撒母耳記上 第 24 章

1

(THR) Sò-lô tui-jip Hui-lī-sū lâng tò-lâi ê sî, ū lâng kā i kóng, Khòaⁿ ah, Tāi-pı̍t tiàm tī Ún-ki-tí ê khòng-iá.

(BCL) 掃羅追非利士人倒來的時，有人給伊講：「看啊，大衛踮佇隱基底的曠野。」

2

(THR) Sò-lô chiū tùi Í-sek-lia̍t tiong chhōa kéng-sóan ê peng saⁿ-chheng, khì chhē Tāi-pı̍t, kap tè i ê lâng, khì iá-soaⁿ-iûⁿ ê chio̍h-pôaⁿ;

(BCL) 掃羅就對以色列中導揀選的兵三千，去尋大衛及隨伊的人，去野山羊的石磐。

3

(THR) kàu lō͘-piⁿ ê iûⁿ-tiâu, tī-hia ū tōng, Sò-lô jı̍p-khì beh tāi-piān. Tāi-pı̍t kap tè i ê lâng bih tī tōng-lāi khah chhim ê só͘-chāi.

(BCL) 到路邊的羊　，佇遐有洞，掃羅入去欲大便。大衛及隨伊的人匿佇洞內卡深的所在。

4

(THR) Kun-tè Tāi-pı̍t ê lâng kā i kóng, Iâ-hô-hoa bat kā lí kóng, Góa beh chiong lí ê tùi-te̍k kau tī lí ê chhiú, chiàu lí só͘ khòaⁿ-chòe hó-ê khóan-thāi i; khòaⁿ ah, hit ê jı̍t kàu lah. Tāi-pı̍t chiū khí-lâi, àm-chīⁿ koah Sò-lô gōa-ho̍k ê saⁿ-á-ku.

(BCL) 跟隨大衛的人給伊講：「耶和華曾給你講：『我欲將你的對敵交佇你的手，照你所看做好的款待伊。』看啊，彼個日到啦！」大衛就起來，暗靜割掃羅外服的衫仔裾。

5

(THR) Āu-lâi Tāi-pı̍t sim-lāi ka-kī chek-pī; in-ūi koah Sò-lô ê saⁿ-á-ku.

(BCL) 後來大衛心內家己責備，因為割掃羅的衫仔裾；

6

(THR) Tùi tè i ê lâng kóng, Gōan Iâ-hô-hoa kìm-chí góa, tùi góa ê chú Iâ-hô-hoa só͘ boah-iû-ê kiâⁿ chit ê sū, khí-chhiú lâi kong-kek i, in-ūi i sī Iâ-hô-hoa só͘ boah-iû-ê.

(BCL) 對隨伊的人講：「願耶和華禁止我，對我的主耶和華所抹油者行此個事起手來攻擊伊，因為伊是耶和華所抹油者。」

7

(THR) Tāi-pı̍t ēng chiah ê ōe chó͘-chí tè i ê lâng , m̄-chún in khí-lâi kong-kek Sò-lô. Sò-lô khí-lâi, tùi tōng-lāi chhut-khì kiâⁿ i ê lō͘.

(BCL) 大衛用諸個話阻止隨伊的人，呣准起來攻擊掃羅。掃羅起來，對洞內出去行伊的路。

8

(THR) Āu-lâi Tāi-pı̍t iā khí-lâi, tùi tōng-lāi chhut-khì, tī Sò-lô ê āu-bīn kiò kóng, Góa ê chú, góa ê ông. Sò-lô o̍at-thâu khòaⁿ; Tāi-pı̍t chiū khut-sin phak tī tōe-nih pài.

(BCL) 後來大衛也起來，對洞內出去，佇掃羅的後面叫講：「我的主，我的王！」掃羅越頭看，大衛就屈身、仆佇地裡拜。

9

(THR) Tāi-pı̍t tùi Sò-lô kóng, Lí siáⁿ-sū thiaⁿ lâng ê ōe, kóng, Tāi-pı̍t siūⁿ beh hāi lí ah?

(BCL) 大衛對掃羅講：「你啥事聽人的話，講，大衛想欲害你啊？

10

(THR) Kin-á-jı̍t lí chhin-ba̍k khòaⁿ-kìⁿ, kin-á-jı̍t lí tī tōng-lāi, Iâ-hô-hoa chiong lí kau tī góa ê chhiú; ū lâng kah góa thâi lí; chóng-sī góa thiàⁿ-sioh lí; góa kóng, Góa bô beh chhun-chhiú hāi góa ê chú; in-ūi i sī Iâ-hô-hoa só͘ boah-iû-ê.

