帖撒羅尼迦後書 第 1 章

1

(THR) Pó-lô kap Se-lah í-kı̍p Thê-mô͘-thài phoe kià hō͘ Thiap-sat-lô-nî-ka lâng ê kàu-hōe, chiū-sī tiàm-tī lán ê Pē Siōng-tè kap Chú Iâ-so͘ Ki-tok ê:

(BCL) 保羅、及西拉，以及提摩太批寄互帖撒羅尼迦人的教會，就是佇咱的父──上帝及主耶穌基督的。

2

(THR) gōan lín tùi Pē Siōng-tè kap Chú Iâ-so͘ Ki-tok tit-tio̍h un-tián pêng-an.

(BCL) 願恁對父上帝及主耶穌基督得著恩典、平安。

3

(THR) Hiaⁿ-tī ah, góan eng-kai ūi-tio̍h lín siông-siông kám-siā Siōng-tè, che pún sī ha̍p-gî ê, in-ūi lín ê sìn it-hoat tióng-tōa, koh lín chèng lâng ta̍k ê saⁿ-thiàⁿ ê sim lóng chhiong-chiok;

(BCL) 兄弟啊，阮應該為著恁常常感謝上帝，這本是合宜的；因為恁的信益發長大，閣恁眾人逐個相疼的心攏充足。

4

(THR) tì-kàu góan tī Siōng-tè chiah ê kàu-hōe chiong lín lâi khoa-kháu, in-ūi lín tī it-chhè ê khún-tio̍k kap só͘ siū ê hōan-lān tiong, ū chûn thun-lún kap sìn ê sim;

(BCL) 致到阮佇上帝諸個教會將恁來誇口，因為恁佇一切的窘逐及所受的患難中，有存吞及信的心。

5

(THR) che chiū-sī Siōng-tè kong-gī sím-phòaⁿ bêng ê pîn-kù, hō͘ lín thang sǹg chòe ōe kham-tit tī Siōng-tè ê kok, chiū-sī lín ūi-tio̍h i siū-khó͘ ê.

(BCL) 這就是上帝公義審判明的憑據，互恁通算做會堪得佇上帝的國；就是恁為著伊受苦的。

6

(THR) In-ūi Siōng-tè chiàu kong-gī, beh ēng hōan-lān pò-èng hiah ê hō͘ lín tú-tio̍h hōan-lān ê lâng,

(BCL) 因為上帝照公義，欲用患難報應許個互恁抵著患難的人；

7

(THR) iā beh hō͘ lín chiah ê siū hōan-lān ê lâng kap góan tâng tit-tio̍h an-hioh, chiū-sī tī Chú Iâ-so͘ kap I ū kôan-lêng ê thiⁿ-sài, tī hé-iām tiong,

(BCL) 也欲互恁諸個受患難的人及阮同得著安息。就是佇主耶穌及伊有權能的天使，佇火焰中對天顯現的時，

8

(THR) tùi thiⁿ hián-hiān ê sî, lâi pò-oan tī hiah ê m̄ bat Siōng-tè kap m̄ sūn-ho̍k lán ê Chú Iâ-so͘ ê hok-im ê;

(BCL) 來報冤佇許個呣識上帝及呣順服咱的主耶穌的福音的。

9

(THR) chit hō lâng beh siū hêng-ho̍at, chiū-sī éng-óan ê bia̍t-bô, lī-khui Chú ê bīn-chêng kap I kôan-lêng ê êng-kng,

(BCL) 此號人欲受刑罰，就是永遠的滅無，離開主的面前及伊權能的榮光。

10

(THR) tng Chú lîm-kàu ê jı̍t, chiū-sī I beh tī chiah ê sèng-tô͘ tit-tio̍h êng-kng, iā tī hit jı̍t I beh tī lóng-chóng sìn ê lâng tit-tio̍h o-ló, in-ūi góan tùi lín só͘ kan-chèng ê lín ū sìn.

(BCL) 當主臨到的日，就是伊欲佇諸個聖徒得著榮光，也佇彼日伊欲佇攏總信的人得著謳咾。因為阮對恁所干證的，恁有信。

11

(THR) Ūi-tio̍h án-ni góan iā siông-siông thòe lín kî-tó, gōan lán ê Siōng-tè khòaⁿ lín chòe ōe kham-tit tī só͘ siū ê tiàu, koh ēng kôan-lêng lâi ôan-móa it-chhè só͘ him-bō͘ ê hó, kap tùi sìn só͘ chòe ê kang,

(BCL) 為著按呢，阮也常常替恁祈禱，願咱的上帝看恁做會堪得佇所受的召，閣用權能來圓滿一切所欣慕的好，及對信所做的工；

12

(THR) hō͘ lán ê Chú Iâ-so͘ ê miâ tī lín tit-tio̍h êng-kng, lín iā tī I tit-tio̍h êng-kng, chiàu lán ê Siōng-tè kap Chú Iâ-so͘ Ki-tok ê un.

(BCL) 互咱的主耶穌的名佇恁得著榮光，恁也佇伊得著榮光，照咱的上帝及主耶穌基督的恩。

Bible Color Mark

• 台語漢字羅馬本
• 巴克禮全羅