撒迦利亞 第 2 章 - 台語漢字羅馬本

1

我閣抬目觀看，看啊，有一人手提繩索。

2

我講：「你欲去叨落？」伊給我講：「欲去量耶路撒冷，看伊有偌闊有偌長。」

3

看啊，及我講話的使者出去，閣有一位使者出來迎接伊，

4

對伊講：「你走去給彼個少年人講，講耶路撒冷欲有人徛起，親像無城牆的鄉里，因為彼中間人及精牲真多。

5

耶和華講：我欲做伊四圍的火城，我亦欲做中間的榮光。」

6

耶和華講：「呃！呃！恁著對北方的地逃走，因為我已經四散恁親像佇天裡四面的風。這是耶和華講的。

7

呃！錫安啊，及巴比倫的百姓徛起者啊，你著逃脫。

8

萬軍的耶和華講，佇榮光的了後，差我到許個搶掠恁的列國，犯著恁者是犯著伊目睭中的瞳子。

9

看啊，我欲佇的頂面舞我的手，就欲互的奴僕搶劫，恁就知萬軍的耶和華差我啦。

10

錫安的百姓啊，著唱歌歡喜，看啊，因為我欲來欲踮佇恁中間。這是耶和華講的。」

11

彼日，欲有多多國歸倚耶和華，做我的百姓。閣我欲踮佇你的中間，你就知萬軍的耶和華差我到你遐。

12

耶和華欲得著猶大做伊的業佇聖地，亦欲閣揀選耶路撒冷。

13

見若有血氣者，佇耶和華的面前攏著靜靜；因為伊對聖的所在起來。