帖撒羅尼迦前書 第 2 章

1

(THR) In-ūi, hiaⁿ-tī, lín ka-kī chai góan chêng kàu lín tiong-kan m̄ sī khang-khang;

(BCL) 因為兄弟，恁家己知阮前到恁中間呣是空空。

2

(THR) to̍k-to̍k tī Hui-lı̍p-pí í-keng tāi-seng siū khó͘ tú-tio̍h lêng-jio̍k, chiàu lín só͘ chai ê, góan tī chōe-chōe cheng-chiàn ê tiong-kan, óa-khò lán ê Siōng-tè, tit-tio̍h hó-táⁿ tùi lín kóng Siōng-tè ê hok-im.

(BCL) 獨獨佇腓立比已經代先受苦抵著凌辱，照恁所知的；阮佇多多爭戰的中間，倚靠咱的上帝，得著好膽對恁講上帝的福音。

3

(THR) In-ūi góan ê khòan-bián m̄ sī chhut tī chha-biū, m̄ sī chhut tī bô chheng-khì, iā m̄ sī ēng kan-chà,

(BCL) 因為阮的勸勉呣是出佇差謬，呣是出佇無清氣，也呣是用奸詐。

4

(THR) chiū-sī góan hō͘ Siōng-tè giām-kè, chiah ēng hok-im thok-tiōng góan, góan chiū chiàu án-ni lâi kóng, m̄ sī chhin-chhiūⁿ hō͘ lâng hoaⁿ-hí ê, chiū-sī hō͘ giām góan ê sim ê Siōng-tè hoaⁿ-hí.

(BCL) 就是阮互上帝驗過，才用福音託仗阮，阮就照按呢來講，呣是親像互人歡喜的，就是互驗阮的心的上帝歡喜。

5

(THR) In-ūi góan lóng bē bat ēng thiám-mī ê ōe, chiàu lín só͘ chai ê, iā bô ēng chng-thāⁿ lâi jia-khàm tham-sim, Siōng-tè chòe kan-chèng.

(BCL) 因為阮攏未曾用諂媚的話，照恁所知的；也無用妝飾來遮蓋貪心，上帝做干證。

6

(THR) Góan chòe Ki-tok ê sù-tô͘, sui-jiân thang kah lâng kèng-tiōng góan, chóng-sī m̄ bat tùi lâng kiû êng-kng, iā bô tùi lín, iā bô tùi pa̍t lâng.

(BCL) 阮做基督的使徒，雖然通教人敬重阮，總是呣曾對人求榮光，也無對恁也無對別人；

7

(THR) Góan chiū-sī un-jiû tī lín tiong-kan, chhin-chhiūⁿ lin-bú io ka-kī ê kiáⁿ-jî.

(BCL) 阮就是溫柔佇恁中間，親像奶母育家己的子兒。

8

(THR) Chhin-chhiūⁿ án-ni góan in-ūi lôan-bō͘ lín, chiū m̄ nā Siōng-tè ê hok-im, liân ka-kī ê sìⁿ-miā iā hoaⁿ-hí hō͘ lín; in-ūi lín sī góan só͘ thiàⁿ-thàng ê.

(BCL) 親像按呢阮因為戀慕恁，就呣若上帝的福音，連家己的生命也歡喜互恁，因為恁是阮所疼痛的。

9

(THR) Hiaⁿ-tī ah, lín kì-tit góan ê tio̍h-bôa kap kan-khó͘, ài bián-tit thoa-lūi lín chı̍t lâng, chiū mî-jı̍t chòe kang, lâi thôan Siōng-tè ê hok-im hō͘ lín.

(BCL) 兄弟啊，恁記得阮的著磨及艱苦，愛免得拖累恁一人，就暝日做工，來傳上帝的福音互恁。

10

(THR) Lín chòe kan-chèng, Siōng-tè iā chòe kan-chèng, góan tùi lín sìn ê lâng, chòe-lâng sī cháiⁿ-iūⁿ sèng-kiat, kong-gī, bô thang hiâm;

(BCL) 恁做干證，上帝也做干證，阮對恁信的人，做人是怎樣聖潔、公義、無通嫌。

11

(THR) chhin-chhiūⁿ lín chai góan cháiⁿ-iūⁿ khóan-thāi lín ta̍k lâng chhin-chhiūⁿ lāu-pē khóan-thāi ka-kī ê kiáⁿ-jî, ū khòan-bián lín, iā an-ùi, iā kan-chèng;

(BCL) 親像恁知阮怎樣款待恁逐人，親像老父款待家己的子兒，有勸勉恁，也安慰，也干證，

12

(THR) sī beh hō͘ lín kiâⁿ tāi-chì ha̍p tī Siōng-tè, chiū-sī tiàu lín jı̍p I ê kok kap êng-kng ê.

