提摩太後書 第 4 章

1

(THR) Góa tī Siōng-tè ê bīn-chêng kap beh sím-phòaⁿ o̍ah-lâng sí-lâng ê Ki-tok Iâ-so͘ ê bīn-chêng, ūi-tio̍h I ê hián-hiān kap I ê koh-lâi,

(BCL) 我佇上帝的面前，及欲審判活人死人的基督耶穌的面前，為著伊的顯現及伊的閣來，吩咐你：

2

(THR) hoan-hù lí tio̍h thôan tō-lí, bô lūn tek-sî put-tek-sî, tio̍h choan-bū i, ēng pah-poaⁿ ê khoan-iông kà-sī lâi chek-pī, kéng-kài, khòan-bián.

(BCL) 著傳道理，無論得時不得時，著專務伊；用百般的寬容、教示、來責備、警戒、勸勉。

3

(THR) In-ūi sî-jı̍t beh kàu lâng beh m̄ iông-ún toan-chiàⁿ ê kà-sī, beh hī-khang chiūⁿ, ài thiaⁿ chōe-chōe sian-siⁿ, chiàu ka-kī ê su-io̍k;

(BCL) 因為時日欲到，人欲呣容允端正的教示，欲耳孔癢，愛聽多多先生，照家己的私慾，

4

(THR) koh o̍at thâu m̄ thiaⁿ chin-lí, khì ǹg bô iáⁿ ê ōe.

(BCL) 閣越頭呣聽真理，去向無影的話。

5

(THR) To̍k-to̍k lí hōan sū tio̍h chiat-chè, jím-siū kan-khó͘, kiâⁿ thôan hok-im ê ê kang, lâi chīn lí ê chit-hūn.

(BCL) 獨獨你凡事著節制，忍受艱苦，行傳福音者的工，來盡你的職份。

6

(THR) In-ūi taⁿ góa ê huih teh chòe kòan-tiān, góa kè-sì ê kî kàu lah.

(BCL) 因為今我的血做灌奠，我過世的期到啦。

7

(THR) Góa í-keng cheng-chiàn hó ê cheng-chiàn, í-keng chīn pháu-cháu ê lō͘-chām, í-keng siú só͘ sìn ê tō-lí.

(BCL) 我已經爭戰好的爭戰，已經盡跑走的路站，已經守所信的道理。

8

(THR) Taⁿ liáu-āu ū gī ê bián-liû kā góa pī-pān hē-teh, chiū-sī Chú chòe kong-gī ê sím-phòaⁿ-si tī hit jı̍t beh hō͘ góa; m̄ nā hō͘ góa, iā beh hō͘ kìⁿ-nā him-bō͘ I hián-hiān ê lâng.

(BCL) 今了後，有義的冕旒給我備辦下，就是主做公義的審判司佇彼日欲互我；呣若互我，也欲互見若欣慕伊顯現的人。

9

(THR) Lí tio̍h tì-ì kín-kín lâi chhē góa.

(BCL) 你著致意緊緊來尋我。

10

(THR) In-ūi Tí-má him-bō͘ chit ê sè-kan, chiū lī-khui góa, khì Thiap-sat-lô-nî-ka; Kek-le̍k-sū khì Ka-lia̍p-thài, Thê-to khì That-má-thài.

(BCL) 因為底馬欣慕此個世間，就離開我，去帖撒羅尼迦，革勒士去加拉太，提多去撻馬太，

11

(THR) Chí-ū Lō͘-ka kap góa tī-teh. Tio̍h chhōa Má-khó kap lí saⁿ-kap lâi, in-ūi i tī ho̍k-sāi ê kang ū lī-ek góa.

(BCL) 只有路加及我佇。著導馬可及你相及來，因為伊佇服事的工有利益我。

12

(THR) Chhui-ki-kó͘ góa í-keng chhe i khì Í-hut-só͘.

(BCL) 推基古我已經差伊去以弗所。

13

(THR) Góa tī Te̍k-lô-a lâu tī Ka-pò͘ in tau ê gōa-saⁿ, lí lâi ê sî tio̍h sòa tòa lâi, ia̍h tio̍h tòa hiah ê chheh, hiah ê iûⁿ-phê ê koh khah iàu-kín.

(BCL) 我佇特羅亞留佇加布兜的外衫，你來的時著續帶來，也著帶許個冊，許個羊皮的閣卡要緊。

14

(THR) Phah-tâng sai-hū A-le̍k-san-tāi chōe-chōe hāng hāi góa, Chú beh chiàu i ê só͘ kiâⁿ lâi pò-èng i.

(BCL) 拍銅師傅亞力山大多多項害我；主欲照伊的所行來報應伊。

15

(THR) Lí iā tio̍h tiuⁿ-tî i, in-ūi i put-chí tùi-te̍k góan ê ōe.

(BCL) 你也著張持伊，因為伊不止對敵阮的話。

16

(THR) Góa thâu chı̍t pái hun-sò͘ ê sî bô lâng óa-kūn góa, chèng lâng lóng lī-khui góa; gōan chit ê chōe bô kui tī in.

(BCL) 我頭一擺分訴的時，無人倚近我，眾人攏離開我；願此個罪無歸佇。

17

(THR) Nā-sī Chú khiā tī góa sin-piⁿ, hō͘ góa ióng-kiāⁿ, hō͘ só͘ tio̍h soan-thôan ê tùi góa lâi it-chīn pò-iông, koh hō͘ gōa-pang lóng thiaⁿ-kìⁿ; góa iā tit-tio̍h kiù chhut tī sai ê chhùi.

(BCL) 若是主徛佇我身邊，互我勇健，互所著宣傳的對我來一盡報揚，閣互外邦攏聽見；我也得著救出佇獅的嘴。

18

(THR) Chú beh kiù góa thoat-lī lóng-chóng ê pháiⁿ-tāi, iā beh kiù góa jı̍p tī I thiⁿ-nı̍h ê kok; gōan êng-kng kui I kàu tāi-tāi bô chīn. À-bēng.

(BCL) 主欲救我脫離攏總的歹代，也欲救我入佇伊天裡的國。願榮光歸伊，到代代無盡。阿們。

19

(THR) Chhéng-an Pek-ki-lah A-ku-lah, kap O-nî-sek-hut ê ke.

(BCL) 請安百基拉、亞居拉，及阿尼色弗的家。

20

(THR) Í-lah-to͘ tiàm-tī Ko-lîm-to; Tek-lô-hui-mô͘ phòa-pīⁿ, góa lâu i tī Bí-lī-to͘.

(BCL) 以拉都佇哥林多。特羅非摩破病，我留伊佇米利都。

21

(THR) Tio̍h tì-ì tī tang-thiⁿ chêng lâi. Iú-pò͘-lô, Po͘-tiân, Lī-lô͘, kek-ló-tia, kap chèng hiaⁿ-tī lóng chhéng-an lí.

(BCL) 著致意佇冬天前來。友布羅、布田、利奴、革老爹，及眾兄弟攏請安你。

22

(THR) Gōan Chú kap lí ê sîn tī-teh; gōan un-tián kap lín tī-teh.4

(BCL) 願主及你的神佇。願恩典及恁佇！

Bible Color Mark

• 台語漢字羅馬本
• 巴克禮全羅