以西結書 第 19 章

1

(THR) Lí tio̍h ūi Í-sek-lia̍t ê ông-chhin chòe ai-ko,

(BCL) 你著為以色列的王親做哀歌，

2

(THR) kóng, Lín lāu-bú sī sím-mı̍h? sī bú ê sai, phak tī chiah ê sai ê tiong-kan; tī sòe chiah sai ê tiong-kan, iúⁿ-chhī i ê kiáⁿ.

(BCL) 講：恁老母是甚麼？是母的獅，仆佇諸個獅的中間，佇細隻獅的中間養飼伊的子。

3

(THR) Tī i ê kiáⁿ ê tiong-kan, chhī chı̍t-chiah kàu tōa, ha̍k-sı̍p kā-mı̍h lâi chia̍h-lâng.

(BCL) 佇伊的子的中間飼一隻到大，學習咬物來食人。

4

(THR) Lia̍t-kok thiaⁿ-kìⁿ, chiū tī in ê hām-khiⁿ lia̍h-tio̍h, ēng liān thoa i kàu Ai-kı̍p tōe.

(BCL) 列國聽見就佇的陷坑掠著，用鍊拖伊到埃及地。

5

(THR) Bú ê sai khòaⁿ pún-sin thèng-hāu kàu sit-bāng; chiū tùi i sòe-chiah sai ê tiong-kan koh chhú chı̍t-chiah, iúⁿ-chhī kàu tōa.

(BCL) 母的獅看本身聽候到失望，就對伊細隻獅的中間閣取一隻養飼到大。

6

(THR) I tī chiah ê sai ê tiong-kan cháu-lâi cháu-khì, chiâⁿ-chòe ióng ê sai, ha̍k-sı̍p kā-mı̍h lâi chia̍h-lâng.

(BCL) 伊佇諸個獅的中間走來走去，成做勇的獅，學習咬物來食人。

7

(THR) I chai in ê kiong-tiān, koh hō͘ in ê siâⁿ pìⁿ-chòe pha-hng, in-ūi i hm̄-hm̄-háu ê siaⁿ, piàn-tōe kap kî-tiong só͘-ū--ê chiū hong-hòe.

(BCL) 伊知的宮殿，閣互的城變做拋荒；因為伊噤噤哮的聲，遍地及其中所有的就荒廢。

8

(THR) Tùi án-ni sì-ûi ê pang-kok tùi ta̍k-séng lâi kong-kek i, ēng bāng pha tī i ê téng-bīn; i siū-lia̍h tī in ê hām-khiⁿ.

(BCL) 對按呢四圍的邦國對逐省來攻擊伊，用網拋佇伊的頂面；伊受掠佇的陷坑。

9

(THR) In kā i liān tī tû--nih, tòa kàu Pa-pí-lûn ông hia; koaiⁿ--i tī kian-kò͘ ê só͘-chāi; hō͘ i ê siaⁿ tī Í-sek-lia̍t soaⁿ bô koh thiaⁿ-kìⁿ.

(BCL) 給伊鍊佇櫥裡，帶到巴比倫王遐，關伊佇堅固的所在，互伊的聲佇以色列山無閣聽見。

10

(THR) Lín lāu-bú chêng chhin-chhiūⁿ phû-tô-chhiū, ke̍k-kî bō͘-sēng, chai tī chúi-piⁿ, in-ūi chúi chōe, chiū kiat chōe-chōe ké-chí, hoat chōe-chōe ki.

(BCL) 恁老母前親像葡萄樹，極其茂盛，栽佇水邊。因為水多，就結多多果子，發多多枝；

11

(THR) Siⁿ-chhut giám-ngī ê ki-ōaiⁿ, thang chòe chiáng-kôan--ê ê kóaiⁿ; i tī ām-ām ê ki-ōaiⁿ-tiong chòe ke̍k kôaiⁿ--ê; in-ūi kôaiⁿ, chiū i ê ōaiⁿ ê tiong-ki théng-khí hō͘ lâng khòaⁿ-kìⁿ.

(BCL) 生出嚴硬的枝椏，通做掌權者的柺。伊佇艷艷的枝椏中做極高者，因為高，就伊的椏的中枝挺起，互人看見。

12

(THR) Chóng-sī chit-châng phû-tô-chhiū, in-ūi tōa siū-khì, tú-tio̍h pu̍ih--khí-lâi, hiat tī tōe--nih; tang-hong chhe-ta i ê ké-chí, giám-ngī ê ki-ōaiⁿ at-chı̍t ko͘-tâ, hō͘ hé sio-lio--khì.

(BCL) 總是此欉葡萄樹因為大受氣抵著拔起來佇地裡；東風吹乾伊的果子，嚴硬的枝椏遏折枯焦，互火燒燎去；

13

(THR) Taⁿ chai tī khòng-iá ta-sò bô chúi ê tōe.

(BCL) 今栽佇曠野乾燥無水的地。

14

(THR) Koh tùi i ki-ōaiⁿ ê kôaiⁿ, ū hé hoat-chhut, sio i ê ké-chí; tì-kàu i bô giám-ngī ê ki-ōaiⁿ, thang chòe chiáng-kôan--ê ê kóaiⁿ; che sī thang ai-siong--ê, thang chòe ai-ko.

(BCL) 閣對伊枝椏的桿有火發出，燒伊的果子，致到伊無嚴硬的枝椏通做掌權者的枴。這是通哀傷的，通做哀歌。

Bible Color Mark

• 台語漢字羅馬本
• 巴克禮全羅