帖撒羅尼迦後書 第 2 章

1

(THR) Hiaⁿ-tī ah, lūn-kàu lán ê Chú Iâ-so͘ Ki-tok ê lîm-kàu, kap lán chiah-ê chū-chı̍p kui I, góan kiû lín,

(BCL) 兄弟啊，論到咱的主耶穌基督的臨到，及咱諸個聚集歸伊，阮求恁：無論對神、抑是對話，抑是對批假冒阮的名的，講主的日現在到啦，

2

(THR) bô lūn tùi sîn, á-sī tùi ōe, á-sī tùi phoe ká-mō͘ góan ê miâ ê, kóng Chú ê jı̍t hiān-chāi kàu lah, lín ê sim-chì bo̍h-tit khòai-khòai iô-tāng, iā bo̍h-tit kiaⁿ-hiâⁿ;

(BCL) 恁的心志莫得快快搖動，也莫得驚惶。

3

(THR) bô lūn ēng sím-mı̍h hoat, it-khài bo̍h-tit hō͘ lâng ín-iú; in-ūi hit jı̍t iáu-bē kàu, tek-khak tāi-seng ū pōe-kàu ê sū, kap hit ê chōe-ok ê lâng, chiū-sī tîm-lûn ê lâng, chhut-hiān;

(BCL) 無論用甚麼法，一概莫得互人引誘；因為彼日猶未到，的確代先有背教的事，及彼個罪惡的人，就是沈淪的人，出現。

4

(THR) i sī chòe tùi-te̍k, iā chū-ko pôaⁿ-kè it-chhè chheng chòe Siōng-tè kap siū kèng-pài ê; sīm-chì chē tī Siōng-tè ê tiān, piáu-bêng chòe Siōng-tè.

(BCL) 伊是做對敵，也自高，過一切稱做上帝及受敬拜的，甚至坐佇上帝的殿，表明做上帝。

5

(THR) Góa iáu kap lín tī-teh ê sî, bat chiong chiah ê sū kā lín kóng, lín kiám bōe kì-tit mah?

(BCL) 我猶及恁佇的時，曾將諸個事給恁講，恁豈記得嗎？

6

(THR) Taⁿ hit ê chó͘-tòng i, hō͘ i kàu i ê kî chiah chhut-hiān ê, lín iā chai.

(BCL) 今彼個阻擋伊，互伊到伊的期才出現的，恁也知。

7

(THR) In-ūi put-hoat ê pì-bı̍t í-keng teh ūn-tōng, to̍k-to̍k hiān-kim ū chı̍t ê chó͘-tòng i ê, tı̍t-kàu hit ê chó͘-tòng ê tùi tiong-ng tû-khì.

(BCL) 因為不法的秘密已經運動，獨獨現今有一個阻擋伊的，直到彼個阻擋的對中央除去，

8

(THR) Hit sî hit ê put-hoat ê beh chhut-hiān, Chú Iâ-so͘ beh ēng I ê kháu-khì lâi bia̍t i, ēng I lîm-kàu ê hián-hiān lâi hòe-bô i.

(BCL) 彼時彼個不法的欲出現。主耶穌欲用伊的口氣來滅伊，用伊臨到的顯現來廢無伊。

9

(THR) Hit ê put-hoat ê lîm-kàu sī chiàu Sat-tàn ê ūn-hêng, ēng it-chhè ê kôan-lêng, sîn-jiah, kap ké ê tiāu-thâu,

(BCL) 彼個不法的臨到，是照撒但的運行，用一切的權能、神蹟，及假的兆頭，

10

(THR) koh ēng it-chhè put-gī ê khúi-khiat kiâⁿ tī hiah ê teh tîm-lûn ê, in-ūi in bô chiap-la̍p chin-lí ê thiàⁿ lâi tit kiù.

(BCL) 閣用一切不義的詭譎行佇許個沈淪的；因為無接納真理的疼，來得救。

11

(THR) Ūi-tio̍h án-ni Siōng-tè chiong chha-biū ê ūn-hêng kàng hō͘ in, hō͘ in sìn pe̍h-chha̍t;

(BCL) 為著按呢，上帝將差謬的運行降互，互信白賊，

12

(THR) hō͘ kìⁿ-nā m̄ sìn chin-lí, khì hoaⁿ-hí put-gī ê, lóng siū gí-tòan.

(BCL) 互見若呣信真理、去歡喜不義者攏受擬斷。

13

(THR) Nā-sī Chú só͘ thiàⁿ ê hiaⁿ-tī ah, góan eng-kai thòe lín siông-siông kám-siā Siōng-tè, in-ūi Siōng-tè tùi khí-thâu kéng lín, beh hō͘ lín tit kiù, sī chāi-tī Sîn ê chiâⁿ-sèng kap sìn chin-lí.

(BCL) 若是主所疼的兄弟啊，阮應該替恁常常感謝上帝；因為上帝對起頭揀恁，欲互恁得救，是在佇神的成聖，及信真理。

14

(THR) Ūi-tio̍h chit-ê, I tùi góan só͘ thôan ê hok-im bat tiàu lín, lâi tit-tio̍h lán ê Chú Iâ-so͘ Ki-tok ê êng-kng.

(BCL) 為著此個，伊對阮所傳的福音曾召恁，來得著咱的主耶穌基督的榮光。

15

(THR) Só͘-í, hiaⁿ-tī ah, tio̍h khiā-chāi; lín só͘ tit-tio̍h ê thôan-siū, bô lūn sī tùi chhùi kóng ê, á-sī tùi góan ê phoe, hōan só͘ ha̍k-sı̍p ê, tio̍h chip-siú i.

(BCL) 所以，兄弟啊，著徛在，恁所得著的傳授，無論是對嘴講的，抑是對阮的批，凡所學習的，著執守伊。

16

(THR) Lán ê Chú Iâ-so͘ Ki-tok, kap lán ê Pē Siōng-tè, chiū-sī thiàⁿ lán, iā tī un-tián chiong éng-óan ê an-ùi kap hó ê ǹg-bāng siúⁿ-sù lán ê,

(BCL) 咱的主耶穌基督及咱的父上帝，就是疼咱、也佇恩典將永遠的安慰及好的向望賞賜咱者，

17

(THR) gōan I an-ùi lín ê sim, kian-kò͘ lín tī it-chhè hó ê só͘ kiâⁿ, hó ê só͘ kóng.

(BCL) 願伊安慰恁的心，堅固恁佇一切好的所行好的所講。

Bible Color Mark

• 台語漢字羅馬本
• 巴克禮全羅