帖撒羅尼迦前書 第 4 章

1

(THR) Hiaⁿ-tī ah, kiat-bé lâi kóng, góan tī Chú Iâ-so͘ kiû lín khǹg lín, chiàu lín chêng só͘ bat tùi góan siū, tio̍h cháiⁿ-iūⁿ kiâⁿ lâi hō͘ Siōng-tè hoaⁿ-hí ê, lín í-keng teh kiâⁿ, taⁿ tio̍h koh khah chhut-la̍t kiâⁿ.

(BCL) 兄弟啊，結尾來講：阮佇主耶穌求恁勸恁，照恁前所曾對阮受，著怎樣行來互上帝歡喜的，恁已經行，今著閣卡出力行。

2

(THR) In-ūi lín chai góan tùi Chú Iâ-so͘ ū sím-mı̍h bēng-lēng hō͘ lín.

(BCL) 因為恁知阮對主耶穌有甚麼命令互恁。

3

(THR) In-ūi Siōng-tè ê chí-ì, chiū-sī lín ê chiâⁿ-sèng, sī ài lín lī-khui îm-lōan.

(BCL) 因為上帝的旨意就是恁的成聖，是愛恁離開淫亂；

4

(THR) Ài lín ta̍k lâng ōe hiáu-tit ēng sèng-kiat kap chun-kùi siú ka-kī ê seng-khu,

(BCL) 愛恁逐人會曉得用聖潔，及尊貴守家己的身軀，

5

(THR) bô ēng su-io̍k ê chêng, chhin-chhiūⁿ m̄ bat Siōng-tè ê gōa-pang lâng;

(BCL) 無用私慾的情，親像呣識上帝的外邦人。

6

(THR) tī chit chân sū iā bô kè-kài, chhim-hōan i ê hiaⁿ-tī; in-ūi kìⁿ-nā chit hō sū Chú sī sin-oan ê, chhin-chhiūⁿ góan bat kā lín kóng lâi kan-chèng ê.

(BCL) 佇此層事也無過界，侵犯伊的兄弟；因為見若此號事，主是伸冤者，親像阮曾給恁講，來干證的。

7

(THR) In-ūi Siōng-tè tiàu lán, m̄ sī tì-kàu ù-òe, chiū-sī tī chiâⁿ-sèng.

(BCL) 因為上帝召咱，呣是致到污穢，就是佇成聖。

8

(THR) Só͘-í kū-cho̍at ê m̄ sī kū-cho̍at lâng, sī kū-cho̍at Siōng-tè, chiū-sī ēng I ê Sèng Sîn hō͘ lín ê.

(BCL) 所以拒絕的，呣是拒絕人，是拒絕上帝，就是用伊的聖神互恁的。

9

(THR) Lūn thiàⁿ hiaⁿ-tī m̄ bián siá phoe hō͘ lín, in-ūi lín ka-kī siū-tio̍h Siōng-tè ê kà-sī, hō͘ lín tāi-ke saⁿ-thiàⁿ,

(BCL) 論疼兄弟，呣免寫批互恁；因為恁家己受著上帝的教示，互恁大家相疼。

10

(THR) sī lín kó-jiân ū kiâⁿ i tī thong Má-kî-tùn ê chèng hiaⁿ-tī. Chóng-sī, hiaⁿ-tī ah, góan khǹg lín tio̍h it-hoat án-ni;

(BCL) 是恁果然有行伊佇通馬其頓的眾兄弟，總是兄弟啊，阮勸恁著益發按呢。

11

(THR) iā tio̍h tùi-tiōng thiâm-chēng, lâi chòe ka-kī ê sū, chhin-chhiú chòe lín ê kang, chiàu góan só͘ bat hoan-hù lín ê,

(BCL) 也著對重恬靜，來做家己的事，親手做恁的工，照阮所曾吩咐恁的，

12

(THR) hō͘ lín ǹg gōa-bīn lâng toan-chiàⁿ lâi kiâⁿ, iā ka-kī bô só͘ khiàm-kheh.

(BCL) 互恁向外面人端正來行，也家己無所欠缺。

13

(THR) Hiaⁿ-tī ah, lūn-kàu teh khùn ê lâng góan m̄ ài lín m̄ chai, bián-tit lín iu-būn chhin-chhiūⁿ hiah ê bô ǹg-bāng ê lâng chı̍t iūⁿ.

(BCL) 兄弟啊，論到睏的人，阮呣愛恁呣知，免得恁憂悶，親像許個無向望的人一樣。

14

(THR) In-ūi lán nā sìn Iâ-so͘ ū sí ū koh-o̍ah, chiū sio̍k Iâ-so͘ lâi khùn ê lâng, Siōng-tè iā beh án-ni chhōa in kap Iâ-so͘ saⁿ-kap lâi.

(BCL) 因為咱若信耶穌有死有復活，就屬耶穌來睏的人，上帝也欲按呢導及耶穌相及來。

15

(THR) In-ūi góan hōng Chú ê bēng-lēng, ēng chit-ê kā lín kóng, chiū-sī Chú koh lâi ê sî, lán chiah-ê iáu o̍ah-teh ê lâng, bōe-ōe tāi-seng hiah ê teh khùn ê lâng.

(BCL) 因為阮奉主的命令用此個給恁講：就是主閣來的時，咱諸個猶活的人，會代先許個睏的人。

16

(THR) In-ūi Chú beh pún-sin tùi thiⁿ lo̍h-lâi, ū tōa âu-kiò, ū chì tōa thiⁿ-sài ê siaⁿ, iā ū Siōng-tè ê sàu-kak, chiū hiah ê sio̍k Ki-tok í-keng sí ê lâng beh tāi-seng khí-lâi.

(BCL) 因為主欲本身對天落來，有大喉叫有至大天使的聲，也有上帝的哨角；就許個屬基督已經死的人欲代先起來。

17

(THR) Āu-lâi lán iáu o̍ah-teh ê lâng beh kap in siū chiap-la̍p tī hûn-lāi, jı̍p khong-tiong ngiâ-chih Chú; án-ni lán chiū éng-óan kap Chú saⁿ-kap tī-teh.

(BCL) 後來咱猶活的人欲及受接納佇雲內，入空中迎接主。按呢，咱就永遠及主相及佇。

18

(THR) Só͘-í tio̍h ēng chiah ê ōe saⁿ an-ùi.

(BCL) 所以，著用諸個話相安慰。

Bible Color Mark

• 台語漢字羅馬本
• 巴克禮全羅