以西結書 第 18 章

1

(THR) Iâ-hô-hoa ê ōe koh lîm-kàu góa kóng,

(BCL) 耶和華的話閣臨到我講：

2

(THR) Lín tī Í-sek-lia̍t tōe siáⁿ-sū ēng chit ê sio̍k-gú kóng, Lāu-pē chia̍h sng ê phû-tô, kiáⁿ ê chhùi-khí sng-nńg?

(BCL) 「恁佇以色列地啥事用此個俗語講『老父食酸的葡萄，子的嘴齒酸軟』？」

3

(THR) Chú Iâ-hô-hoa kóng, Góa kí Góa ê éng-o̍ah chiù-chōa kóng, Lín tī Í-sek-lia̍t-tiong bô in-iû thang koh ēng chit ê sio̍k-gú.

(BCL) 主耶和華講：「我指我的永活咒誓講，恁佇以色列中，無因由通閣用此個俗語。

4

(THR) Khòaⁿ ah, lóng-chóng ê sîn-hûn sī sio̍k tī Góa; chhin-chhiūⁿ lāu-pē ê sîn-hûn sio̍k tī Góa, kiáⁿ ê sîn-hûn iā sī án-ni; hōan-chōe ê sîn-hûn, i beh sí.

(BCL) 看啊，攏總的神魂是屬佇我；親像老父的神魂屬佇我，子的神魂也是按呢；犯罪的神魂，伊欲死。

5

(THR) Lâng nā kong-gī, kiâⁿ kong-pêng kap gī-lí,

(BCL) 「人若公義，行公平及義理：

6

(THR) bē-bat chiūⁿ soaⁿ-téng chia̍h chè-mı̍h, bē-bat gióng-bōng Í-sek-lia̍t-ke ê ngó͘-siōng, bē-bat phah lâ-sâm chhù-piⁿ ê bó͘, bē-bat chhin-kūn keng-kî-lāi ê hū-jîn-lâng;

(BCL) 未曾上山頂食祭物，未曾仰望以色列家的偶像，未曾拍垃墋厝邊的某，未曾親近經期內的婦仁人，

7

(THR) bē-bat khui-hū lâng, sī chiong khiàm-chè ê lâng ê tǹg-thâu hêng i, bē-bat kiông-chhiúⁿ lâng ê mı̍h, sī ēng chia̍h-mı̍h hō͘ iau ê lâng chia̍h, ēng i-chiûⁿ hō͘ thǹg-theh ê lâng chhēng,

(BCL) 未曾虧負人，是將欠債的人的當頭還伊；未曾強搶人的物，是用食物互枵的人食，用衣裳互褪裼的人穿；

8

(THR) bē-bat kā chioh-chîⁿ ê lâng thó lī-sek, iā bô the̍h lāi-chîⁿ, kiu-chhiú bô chòe-pháiⁿ, tī lióng-pêng ê lâng ê tiong-kan chiàu kong-tō phòaⁿ-koat,

(BCL) 未曾給借錢的人討利息，也無提利錢，勼手無做歹，佇兩旁的人的中間，照公道判決；

9

(THR) sūn-thàn Góa ê lu̍t-lē, chip-siú Góa ê hoat-tō͘, chiàu sêng-sı̍t kiâⁿ tāi-chì, che sī gī-lâng, tek-khak tit-tio̍h o̍ah; che sī Chú Iâ-hô-hoa kóng--ê.

(BCL) 順趁我的律例，執守我的法度，照誠實行代誌──這是義人，的確得著活。這是主耶和華講的。

10

(THR) Siat-sú i siⁿ chı̍t ê kiáⁿ, chòe kiông-tō, chòe thâi-lâng-ê, á-sī kiâⁿ hiah ê pháiⁿ ê chı̍t-hāng, bô kiâⁿ téng-bīn só͘ kóng ê hó,

(BCL) 「設使伊生一個子，做強盜，做人的，抑是行許個歹的一項，無行頂面所講的好，反轉上山頂食祭物，閣拍垃墋厝邊的某，

11

(THR) hóan-tńg chiūⁿ soaⁿ-téng chia̍h chè-mı̍h, koh phah lâ-sâm chhù-piⁿ ê bó͘,

(BCL) （見結18：10）。

12

(THR) khui-hū khùn-khó͘ kap sòng-hiong ê lâng, kiông-chhiúⁿ lâng ê mı̍h, bē-bat ēng tǹg-thâu hêng--lâng, gióng-bōng ngó͘-siōng, kiâⁿ khó-ò͘ⁿ ê sū,

(BCL) 虧負困苦及喪鄉的人，強搶人的物，未曾用當頭還人，仰望偶像，行可惡的事，

13

(THR) kā chioh-chîⁿ ê lâng thó lī-sek, the̍h lāi-chîⁿ; chit ê lâng kiám ōe o̍ah mah? i tek-khak bōe o̍ah; i kiâⁿ hiah ê it-chhè khó-ò͘ⁿ ê sū tek-khak tio̍h sí; i ê chōe beh kui tī i.

