列王紀下 第 16 章

1

(THR) Lī-má-lī ê kiáⁿ Pí-ka cha̍p-chhit nî, Iû-tāi ông Iok-thán ê kiáⁿ A-hap-su chē-ūi.

(BCL) 利瑪利的子比加十七年，猶大王約坦的子亞哈斯坐位。

2

(THR) A-hap-su chē-ūi ê sî, jī-cha̍p hè, tī Iâ-lō͘-sat-léng chòe-ông cha̍p-la̍k nî; bô chhin-chhiūⁿ i ê chó͘ Tāi-pı̍t kiâⁿ Iâ-hô-hoa i ê Siōng-tè só͘ khòaⁿ-chòe hó ê sū.

(BCL) 亞哈斯坐位的時二十歲，佇耶路撒冷做王十六年；無親像伊的祖大衛行耶和華──伊的上帝所看做好的事，

3

(THR) Chiū-sī kiâⁿ Í-sek-lia̍t chiah ê ông ê lō͘, koh hō͘ i ê kiáⁿ keng-kè hé, chiàu Iâ-hô-hoa tùi Í-sek-lia̍t lâng ê bīn-chêng kóaⁿ-chhut gōa-pang lâng só͘ kiâⁿ khó-ò͘ⁿ ê sū.

(BCL) 就是行以色列諸個王的路，閣互伊的子經過火，照耶和華對以色列人的面前趕出外邦人所行可惡的事，

4

(THR) Koh tī soaⁿ-thâu-tôaⁿ, tī soaⁿ ê téng-bīn, tī ta̍k châng chhiⁿ-chhùi ê chhiū-kha, hiàn-chè sio-hiuⁿ.

(BCL) 閣佇山頭壇、佇山的頂面、佇逐欉青翠的樹腳獻祭燒香。

5

(THR) Hit-sî A-lân ông Lī-sìn kap Í-sek-lia̍t ông Lī-má-lī ê kiáⁿ Pí-ka chiūⁿ-lâi kong-kek Iâ-lō͘-sat-léng, ûi-khùn A-hap-su; chóng-sī bōe iâⁿ i.

(BCL) 彼時亞蘭王利汛及以色列王利瑪利的子比加上來攻擊耶路撒冷，圍困亞哈斯，總是贏伊。

6

(THR) Tng-sî A-lân ông Lī-sìn siu-hôe Í-la̍h-tha hō͘ A-lân; chiū kóaⁿ Iû-tāi lâng chhut Í-la̍h-tha. A-lân lâng chiū lâi Í-la̍h-tha, khiā-khí hia, kàu kin-á-jı̍t.

(BCL) 當時亞蘭王利汛收回以拉他互亞蘭，就趕猶大人出以拉他。亞蘭人就來以拉他，徛起遐，到今仔日。

7

(THR) A-hap-su chhe sù-chiá khì kìⁿ A-su̍t ông Thê-kek-la̍h-pí-lia̍t-sek, kóng, Góa sī lí ê lô͘-po̍k, lí ê kiáⁿ; taⁿ A-lân ông kap Í-sek-lia̍t ông kong-kek góa; kiû lí chiūⁿ lâi kiù góa thoat-lī in ê chhiú.

(BCL) 亞哈斯差使者去見亞述王提革拉毗列色，講：「我是你的奴僕、你的子。今亞蘭王及以色列王攻擊我，求你上來救我脫離的手。」

8

(THR) A-hap-su chiong Iâ-hô-hoa tiān-lāi kap ông-kiong hú-khò͘ só͘ ū ê kim gûn, chòe lé-mı̍h sàng hō͘ A-su̍t ông.

(BCL) 亞哈斯將耶和華殿內及王宮府庫所有的金銀做禮物送互亞述王。

9

(THR) A-su̍t ông thiaⁿ i; A-su̍t ông chiū chiūⁿ-khì kong-kek Tāi-má-sek, chhú i, lia̍h i ê peh-sìⁿ kàu Kiat-jíⁿ, thâi-sí Lī-sìn.

(BCL) 亞述王聽伊，亞述王就上去攻擊大馬色，取伊，掠伊的百姓到吉珥，死利汛。

10

(THR) A-hap-su ông khì Tāi-má-sek beh ngiâ-chih A-su̍t ông Thê-kek-la̍h-pí-lia̍t-sek; tī Tāi-má-sek khòaⁿ-kìⁿ chı̍t chō tôaⁿ. A-hap-su ông chiong hit ê tôaⁿ ê khóan-sit, kui-bô͘, chè-tō͘, kià hō͘ chè-si Ou-lī-a.

