以西結書 第 30 章

1

(THR) Iâ-hô-hoa ê ōe lîm-kàu góa kóng,

(BCL) 耶和華的話臨到我講：

2

(THR) Jîn-chú ah, lí tio̍h soan-thôan kóng, Chú Iâ-hô-hoa án-ni kóng, Chhám ah chit-jı̍t, lín tio̍h thî-khàu.

(BCL) 「人子啊，你著宣傳講，主耶和華按呢講：慘啊此日！恁著啼哭。

3

(THR) In-ūi jı̍t kūn--lah, chiū-sī Iâ-hô-hoa ê jı̍t kūn--la̍h, chiū-sī ba̍t-hûn ê jı̍t, beh chòe lia̍t-kok ê sî-kî.

(BCL) 因為日近啦，就是耶和華的日近啦，就是密雲的日，欲做列國的時期。

4

(THR) Beh ū to-kiàm lîm-kàu Ai-kı̍p, tī Ai-kı̍p siū-thâi ê lâng tó--lo̍h-khì ê sî, Kó͘-sı̍t lâng chiū ū thòng-khó͘; in beh lia̍h i ê chèng-lâng, thiah-húi i ê tōe-ki.

(BCL) 欲有刀劍臨到埃及；佇埃及受的人倒落去的時，古實人就有痛苦，欲掠伊的眾人，拆毀伊的地基。

5

(THR) Kó͘-sı̍t, Hut, Lō͘-tek, chham-chhap ê peh-sìⁿ, kap Kó͘-pa, í-kı̍p tông-bêng ê kok ê peh-sìⁿ, lóng beh kap in saⁿ-kap tó tī to-ē.

(BCL) 古實、弗、路德、參插的百姓，及古巴，以及同盟的國的百姓攏欲及相及倒佇刀下。」

6

(THR) Iâ-hô-hoa án-ni kóng, Hû-chō͘ Ai-kı̍p--ê ia̍h beh tó; i sè-le̍k ê kiau-ngō͘ beh kàng-kē; tùi Sek-hut-nî ê thah khí, in lóng beh tī-hia tó tī to-ē; che sī Chú Iâ-hô-hoa kóng--ê.

(BCL) 耶和華按呢講：扶助埃及者亦欲倒。伊勢力的驕傲欲降低；對色弗尼的塔起，攏欲佇遐倒佇刀下。這是主耶和華講的。

7

(THR) In beh tī léng-chēng ê tōe ê tiong-kan, lâi chòe léng-chēng; i chiah ê siâⁿ ia̍h beh lia̍t tī chiah ê hong-hòe ê siâⁿ ê tiong-kan.

(BCL) 欲佇冷靜的地的中間來做冷靜；伊諸個城亦欲列佇諸個荒廢的城的中間。

8

(THR) Tng Góa pàng-hé tī Ai-kı̍p, kìⁿ-nā pang-chān i--ê, lóng siū bia̍t-bô; hit-sî, in chiū chai Góa sī Iâ-hô-hoa.

(BCL) 當我放火佇埃及；見若幫助伊者，攏受滅無。彼時，就知我是耶和華。

9

(THR) Kàu hit-jı̍t beh ū sù-chiá tùi Góa ê bīn-chêng tah-chûn chhut-khì; hō͘ an-jiân khiā-khí ê Kó͘-sı̍t lâng kiaⁿ-hiâⁿ; beh ū thòng-khó͘ lîm-kàu in, chhin-chhiūⁿ Ai-kı̍p ê jı̍t chı̍t-iūⁿ; khòaⁿ ah, tāi-chì lâi--lah.

(BCL) 「到彼日，欲有使者對我的面前搭船出去，互安然徛起的古實人驚惶；欲有痛苦臨到，親像埃及的日一樣。看啊，代誌來啦！

10

(THR) Chú Iâ-hô-hoa án-ni kóng, Góa beh ēng Pa-pí-lûn ông Nî-pò͘-kah-nî-sat ê chhiú, bia̍t Ai-kı̍p ê chèng-lâng.

(BCL) 主耶和華按呢講：我欲用巴比倫王尼布甲尼撒的手，滅埃及的眾人。

11

(THR) I kap tè i ê lâng, chiū-sī lia̍t-kok-tiong kiông-pō-ê, beh lâi húi-bia̍t chit ê tōe; in beh pu̍ih-to kong-kek Ai-kı̍p, hō͘ piàn-tōe ū siū-thâi ê lâng.

(BCL) 伊及隨伊的人，就是列國中強暴的，欲來毀滅此個地。欲拔刀攻擊埃及，互遍地有受的人。

12

(THR) Góa beh hō͘ hiah ê kang-hô ta, ia̍h beh ēng hit ê tōe bōe hō͘ pháiⁿ-lâng ê chhiú; Góa beh ēng gōa-pang ê chhiú hō͘ hit ê tōe kap kî-tiong só͘ ū--ê, pìⁿ-chòe léng-chēng; che sī Góa Iâ-hô-hoa kóng--ê.

(BCL) 我欲互許個江河乾，亦欲用彼個地賣互歹人的手；我欲用外邦的手，互彼個地及其中所有的變做冷靜。這是我耶和華講的。

13

(THR) Chú Iâ-hô-hoa án-ni kóng, Góa beh húi-bia̍t hiah ê ngó͘-siōng, tùi Lô-hut tû-bia̍t sîn-pu̍t; tek-khak bô koh ū kun-ông tùi Ai-kı̍p tōe chhut; Góa beh kàng-lo̍h kiaⁿ-hiâⁿ tī Ai-kı̍p tōe.