(BCL) 今仔日你親目看見，今仔日你佇洞內，耶和華將你交佇我的手；有人教我你，總是我疼惜你，我講：『我無欲伸手害我的主，因為伊是耶和華所抹油者。』

11

(THR) Góa ê pē ah, lí khòaⁿ cheh, khòaⁿ lí gōa-ho̍k ê saⁿ-á-ku tī góa ê chhiú; góa koah lí ê gōa-ho̍k saⁿ-á-ku, bô thâi lí; tùi án-ni lí thang khòaⁿ-chhut chiū chai góa ê chhiú bô chòe sím-mı̍h pháiⁿ, bô pōe-ge̍k lí; góa m̄-bat tek-chōe lí, chóng-sī lí chhin-chhiūⁿ phah-la̍h siàu-siūⁿ góa ê sìⁿ-miā.

(BCL) 我的父啊，你看唧看你外服的衫仔裾佇我的手。我割你的外服衫仔裾，無你；對按呢你通看出就知我的手無做甚麼歹無悖逆你。我呣曾得罪你，總是你親像拍獵數想我的生命。

12

(THR) Gōan Iâ-hô-hoa tī lí góa ê tiong-kan phòaⁿ-tòan, Iâ-hô-hoa beh tī lí ê sin-chiūⁿ kā góa sin-oan; chóng-sī góa ê chhiú bô beh hāi lí.

(BCL) 願耶和華佇你我的中間判斷，耶和華欲佇你的身上給我伸冤，總是我的手無欲害你。

13

(THR) Chhin-chhiūⁿ kó͘-chá lâng ū chı̍t-kù sio̍k-gú kóng, Pháiⁿ-sū tùi pháiⁿ-lâng chhut; chóng-sī góa ê chhiú m̄ kāng lí.

(BCL) 親像古早人有一句俗語講：『歹事對歹人出。』總是我的手呣共你。

14

(THR) Í-sek-lia̍t ông chhut-lâi beh chhē chī-chūi ah? lí tui-jip chī-chūi ah? put-kò chhē chı̍t chiah sí-káu, chı̍t lia̍p kā-cháu.

(BCL) 以色列王出來欲尋是誰啊？你追是誰啊？不過尋一隻死狗，一粒虼蚤。

15

(THR) Só͘-í gōan Iâ-hô-hoa chòe sím-phòaⁿ-si, phòaⁿ-tòan tī lí góa ê tiong-kan; koh kàm-chhat lâi piān-hō͘ góa ê àn-kiāⁿ, kiù góa chhut lí ê chhiú.

(BCL) 所以願耶和華做審判司，判斷佇你我的中間，閣鑑察來辯護我的案件，救我出你的手。」

16

(THR) Tāi-pı̍t tùi Sò-lô kóng chiah ê ōe soah, Sò-lô kóng, Góa ê kiáⁿ Tāi-pı̍t, che sī lí ê siaⁿ mah? Sò-lô chiū chhut-siaⁿ thî-khàu;

(BCL) 大衛對掃羅講諸個話息，掃羅講：「我的子大衛，這是你的聲嗎？」掃羅就出聲啼哭，

17

(THR) kā Tāi-pı̍t kóng, Lí pí góa khah kong-gī, in-ūi lí ēng hó pò góa, chóng-sī góa ēng pháiⁿ pò lí;

(BCL) 給大衛講：「你比我卡公義；因為你用好報我，總是我用歹報你。

18

(THR) lí kin-á-jı̍t sī piáu-bêng ēng hó khóan-thāi góa, in-ūi Iâ-hô-hoa chiong góa kau tī lí ê chhiú, chóng-sī lí bô thâi-sí góa.

(BCL) 你今仔日是表明用好款待我；因為耶和華將我交佇你的手，總是你無死我。

19

(THR) Lâng nā tú-tio̍h i ê tùi-te̍k, kiám ū pàng i pêng-an khì mah? Gōan Iâ-hô-hoa in-ūi lí kin-á-jı̍t tùi góa só͘ kiâⁿ-ê, ēng hó pò lí;

(BCL) 人若抵著伊的對敵，豈有放伊平安去嗎？願耶和華因為你今仔日對我所行的，用好報你。

20

(THR) khòaⁿ ah, taⁿ góa chai lí tek-khak beh chòe-ông, Í-sek-lia̍t kok beh kian-kò͘ tī lí ê chhiú.

(BCL) 看啊，今我知你的確欲做王，以色列國欲堅固佇你的手。

21

(THR) Taⁿ lí tio̍h kí Iâ-hô-hoa tùi góa chiù-chōa, góa kè-sin liáu, bô chián-tû góa ê hō͘-è, tī góa ê pē ê ke bô bia̍t-bô góa ê miâ.

(BCL) 今你著指耶和華對我咒誓，我過身了，無剪除我的後裔，佇我的父的家無滅無我的名。」

22

(THR) Tāi-pı̍t chiū ǹg Sò-lô chiù-chōa. Sò-lô chiū tò-khì i ê chhù. Tāi-pı̍t kap tè i ê lâng chiūⁿ-khì ōe-só͘.

(BCL) 大衛就向掃羅咒誓，掃羅就倒去伊的厝；大衛及隨伊的人上去衛所。

Bible Color Mark

• 台語漢字羅馬本
• 巴克禮全羅