(BCL) 亞哈斯王去大馬色欲迎接亞述王提革拉毗列色，佇大馬色看見一座壇，亞哈斯王將彼個壇的款式、規模、制度，寄互祭司烏利亞。

11

(THR) Chè-si Ou-lī-a chiū khí chı̍t chō tôaⁿ; chiàu A-hap-su ông tùi Tāi-má-sek só͘ kià-lâi it-chhè ê tô͘, chiàu án-ni chè-si Ou-lī-a chō i; thèng-hāu A-hap-su ông tùi Tāi-má-sek lâi.

(BCL) 祭司烏利亞就起一座壇，照亞哈斯王對大馬色所寄來一切的圖，照按呢祭司烏利亞造伊，聽候亞哈斯王對大馬色來。

12

(THR) Ông tùi Tāi-má-sek tò-lâi; ông khòaⁿ-kìⁿ tôaⁿ, ông kūn-óa tôaⁿ; hiàn-chè tī hí(**hit) téng-bīn.

(BCL) 王對大馬色倒來，王看見壇，王近倚壇，獻祭佇彼頂面；

13

(THR) Sio i ê sio-chè, kap sò͘-chè, koh kòan-tiān, chiong siā-un-chè ê huih hiù tī tôaⁿ--nih.

(BCL) 燒伊的燒祭，及素祭，閣灌奠，將謝恩祭的血灑佇壇裡，

14

(THR) Koh chiong Iâ-hô-hoa thâu-chêng ê tâng-tôaⁿ, tùi tiān ê thâu-chêng, chiū-sī tùi i ê tôaⁿ kap Iâ-hô-hoa tiān ê tiong-kan, sóa--lâi hē tī i ê tôaⁿ ê pak--sì.

(BCL) 閣將耶和華頭前的銅壇對殿的頭前，就是對伊的壇及耶和華殿的中間徙來下佇伊的壇的北勢。

15

(THR) A-hap-su ông bēng-lēng chè-si Ou-lī-a kóng, Chá-khí sî ê sio-chè, ê-hng sî ê sò͘-chè, ông ê sio-chè sò͘-chè, kok-lāi chèng peh-sìⁿ ê sio-chè sò͘-chè kap kòan-tiān, lóng tio̍h sio tī tōa-tôaⁿ ê téng-bīn; sio-chè kap chè-sū ê huih iā tio̍h hiù tī chit ê tôaⁿ-téng. Chóng-sī tâng-tôaⁿ góa beh chòe mn̂g ê lō͘-ēng.

(BCL) 亞哈斯王命令祭司烏利亞講：「早起時的燒祭、下昏時的素祭，王的燒祭、素祭，國內眾百姓的燒祭、素祭，及灌奠，攏著燒佇大壇的頂面。燒祭及祭祀的血也著灑佇此個壇頂，總是銅壇我欲做問的路用。」

16

(THR) Chè-si Ou-lī-a chiū chiàu A-hap-su ông só͘ bēng-lēng-ê khì kiâⁿ.

(BCL) 祭司烏利亞就照亞哈斯王所命令的去行。

17

(THR) A-hap-su ông chhò-tn̄g hiah ê chō ê kîⁿ, chiong phûn tùi hiah ê chō sóa--lo̍h-lâi; koh chiong tâng-hái tùi chài hái ê tâng-gû-téng poaⁿ--lo̍h-lâi, hē tī pho͘-hoe-chio̍h ê só͘-chāi.

(BCL) 亞哈斯王剉斷許個座的墘，將盆對許個座徙落來，閣將銅海對載海的銅牛頂搬落來，下佇舖灰石的所在；

18

(THR) Koh in-ūi A-su̍t ông ê iân-kò͘, chiong tiān-lāi ūi-tio̍h an-hioh-jı̍t só͘ khí ê lông, kap ông tùi gōa-bīn jı̍p-lâi ê lông, tùi Iâ-hô-hoa ê tiān î-sóa.

(BCL) 閣因為亞述王的緣故，將殿內為著安息日所起的廊及王對外面入來的廊，對耶和華的殿移徙。

19

(THR) A-hap-su kî-û só͘ kiâⁿ ê sū, kiám bô lóng kì tī Iû-tāi lia̍t-ông ê kì-lio̍k mah?

(BCL) 亞哈斯其餘所行的事豈無攏記佇猶大列王的記錄嗎？

20

(THR) A-hap-su kap i ê lia̍t-chó͘ tâng-khùn, kap i ê lia̍t-chó͘ chòng tī Tāi-pı̍t ê siâⁿ. I ê kiáⁿ Hi-se-ka sòa-chiap i chòe ông.

(BCL) 亞哈斯及伊的列祖同睏，及伊的列祖葬佇大衛的城。伊的子希西家續接伊做王。

Bible Color Mark

• 台語漢字羅馬本
• 巴克禮全羅