帖撒羅尼迦前書 第 5 章

1

(THR) Hiaⁿ-tī ah, lūn-kàu sî-kî m̄ bián siá phoe hō͘ lín.

(BCL) 兄弟啊，論到時期，呣免寫批互恁；

2

(THR) In-ūi lín ka-kī siông-sè chai, Chú ê jı̍t kàu chhin-chhiūⁿ chha̍t thàu mî lâi.

(BCL) 因為恁家己詳細知，主的日到，親像賊透暝來。

3

(THR) Lâng tng teh kóng, Pêng-an ún-tàng ê sî, chai-ē hut-jiân kàu tī in, chhin-chhiūⁿ siⁿ kiáⁿ ê kan-khó͘ kàu tī ū sin-īn ê hū-jîn-lâng chı̍t iūⁿ, in hiah ê lâng bōe-ōe cháu-lī.

(BCL) 人當講「平安穩當」的時，災禍忽然到佇，親像生子的艱苦到佇有娠孕的婦仁人一樣。許個人會走離。

4

(THR) Nā-sī hiaⁿ-tī ah, lín m̄ sī tī àm ê tiong-kan, tì-kàu hit jı̍t chhin-chhiūⁿ chha̍t lâi jip-tio̍h lín.

(BCL) 若是兄弟啊，恁呣是佇暗的中間，致到彼日親像賊來著恁。

5

(THR) In-ūi lín lóng sī kng-bêng ê lâng, jı̍t-sî ê lâng; lán m̄ sī sio̍k tī mî-sî ê, iā m̄ sī o͘-àm ê.

(BCL) 因為恁攏是光明的人，日時的人。咱呣是屬佇暝時的，也呣是黑暗的。

6

(THR) Só͘-í lán m̄ thang chhin-chhiūⁿ kî-û ê lâng teh khùn; tio̍h kéng-séng chiat-chè.

(BCL) 所以咱呣通親像其餘的人睏，著警醒節制。

7

(THR) In-ūi khùn ê lâng sī mî-sî khùn, chiú-chùi ê lâng sī mî-sî chùi.

(BCL) 因為睏的人是暝時睏，酒醉的人是暝時醉。

8

(THR) Nā-sī lán sio̍k jı̍t-sî ê tio̍h chiat-chè, chhēng sìn kap jîn-ài chòe hō͘-sim-kiàⁿ, ēng tit kiù ê ǹg-bāng chòe thâu-khoe.

(BCL) 若是咱屬日時的著節制，穿信及仁愛做護心鏡，用得救的向望做頭盔。

9

(THR) In-ūi Siōng-tè tiāⁿ-tio̍h lán m̄ sī lâi tú-tio̍h siū-khì, chiū-sī beh tùi lán ê Chú Iâ-so͘ Ki-tok lâi tit-tio̍h kiù.

(BCL) 因為上帝定著咱呣是來抵著受氣，就是欲對咱的主耶穌基督來得著救。

10

(THR) I thòe lán sí, hō͘ lán he̍k-sī chhíⁿ he̍k-sī khùn, kap I tâng o̍ah.

(BCL) 伊替咱死，互咱或是醒、或是睏，及伊同活。

11

(THR) Só͘-í tio̍h saⁿ an-ùi, tāi-ke saⁿ kiàn-lı̍p tek-hēng, chiàu lín só͘ teh chòe ê.

(BCL) 所以，著相安慰，大家相建立德行，照恁所做的。

12

(THR) Hiaⁿ-tī ah, góan kiû lín, hōan-nā tī lín tiong-kan tio̍h-bôa, tiàm-tī Chú tī-lí lín, kéng-kài lín ê, lín tio̍h bat i,

(BCL) 兄弟啊，阮求恁凡若佇恁中間著磨，佇主治理恁、警戒恁的。

13

(THR) ūi-tio̍h in só͘ chòe ê kang, lín tio̍h tī jîn-ài tōa-tōa chun-kèng in. Lín tāi-ke tio̍h hô-bo̍k.

(BCL) 恁著識伊，為著所做的工，恁著佇仁愛大大尊敬。恁大家著和睦。

14

(THR) Hiaⁿ-tī ah, góan khǹg lín tio̍h kéng-kài hiah ê bô hoat-tō͘ ê, an-ùi hiah ê lóe-chì ê, hû-chhî hiah ê lóan-jio̍k ê, ēng khoan-iông khóan-thāi chèng lâng.

(BCL) 兄弟啊，阮勸恁著警戒許個無法度者，安慰許個餒志者，扶持許個軟弱者，用寬容款待眾人。

15

(THR) Kín-sīn bo̍h-tit ēng pháiⁿ pò pháiⁿ; he̍k-sī tāi-ke saⁿ khóan-thāi, á-sī khóan-thāi chèng lâng, tio̍h siông-siông tui-jip hit ê hó.

(BCL) 謹慎，莫得用歹報歹；或是大家相款待，抑是款待眾人，著常常追彼個好。

16

(THR) Tio̍h siông-siông hoaⁿ-hí;

(BCL) 著常常歡喜，

17

(THR) tio̍h kî-tó bô soah;

(BCL) 著祈禱無息，

18

(THR) hōan sū kám-siā, in-ūi chit-ê sī Siōng-tè tiàm-tī Ki-tok Iâ-so͘ ǹg lín ê chí-ì.

(BCL) 凡事感謝；因為此個是上帝佇基督耶穌向恁的旨意。

19

(THR) M̄ thang phah-hoa Sèng Sîn;

(BCL) 呣通拍熄聖神；

20

(THR) m̄ thang khòaⁿ-khin sian-ti ê ōe,

(BCL) 呣通看輕先知的話。

21

(THR) hōan sū tio̍h chhat-giām;

(BCL) 凡事著察驗，好的著執守，

22

(THR) hó-ê tio̍h chip-siú; tio̍h lī-khui ta̍k iūⁿ ê pháiⁿ.

(BCL) 著離開逐樣的歹。

23

(THR) Gōan pêng-an ê Siōng-tè ka-kī hō͘ lín it-chīn chiâⁿ-sèng; koh gōan lín ê sîn kap hûn í-kı̍p seng-khu tī lán ê Chú Iâ-so͘ Ki-tok koh-lâi ê sî, lóng tit-tio̍h pó-chôan, bô thang hiâm.

(BCL) 願平安的上帝家己互恁一盡成聖！閣願恁的神及魂以及身軀，佇咱的主耶穌基督閣來的時，攏得著保全，無通嫌！

24

(THR) Tiàu lín ê sī sìn-sı̍t, I iā beh chiâⁿ i.

(BCL) 召恁的是信實，伊也欲成伊。

25

(THR) Hiaⁿ-tī ah, tio̍h thòe góan kî-tó.

(BCL) 兄弟啊，著替阮祈禱。

26

(THR) Tio̍h ēng sèng ê saⁿ-chim lâi chhéng-an lóng-chóng ê hiaⁿ-tī.

(BCL) 著用聖的相唚來請安攏總的兄弟。

27

(THR) Góa kí Chú lâi hoan-hù lín, ēng chit tiuⁿ phoe tha̍k hō͘ chèng hiaⁿ-tī thiaⁿ.

(BCL) 我指主來吩咐恁，用此張批讀互眾兄弟聽。

28

(THR) Gōan lán ê Chú Iâ-so͘ Ki-tok ê un-tián kap lín tī-teh.4

(BCL) 願咱的主耶穌基督的恩典及恁佇！

Bible Color Mark

• 台語漢字羅馬本
• 巴克禮全羅