列王紀下 第 20 章

1

(THR) Hiah ê jı̍t ê tiong-kan Hi-se-ka phòa-pīⁿ tit-beh sí. A-mô͘-su ê kiáⁿ sian-ti Í-sài-a, khì kìⁿ i, tùi i kóng, Iâ-hô-hoa án-ni kóng, Lí tio̍h siat-hoat lí ê ke-sū, in-ūi lí tit-beh sí, bōe o̍ah.

(BCL) 許個日的中間，希西家破病得欲死。亞摩斯的子先知以賽亞去見伊，對伊講：「耶和華按呢講：『你著設法你的家事，因為你得欲死，活。』」

2

(THR) I chiū o̍at-tńg bīn ǹg-piah, kî-tó Iâ-hô-hoa kóng,

(BCL) 伊就越轉面向壁，祈禱耶和華講：

3

(THR) Iâ-hô-hoa ah, kiû Lí kì-liām góa tī Lí ê bīn-chêng cháiⁿ-iūⁿ chûn ôan-chôan ê sim, chiàu sêng-sı̍t lâi kiâⁿ; koh chòe Lí só͘ khòaⁿ-chòe hó--ê. Hi-se-ka chiū tōa-siaⁿ thî-khàu.

(BCL) 「耶和華啊，求你記念我佇你的面前怎樣存完全的心，照誠實來行，閣做你所看做好的。」希西家就大聲啼哭。

4

(THR) Í-sài-a chhut-khì, iáu-bē kàu tiong-īⁿ, Iâ-hô-hoa ê ōe chiū lîm-kàu i kóng,

(BCL) 以賽亞出去，猶未到中院，耶和華的話就臨到伊，講：

5

(THR) Lí oat-tò-tńg, kā Góa ê peh-sìⁿ ê jîn-kun Hi-se-ka kóng, Lí ê chó͘ Tāi-pı̍t ê Siōng-tè Iâ-hô-hoa án-ni kóng, Góa í-keng thiaⁿ-kìⁿ lí ê kî-tó, khòaⁿ-kìⁿ lí ê ba̍k-sái; khòaⁿ ah, Góa beh i-hó lí; kàu tē-saⁿ jı̍t, lí beh chiūⁿ-khì Iâ-hô-hoa ê tiān.

(BCL) 「你越倒轉給我的百姓的人君希西家講：你的祖大衛的上帝──耶和華按呢講：『我已經聽見你的祈禱，看見你的目屎，看啊！我欲醫好你；到第三日，你欲上去耶和華的殿。

6

(THR) Góa beh ke-thiⁿ lí ê hè-siū cha̍p-gō͘ nî; koh Góa beh kiù lí kap chit ê siâⁿ thoat-lī A-su̍t ông ê chhiú; Góa ūi-tio̍h ka-kī ê iân-kò͘, koh ūi-tio̍h Góa ê lô͘-po̍k Tāi-pı̍t ê iân-kò͘, beh pó-hō͘ chit ê siâⁿ.

(BCL) 我欲加添你的歲壽十五年，閣我欲救你及此個城脫離亞述王的手。我為著家己的緣故，閣為著我的奴僕大衛的緣故，欲保護此個城。』」

7

(THR) Í-sài-a kóng, Tio̍h the̍h chı̍t-tè bû-hoa-kó-piáⁿ lâi; in chiū the̍h-lâi, tah tī lia̍p-á; ông chiū hó.

(BCL) 以賽亞講：「著提一塊無花果餅來。」就提來，貼佇仔，王就好。

8

(THR) Hi-se-ka mn̄g Í-sài-a kóng, Iâ-hô-hoa beh i-hó góa, kàu tē-saⁿ jı̍t góa beh chiūⁿ-khì Iâ-hô-hoa ê tiān, ū sím-mı̍h tiāu-thâu?

(BCL) 希西家問以賽亞講：「耶和華欲醫好我，到第三日，我欲上去耶和華的殿，有甚麼兆頭？」

9

(THR) Í-sài-a kóng, Iâ-hô-hoa beh chiâⁿ I só͘ kóng ê, che sī Iâ-hô-hoa beh hō͘ lí ê tiāu-thâu; lí beh jı̍t-iáⁿ chìn-chêng cha̍p-tō͘, á-sī thè-āu cha̍p-tō͘ ah?

(BCL) 以賽亞講：「耶和華欲成伊所講的。這是耶和華欲互你的兆頭：你欲日影進前十度？抑是退後十度啊？」

10

(THR) Hi-se-ka ìn kóng, Jı̍t-iáⁿ chìn-chêng cha̍p-tō͘ sī khah-khòai; bô--lah, tio̍h jı̍t-iáⁿ thè-āu cha̍p-tō͘.

(BCL) 希西家應講：「日影進前十度是卡快，無啦，著日影退後十度。」

11

(THR) Sian-ti Í-sài-a kiû-kiò Iâ-hô-hoa, I chiū hō͘ A-hap-su ê jı̍t-kui chìn-chêng ê jı̍t-iáⁿ thè-āu cha̍p-tō͘.