(BCL) 是欲互恁行代誌合佇上帝，就是召恁入伊的國及榮光的。

13

(THR) Só͘-í góan iā kám-siā Siōng-tè bô soah, in-ūi lín tùi góan sêng-siū só͘ thiaⁿ Siōng-tè ê tō-lí ê sî, lín chiap-la̍p i, bô lia̍h-chòe lâng ê tō-lí, chiū-sī lia̍h-chòe Siōng-tè ê tō-lí, (sı̍t-chāi chin-chiàⁿ sī), che chiū-sī chhut-la̍t kiâⁿ tī lín sìn ê lâng ê tiong-kan.

(BCL) 所以，阮也感謝上帝無息，因為恁對阮承受所聽上帝的道理的時，恁接納伊；無掠做人的道理，就是掠做上帝的道理。實在真正是，這就是出力行佇恁信的人的中間。

14

(THR) In-ūi, hiaⁿ-tī ah, lín ū o̍h Iû-thài tōe, tiàm-tī Ki-tok Iâ-so͘, Siōng-tè chiah ê kàu-hōe, in-ūi lín siū-tio̍h lín tâng cho̍k ê hām-hāi, chhin-chhiūⁿ in siū-tio̍h Iû-thài lâng hām-hāi chı̍t iūⁿ.

(BCL) 因為兄弟啊，恁有學猶太地佇基督耶穌上帝諸個教會；因為恁受著恁同族的陷害，親像受著猶太人陷害一樣。

15

(THR) Iû-thài lâng hāi-sí Chú Iâ-so͘ kap chiah ê sian-ti, iā kek-tio̍k góan; in bô hō͘ Siōng-tè hoaⁿ-hí, koh kap chèng lâng chòe tùi-te̍k;

(BCL) 猶太人害死主耶穌及諸個先知，也革逐阮。無互上帝歡喜，閣及眾人做對敵；

16

(THR) góan kà-sī gōa-pang lâng, beh hō͘ in tit-tio̍h kiù, in chó͘-tòng góan, tì-kàu in ê chōe-ok sî-sî teh kòan-móa; nā-sī siū-khì kàu tī in í-keng ke̍k-thâu.

(BCL) 阮教示外邦人欲互得著救，阻擋阮，致到的罪惡時時貫滿。若是受氣到佇已經極頭。

17

(THR) Hiaⁿ-tī ah, góan chiām-sî kap lín lī-pia̍t, seng-khu lī-pia̍t sim bô lī-pia̍t, chiū un-khûn ná chhiat chin ài kìⁿ-tio̍h lín ê bīn.

(BCL) 兄弟啊，阮暫時及恁離別，身軀離別，心無離別；就殷勤愈切，真愛見著恁的面。

18

(THR) In-ūi góan ài chiū-kūn lín, góa Pó-lô chı̍t pái koh chı̍t pái ài khì, nā-sī Sat-tàn chó͘-tòng góan.

(BCL) 因為阮愛就近恁；我保羅一擺閣一擺愛去，若是撒但阻擋阮。

19

(THR) In-ūi góan ê ǹg-bāng kap hoaⁿ-hí, í-kı̍p só͘ khoa-kháu ê bián-liû sī sím-mı̍h? Kiám m̄ sī lín tng lán ê Chú Iâ-so͘ koh-lâi ê sî, tī I ê bīn-chêng mah?

(BCL) 因為阮的向望及歡喜，以及所誇口的冕旒是甚麼？豈呣是恁當咱的主耶穌閣來的時、佇伊的面前嗎？

20

(THR) In- ūi lín sī góan ê êng-kng kap hoaⁿ-hí.

(BCL) 因為恁是阮的榮光及歡喜。

Bible Color Mark

• 台語漢字羅馬本
• 巴克禮全羅