(BCL) 給借錢的人討利息，提利錢；此個人豈會活嗎？伊的確活。伊行許個一切可惡的事，的確著死，伊的罪欲歸佇伊。

14

(THR) Khòaⁿ ah, siat-sú i siⁿ chı̍t ê kiáⁿ, khòaⁿ-kìⁿ lāu-pē só͘ kiâⁿ it-chhè ê chōe, chiū kiaⁿ-hiâⁿ, bô án-ni khì kiâⁿ;

(BCL) 「看啊，設使伊生一個子，看見老父所行一切的罪就驚惶，無按呢去行；

15

(THR) bē-bat chiūⁿ-soaⁿ chia̍h chè-mı̍h, bē-bat gióng-bōng Í-sek-lia̍t-ke ê ngó͘-siōng, bē-bat phah lâ-sâm chhù-piⁿ ê bó͘;

(BCL) 未曾上山食祭物，未曾仰望以色列家的偶像，未曾拍垃墋厝邊的某，

16

(THR) bē-bat khui-hū lâng, bē-bat the̍h lâng ê tǹg-thâu, bē-bat kiông-chhiúⁿ lâng ê mı̍h, sī ēng chia̍h-mı̍h hō͘ iau ê lâng chia̍h, ēng i-chiûⁿ hō͘ thǹg-theh ê lâng chhēng,

(BCL) 未曾虧負人，未曾提人的當頭，未曾強搶人的物，是用食物互枵的人食，用衣裳互褪裼的人穿，

17

(THR) kiu-chhiú bô hāi sòng-hiong lâng, bô thó lāi-chîⁿ, bô the̍h lī-sek, i sūn-thàn Góa ê hoat-tō͘, chip-siú Góa ê lu̍t-lē, i chiū bô in-ūi lāu-pē ê chōe-kòa lâi sí-bô, tek-khak ōe o̍ah.

(BCL) 勼手無害喪鄉人，無討利錢，無提利息；伊順趁我的法度，執守我的律例，伊就無因為老父的罪過來死無，的確會活。

18

(THR) Lūn-kàu i ê lāu-pē, in-ūi i khi-hū lâng chin siong-tiōng, kiông-chhiúⁿ hiaⁿ-tī, tī pún-cho̍k-tiong kiâⁿ m̄-hó; khòaⁿ ah, i beh in-ūi ka-kī ê chōe lâi sí.

(BCL) 論到伊的老父；因為伊欺負人真傷重，強搶兄弟，佇本族中行呣好，看啊，伊欲因為家己的罪來死。

19

(THR) Lín iáu teh kóng, Kiáⁿ cháiⁿ-iūⁿ bô tam-tng lāu-pē ê chōe? Kiáⁿ nā kiâⁿ chèng-tit, kap ha̍p-lí ê sū, siú Góa it-chhè ê lu̍t-lē lâi kiâⁿ--i; i tek-khak ōe o̍ah.

(BCL) 「恁猶講：『子怎樣無擔當老父的罪？』子若行正直及合理的事，守我一切的律例來行伊，伊的確會活。

20

(THR) Hōan-chōe ê sîn-hûn, i beh sí; kiáⁿ tek-khak bô tam-tng lāu-pē ê chōe, lāu-pē iā bô tam-tng kiáⁿ ê chōe; gī-lâng ê gī beh kui tī i ka-kī; pháiⁿ-lâng ê pháiⁿ, iā beh kui tī i ka-kī.

(BCL) 犯罪的神魂，伊欲死。子的確無擔當老父的罪，老父也無擔當子的罪。義人的義欲歸佇伊家己，歹人的歹也欲歸佇伊家己。

21

(THR) Pháiⁿ-lâng nā hôe-thâu lī-khui só͘ chòe it-chhè ê chōe-ok, chip-siú Góa it-chhè ê lu̍t-lē, kiâⁿ chèng-tı̍t kap ha̍p-lí ê sū, i tek-khak ōe o̍ah, bōe sí.

(BCL) 「歹人若回頭離開所做一切的罪惡，執守我一切的律例，行正直及合理的事，伊的確會活，死。

22

(THR) I só͘ hōan it-chhè ê chōe-kòa bô koh kā i kì-tit; tī só͘ kiâⁿ ê gī, i beh o̍ah.

