帖撒羅尼迦前書 第 1 章

1

(THR) Pó-lô kap Se-lah í-kı̍p Thê-mô͘-thài phoe kià hō͘ Thiap-sat-lô-nî-ka lâng ê kàu-hōe, chiū-sī tiàm-tī Pē Siōng-tè kap Chú Iâ-so͘ Ki-tok ê; gōan lín tit-tio̍h un-tián pêng-an.

(BCL) 保羅、及西拉，以及提摩太批寄互帖撒羅尼迦人的教會，就是佇父上帝及主耶穌基督的。願恁得著恩典、平安！

2

(THR) Góan ūi-tio̍h lín chèng lâng siông-siông kám-siā Siōng-tè, tī kî-tó ê tiong-kan siàu-liām lín;

(BCL) 阮為著恁眾人常常感謝上帝，佇祈禱的中間數念恁，

3

(THR) tī Siōng-tè lán ê Pē ê bīn-chêng, tn̂g-tn̂g siàu-liām lín ū sìn chiū kiâⁿ-chòe, ū jîn-ài chiū tio̍h-bôa, ū ǹg-bāng lán ê Chú Iâ-so͘ Ki-tok chiū thun-lún.

(BCL) 佇上帝咱的父的面前，長長數念恁有信就行做，有仁愛就著磨，有向望咱的主耶穌基督就吞。

4

(THR) Siōng-tè só͘ thiàⁿ ê hiaⁿ-tī ah, góan chai lín ê siū kéng-sóan.

(BCL) 上帝所疼的兄弟啊，阮知恁的受揀選；

5

(THR) In-ūi góan ê hok-im kàu tī lín, m̄ sī chāi-tī kóng ōe nā-tiāⁿ, sī chāi-tī kôan-lêng, chāi-tī Sèng Sîn, kap kian-kò͘ ê sìn; chhin-chhiūⁿ lín chai góan tī lín tiong-kan, ūi-tio̍h lín lâi chiâⁿ-chòe sím-mı̍h téng-hō ê lâng.

(BCL) 因為阮的福音到佇恁，呣是在佇講話若定，是在佇權能在佇聖神，及堅固的信，親像恁知阮佇恁中間，為著恁來成做甚麼等號的人。

6

(THR) Koh lín í-keng tī chōe-chōe khó͘-lān, ēng Sèng Sîn só͘ siúⁿ-sù ê hoaⁿ-hí, lâi sêng-siū tō-lí, chiū o̍h góan iā o̍h Chú,

(BCL) 閣恁已經佇多多苦難，用聖神所賞賜的歡喜，來承受道理，就學阮也學主；

7

(THR) tì-kàu lín chòe Má-kî-tùn A-kai-a lóng-chóng sìn ê lâng ê bô͘-iūⁿ.

(BCL) 致到恁做馬其頓、亞該亞攏總信的人的模樣。

8

(THR) In-ūi Chú ê tō-lí tùi lín thôan-chhut, m̄ nā tī Má-kî-tùn kap A-kai-a nā-tiāⁿ, chiū-sī lín ǹg Siōng-tè ê sìn í-keng ta̍k só͘-chāi pò-iông, tì-kàu góan m̄ bián kóng sím-mı̍h.

(BCL) 因為主的道理對恁傳出。呣若佇馬其頓及亞該亞若定，就是恁向上帝的信已經逐所在報揚；致到阮呣免講甚麼。

9

(THR) In-ūi in ka-kī pò-bêng kóng góan kàu lín tiong-kan sī sím-mı̍h khóan, iā lín cháiⁿ-iūⁿ ū lī-khui ngó͘-siōng, kui tī Siōng-tè, lâi ho̍k-sāi o̍ah koh chin ê Siōng-tè;

(BCL) 因為家己報明講阮到恁中間是甚麼款，也恁怎樣有離開偶像，歸佇上帝，來服事活閣真的上帝，

10

(THR) iā thèng-hāu I ê Kiáⁿ tùi thiⁿ lo̍h-lâi, chiū-sī I tùi sí-lâng tiong hō͘ I koh-o̍ah ê Iâ-so͘, sī hit ê chín-kiù lán chhut chiong-lâi ê siū-khì ê.

(BCL) 也聽候伊的子對天落來，就是伊對死人中互伊復活的耶穌──是彼個拯救咱出將來的受氣者。

Bible Color Mark

• 台語漢字羅馬本
• 巴克禮全羅