(BCL) 先知以賽亞求叫耶和華，伊就互亞哈斯的日晷進前的日影，退後十度。

12

(THR) Tng-sî Pa-pí-lûn ông Pa-la̍h-tàn ê kiáⁿ Pí-lô-ta̍t-pa-la̍h-tàn thiaⁿ-kìⁿ Hi-se-ka phòa-pīⁿ, chiū sàng phoe-sìn kap lé-mı̍h hō͘ Hi-se-ka.

(BCL) 當時，巴比倫王巴拉但的子比羅達巴拉但聽見希西家破病，就送批信及禮物互希西家。

13

(THR) Hi-se-ka thiaⁿ sù-chiá ê ōe, chiū chiong i khǹg pó-mı̍h ê chhù, kim, gûn, hiuⁿ-liāu, kùi-khì ê iû, kap i ê kun-chong-ke̍k, kap hú-khò͘-lāi it-chhè só͘-ū-ê, lóng hō͘ in khòaⁿ; i ê ke-tiong kap i chôan-kok ê lāi-bīn, Hi-se-ka bô chı̍t hāng bô hō͘ in khòaⁿ.

(BCL) 希西家聽使者的話，就將伊囥寶物的厝、金銀、香料、貴氣的油，及伊的軍藏局，及府庫內一切所有的，攏互看。伊的家中及伊全國的內面，希西家無一項無互看。

14

(THR) Tùi án-ni sian-ti Í-sài-a lâi kìⁿ Hi-se-ka ông, mn̄g i kóng, Chiah ê lâng kóng sím-mı̍h? in tùi toh-lo̍h lâi kìⁿ lí? Hi-se-ka kóng, In tùi hn̄g-hn̄g ê só͘-chāi, chiū-sī tùi Pa-pí-lûn lâi.

(BCL) 對按呢先知以賽亞來見希西家王，問伊講：「諸個人講甚麼？對叨落來見你？」希西家講：「對遠遠的所在就是對巴比倫來。」

15

(THR) Í-sài-a kóng. In tī lí ê ke ū khòaⁿ-kìⁿ sím-mı̍h? Hi-se-ka ìn kóng, Hōan-nā góa ke-tiong só͘-ū-ê in lóng ū khòaⁿ-kìⁿ; góa ê châi-pó ê tiong-kan bô chı̍t-hāng bô hō͘ in khòaⁿ-kìⁿ.

(BCL) 以賽亞講：「佇你的家有看見甚麼？」希西家應講：「凡若我家中所有的攏有看見，我的財寶的中間無一項無互看見。」

16

(THR) Í-sài-a tùi Hi-se-ka kóng, Lí tio̍h thiaⁿ Iâ-hô-hoa ê ōe.

(BCL) 以賽亞對希西家講：「你著聽耶和華的話，

17

(THR) Khòaⁿ ah, jı̍t-chí beh kàu, hōan-nā lí ke-lāi só͘-ū-ê kap lí ê lia̍t-chó͘ chek-chū kàu hiān-kim-ê, lóng beh siū-chhiúⁿ kàu Pa-pí-lûn, bô lâu chı̍t-hāng; che sī Iâ-hô-hoa kóng ê.

(BCL) 看啊，日子欲到，凡若你家內所有的及你的列祖積聚到現今的，攏欲受搶到巴比倫，無留一項。這是耶和華講的。

18

(THR) Koh tùi lí pún-sin só͘ siⁿ ê kiáⁿ-sun, kî-tiong ū-ê beh siū lia̍h--khì, tī Pa-pí-lûn ê ông-kiong tng thài-kàm.

(BCL) 閣對你本身所生的子孫，其中有的欲受掠去佇巴比倫的王宮當太監。」

19

(THR) Hi-se-ka tùi Í-sài-a kóng, Lí só͘ thôan Iâ-hô-hoa ê ōe sī hó; koh kóng, Góa iáu tī-teh ê jı̍t, nā ū thài-pêng kian-kò͘, kiám m̄-sī hó?

(BCL) 希西家對以賽亞講：「你所傳耶和華的話是好！閣講，我猶佇的日若有太平堅固，豈呣是好？」

20

(THR) Hi-se-ka kî-û ê sū, kap i ê lêng-le̍k, i cháiⁿ-iūⁿ ku̍t tî khui kau, ín chúi jı̍p siâⁿ, kiám bô lóng kì tī Iû-tāi lia̍t-ông ê kì-lio̍k mah?

(BCL) 希西家其餘的事及伊的能力，伊怎樣掘池、開溝、引水入城，豈無攏記佇猶大列王的記錄嗎？

21

(THR) Hi-se-ka kap i ê lia̍t-chó͘ tâng khùn. I ê kiáⁿ Má-ná-se sòa-chiap i chòe ông.

(BCL) 希西家及伊的列祖同睏。伊的子瑪拿西續接伊做王。

Bible Color Mark

• 台語漢字羅馬本
• 巴克禮全羅