(BCL) 伊所犯一切的罪過無閣給伊記得，佇所行的義，伊欲活。

23

(THR) Chú Iâ-hô-hoa kóng, Pháiⁿ-lâng sí-bô, kiám sī Góa só͘ hoaⁿ-hí mah? Góa kiám-m̄-sī hoaⁿ-hí i hôe-thâu, lī-khui i só͘ kiâⁿ ê lō͘, lâi tit-tio̍h o̍ah mah?

(BCL) 主耶和華講：歹人死無，豈是我所歡喜嗎？我豈呣是歡喜伊回頭離開伊所行的路，來得著活嗎？

24

(THR) Chóng-sī gī-lâng nā o̍at-thâu, lī-khui i ê gī, lâi hōan-chōe, chiàu pháiⁿ-lâng só͘ kiâⁿ it-chhè khó-ò͘ⁿ ê sū, lâi kiâⁿ; i kiám ōe o̍ah mah? i só͘ kiâⁿ it-chhè ê gī, lóng bô koh siū kì-liām, i beh tī só͘ hōan ê chōe, só͘ kiâⁿ ê pháiⁿ, sí tī hit tiong-kan.

(BCL) 總是義人若越頭離開伊的義來犯罪，照歹人所行一切可惡的事來行，伊豈會活嗎？伊所行一切的義，攏無閣受記念；伊欲佇所犯的罪，所行的歹死佇彼中間。

25

(THR) Lín iáu teh kóng, Chú ê lō͘ bô kong-pêng; Í-sek-lia̍t-ke ah, lín tio̍h thiaⁿ; Góa ê lō͘ kiám bô kong-pêng mah? kiám-m̄-sī lín ê lō͘ bô kong-pêng mah?

(BCL) 「恁猶講：『主的路無公平！』以色列家啊，恁著聽，我的路豈無公平嗎？豈呣是恁的路無公平嗎？

26

(THR) Gī-lâng nā o̍at-thâu lī-khui i ê gī, lâi kiâⁿ chōe-ok, tì-kàu ūi-tio̍h án-ni lâi sí; i chiū in-ūi só͘ kiâⁿ ê chōe-ok lâi sí.

(BCL) 義人若越頭離開伊的義來行罪惡，致到為著按呢來死，伊就因為所行的罪惡來死。

27

(THR) Koh pháiⁿ-lâng nā hôe-thâu, lī-khui i só͘ kiâⁿ ê pháiⁿ, lâi kiâⁿ chèng-tı̍t kap ha̍p-lí ê sū; i beh hō͘ i ê sîn-hûn tit-tio̍h o̍ah.

(BCL) 閣歹人若回頭離開伊所行的歹，來行正直及合理的事，伊欲互伊的神魂得著活。

28

(THR) In-ūi i ū siūⁿ, hôe-thâu lī-khui i só͘ hōan it-chhè ê chōe-kòa; i tek-khak o̍ah bô sí.

(BCL) 因為伊有想，回頭離開伊所犯一切的罪過，伊的確活無死。

29

(THR) Í-sek-lia̍t-ke iáu teh kóng, Chú ê lō͘ bô kong-pêng; Í-sek-lia̍t-ke ah, Góa ê lō͘ kiám bô kong-pêng mah? kiám-m̄-sī lín ê lō͘ bô kong-pêng mah?

(BCL) 以色列家猶講：『主的路無公平！』以色列家啊，我的路豈無公平嗎？豈呣是恁的路無公平嗎？」

30

(THR) Só͘-í Chú Iâ-hô-hoa kóng, Í-sek-lia̍t-ke ah, Góa beh chiàu lín ta̍k-lâng só͘ kiâⁿ--ê sím-phòaⁿ lín; lín tio̍h hôe-thâu, lī-khui só͘ hōan it-chhè ê chōe-kòa; án-ni, chōe-kòa bōe-ōe hō͘ lín pāi-bô.

(BCL) 所以主耶和華講：「以色列家啊，我欲照恁逐人所行的審判恁。恁著回頭，離開所犯一切的罪過。按呢，罪過會互恁敗無。

31

(THR) Lín tio̍h chiong só͘ hōan it-chhè ê chōe-kòa hiat-ka̍k lī-khui lín; ūi ka-kī chiâⁿ chı̍t ê sin ê sim, kap sin ê sîn; Í-sek-lia̍t-ke ah, lín mih-sái tio̍h sí?

(BCL) 恁著將所犯一切的罪過擲離開恁，為家己成一個新的心及新的神。以色列家啊，恁乜使著死？

32

(THR) Chú Iâ-hô-hoa kóng, Lâng ê sí, Góa bô hoaⁿ-hí i ê sí; só͘-í lín tio̍h hôe-thâu, lâi tit-tio̍h o̍ah.

(BCL) 主耶和華講：人的死我無歡喜伊的死，所以恁著回頭來得著活。」

Bible Color Mark

• 台語漢字羅馬本
• 巴克禮全羅