bô, kàu chhim-chhim ê tōe-ē.

(BCL) 通互水邊諸個樹無因為高大來自高，亦無將枝尾伸入雲中，閣許個得著水潤澤有勢力的，亦得著高大來徛起來。因為佇世間人的中間，及落陰間的人攏交互死無，到深深的地下。」

15

(THR) Chú Iâ-hô-hoa án-ni kóng, I lo̍h im-kan ê hit-jı̍t, Góa hō͘ lâng pi-ai; Góa ūi-tio̍h i jia-khàm chhim-ian, iok-sok kang-hô, hō͘ tōa-chúi thêng-lâu; Góa ia̍h hō͘ Lī-pa-lùn ūi-tio̍h i chhiⁿ-chhám; chhân-iá chiah ê chhiū lóng in-ūi i hūn-khì.

(BCL) 主耶和華按呢講：「伊落陰間的彼日，我互人悲哀。我為著伊遮蓋深淵，約束江河，互大水停流；我亦互黎巴嫩為著伊凄慘，田野諸個樹攏因為伊昏去。

16

(THR) Góa chiong i hiat-lo̍h im-kan, kap lo̍h-khiⁿ ê lâng saⁿ-kap lo̍h--khì; hit-sî lia̍t-kok thiaⁿ-kìⁿ i tūi-lo̍h ê siaⁿ, chiū lóng tín-tāng; Ai-tiân it-chhè ê chhiū, Lī-pa-lùn tit-tio̍h chúi lūn-te̍k, tē-it hó tē-it súi ê, lóng tī tōe-ē chhim ê só͘-chāi, siū an-ùi.

(BCL) 我將伊落陰間，及落坑的人相及落去。彼時，列國聽見伊墜落的聲，就攏振動，伊甸一切的樹──黎巴嫩得著水潤澤、第一好第一娞的──攏佇地下深的所在受安慰。

17

(THR) In ia̍h kap i saⁿ-kap lo̍h im-kan, kàu siū to thâi ê lâng hia; in bat chòe i ê chhiú-kut, tī lia̍t-kok-tiong khiā-khí i ê ìm-ńg-ē.

(BCL) 亦及伊相及落陰間，到受刀的人遐。曾做伊的手骨，佇列國中徛起伊的蔭影下。

18

(THR) Tī chiah-ê êng-kng kôaiⁿ-tōa, tī Ai-tiân chiah ê chhiū-tiong, lí chhin-chhiūⁿ chī-chūi? chóng-sī lí beh kap Ai-tiân chiah ê chhiū saⁿ-kap lo̍h-khì tōe-ē chhim ê só͘-chāi; lí beh kap siū to thâi ê lâng, tó tī bô siū kat-lé ê lâng ê tiong-kan. Che chiū-sī Hoat-ló kap i ê chèng peh-sìⁿ; che sī Chú Iâ-hô-hoa kóng--ê.

(BCL) 佇諸個榮光高大，佇伊甸諸個樹中，你親像是誰？總是你欲及伊甸諸個樹相及落去地下深的所在，你欲及受刀的人，倒佇無受割禮的人的中間。「這就是法老及伊的眾百姓。這是主耶和華講的。」

Bible Color Mark

• 台語漢字羅馬本
• 巴克禮全羅