帖撒羅尼迦前書 第 3 章

1

(THR) Só͘-í góan í-keng lún bōe tiâu, chiū tiāⁿ-tio̍h beh toaⁿ-sin tòa tī Ngá-tián,

(BCL) 所以阮已經　住，就定著欲單身住佇雅典，

2

(THR) chhe góan ê hiaⁿ-tī Thê-mô͘-thài, i tī Ki-tok ê hok-im chòe Siōng-tè ê chhe-ēng, lâi kian-kò͘ lín, koh ūi-tio̍h lín ê sìn lâi an-ùi lín,

(BCL) 差阮的兄弟提摩太，伊佇基督的福音做上帝的差用，來堅固恁，閣為著恁的信來安慰恁，

3

(THR) bián-tit ū lâng hō͘ hiah ê hōan-lān só͘ iô-tāng, in-ūi lín ka-kī chai lán tú-tio̍h che sī pún tiāⁿ-tio̍h teh.

(BCL) 免得有人互許個患難所搖動。因為恁家己知咱抵著這是本定著。

4

(THR) In-ūi góan kap lín tī-teh ê sî bat tāi-seng kā lín kóng, lán ōe tú-tio̍h hōan-lān, āu-lâi kó-jiân án-ni, sī lín só͘ chai.

(BCL) 因為阮及恁佇的時，曾代先給恁講，咱會抵著患難，後來果然按呢，是恁所知。

5

(THR) Só͘-í góa kì-jiân bōe koh lún-tit, chiū chhe lâng ài chai lín ê sìn cháiⁿ-iūⁿ, kiaⁿ-liáu hit ê chhì-ê ū só͘ chhì lín, chiū góan ê tio̍h-bôa kui tī khang-khang.

(BCL) 所以，我既然閣得，就差人愛知恁的信怎樣，驚了彼個試的有所試恁，就阮的著磨歸佇空空。

6

(THR) Chóng-sī taⁿ Thê-mô͘-thài tùi lín hia lâi kàu góan chia, chiong lín ê sìn kap thiàⁿ ê hó siau-sit pò góan chai, koh kóng-khí lín siông-siông siàu-liām góan, him-bō͘ beh kìⁿ-tio̍h góan, chhin-chhiūⁿ góan ài kìⁿ-tio̍h lín chı̍t iūⁿ;

(BCL) 總是今提摩太對恁遐來到阮遮，將恁的信及疼的好消息報阮知，閣講起恁常常數念阮，欣慕欲見著阮，親像阮愛見著恁一樣。

7

(THR) só͘-í, hiaⁿ-tī ah, góan tī it-chhè khùn-pek hōan-lān ê tiong-kan, tùi lín ê sìn, ūi-tio̍h lín siū an-ùi.

(BCL) 所以兄弟啊，阮佇一切窘迫患難的中間，對恁的信為著恁受安慰。

8

(THR) In-ūi lín nā khiā-chāi tī Chú, góan chiū o̍ah.

(BCL) 因為恁若徛在佇主，阮就活。

9

(THR) Góan tī lán ê Siōng-tè ê bīn-chêng ūi-tio̍h lín chin hoaⁿ-hí, góan ūi-tio̍h chit ê it-chhè ê hoaⁿ-hí, ōe ēng sím-mı̍h ê kám-siā ūi-tio̍h lín pò-tap Siōng-tè ah?

(BCL) 阮佇咱的上帝的面前，為著恁真歡喜，阮為著此個一切的歡喜，會用甚麼的感謝為著恁報答上帝啊？

10

(THR) góan mî-jı̍t chhiat-chhiat kî-tó, ài kìⁿ-tio̍h lín ê bīn, lâi pó͘-móa lín ê sìn só͘ bô kàu.

(BCL) 阮暝日切切祈禱，愛見著恁的面，來補滿恁的信所無夠。

11

(THR) Gōan lán ê Pē Siōng-tè, kap lán ê Chú Iâ-so͘ ín-chhōa góan pîⁿ-tháⁿ ê lō͘ chiū-kūn lín.

(BCL) 願咱的父上帝，及咱的主耶穌引導阮平坦的路就近恁。

12

(THR) Iā gōan Chú hō͘ lín saⁿ-thiàⁿ, sòa thiàⁿ chèng lâng it-hoat chhiong-móa, chhin-chhiūⁿ góan ê thiàⁿ lín,

(BCL) 也願主互恁相疼，續疼眾人益發充滿，親像阮的疼恁；

13

(THR) tì-kàu kian-kò͘ lín ê sim chiâⁿ-sèng bô thang hiâm, tī lán ê Pē Siōng-tè ê bīn-chêng, tī lán ê Chú Iâ-so͘ kap I lóng-chóng ê sèng-tô͘ koh lâi ê sî.

(BCL) 致到堅固恁的心成聖，無通嫌，佇咱的父上帝的面前，佇咱的主耶穌及伊攏總的聖徒閣來的時。

Bible Color Mark

• 台語漢字羅馬本
• 巴克禮全羅