(BCL) 主耶和華按呢講：我欲毀滅許個偶像，對羅弗除滅神佛；的確無閣有君王對埃及地出。我欲降落驚惶佇埃及地。

14

(THR) Góa beh hō͘ Pa-thek-lô léng-chēng; pàng-hé tī Só-an ê tiong-kan; kiâⁿ sím-phòaⁿ ê sū tī Lô ê tōe-hng.

(BCL) 我欲互巴忒羅冷靜，放火佇瑣安的中間，行審判的事佇羅的地方。

15

(THR) Góa beh piàⁿ-chhut Góa ê tōa siū-khì tī Sìn, chiū-sī Ai-kı̍p ê ōe-só͘; ia̍h beh bia̍t Lô ê chèng-lâng.

(BCL) 我欲傾出我的大受氣佇汛，就是埃及的衛所，亦欲滅羅的眾人。

16

(THR) Góa beh pàng-hé tī Ai-kı̍p, Sìn beh tú-tio̍h tōa thòng-khó͘; Lô beh tú-tio̍h kong-phòa, Lô-hut tng-thâu pe̍h-jı̍t tú-tio̍h tùi-te̍k.

(BCL) 我欲放火佇埃及，汛欲抵著大痛苦；羅欲抵著攻破；羅弗當頭白日抵著對敵。

17

(THR) A-bûn kap Pí-pek-sı̍t ê siàu-liân lâng, beh tó tī to-ē; in beh hō͘ lâng lia̍h-khì.

(BCL) 亞捫及比伯實的少年人欲倒佇刀下；欲互人掠去。

18

(THR) Góa tī Tap-pí-le̍k at-chı̍h Ai-kı̍p chiah ê taⁿ, hō͘ i in-ūi sè-le̍k ê kiau-ngō͘, soah tī i ê tiong-kan; hit-sî tī-hia jı̍t o͘-àm; lūn-kàu chit ê siâⁿ, beh ū ba̍t-hûn jia-khàm; i tiong-kan ê cha-bó͘-kiáⁿ beh hō͘ lâng lia̍h--khì.

(BCL) 我佇答比匿遏折埃及諸個軛，互伊因為勢力的驕傲息佇伊的中間。彼時，佇遐日黑暗；論到此個城，欲有密雲遮蓋，伊中間的查某子欲互人掠去。

19

(THR) Góa beh án-ni sím-phòaⁿ Ai-kı̍p; in chiū chai Góa sī Iâ-hô-hoa.

(BCL) 我欲按呢審判埃及，就知我是耶和華。」

20

(THR) Cha̍p-it-nî, chiaⁿ-ge̍h chhoe-chhit, Iâ-hô-hoa ê ōe lîm-kàu góa kóng,

(BCL) 十一年正月初七，耶和華的話臨到我講：

21

(THR) Jîn-chú ah, Góa í-keng at-chı̍h Ai-kı̍p ông Hoat-ló ê chhiú-kut; bô pau i ê siong, bô kô͘-io̍h, bô chat pò͘-liâu, thang hō͘ i ū la̍t kia̍h-to.

(BCL) 「人子啊，我已經遏折埃及王法老的手骨；無包伊的傷無糊藥，無紮布料，通互伊有力抬刀。

22

(THR) Só͘-í Chú Iâ-hô-hoa án-ni kóng, Khòaⁿ ah, Góa kap Ai-kı̍p ông Hoat-ló chòe tùi-te̍k, beh chiong i nn̄g ki chhiú-kut, ióng--ê, siū at-chı̍h--ê, beh chòe chı̍t-ē at-chı̍h; hō͘ to tùi i ê chhiú ka-la̍uh.

(BCL) 所以主耶和華按呢講：看啊，我及埃及王法老做對敵，欲將伊二支手骨，勇者、受遏折者，欲做一下遏折，互刀對伊的手磕落。

23

(THR) Góa beh chiong Ai-kı̍p lâng hun-sòaⁿ tī lia̍t-kok, sì-sòaⁿ tī lia̍t-pang.

(BCL) 我欲將埃及人分散佇列國，四散佇列邦。

24

(THR) Góa beh hō͘ Pa-pí-lûn ông ê chhiú-kut ū la̍t, chiong Góa ê to kau tī i ê chhiú; Góa beh at-chı̍h Hoat-ló ê chhiú-kut, i beh tī i ê bīn-chêng hiⁿ-hiⁿ-chhan, chhin-chhiūⁿ siū sí-siong ê lâng hiⁿ-hiⁿ-chhan.

(BCL) 我欲互巴比倫王的手骨有力，將我的刀交佇伊的手；我欲遏折法老的手骨，伊欲佇伊的面前譆譆孱，親像受死傷的人譆譆孱。

25

(THR) Góa beh hû Pa-pí-lûn ông ê chhiú-kut; Hoat-ló ê chhiú-kut beh sê-lo̍h-khì; Góa chiong Góa ê to kau tī Pa-pí-lûn ông ê chhiú; i beh chhun-chhut hit ki to tī Ai-kı̍p tōe; hit-sî in chiū chai Góa sī Iâ-hô-hoa.

(BCL) 我欲扶巴比倫王的手骨，法老的手骨欲垂落去；我將我的刀交佇巴比倫王的手，伊欲伸出彼支刀佇埃及地，彼時就知我是耶和華。

26

(THR) Góa beh chiong Ai-kı̍p lâng hun-sòaⁿ tī lia̍t-kok, sì-sòaⁿ tī lia̍t-pang; in chiū chai Góa sī Iâ-hô-hoa.

(BCL) 我欲將埃及人分散佇列國，四散佇列邦；就知我是耶和華。」

Bible Color Mark

• 台語漢字羅馬本
• 巴克禮全羅