撒迦利亞 第 1 章 - 台語漢字羅馬本

1

大利烏二年八月，耶和華的話臨到易多的孫、比利家的子先知撒迦利亞，講：

2

「耶和華曾大受氣恁的列祖。

3

所以你著給講，萬軍的耶和華按呢講：恁著越轉來尋我；萬軍的耶和華講：我亦欲越轉來尋恁。這是萬軍的耶和華講的。

4

莫得學恁的列祖。前的先知曾叫講，萬軍的耶和華按呢講：『恁著回頭離開恁的歹路及恁的歹所行。』總是呣俯耳孔，也呣聽我。這是耶和華講的。

5

恁的列祖佇叨落啊？許個先知會永遠活嗎？

6

總是我的言語，我的律例，我所吩咐我諸個奴僕先知者，豈無到佇恁的列祖嗎？就回頭，講：『萬軍的耶和華按算欲照咱的所行所做施行佇咱，伊已經照按呢款待咱啦。』」

7

大利烏二年十一月，就是細罷特月二十四日，耶和華的話臨到易多的孫、比利家的子先知撒迦利亞，講：

8

「我暝時觀看，看啊，有一人騎赤馬，徛佇低地岡拈樹的中間。佇伊的後面閣有赤色、黃色、白色的馬。」

9

我講：「我的主啊，這是甚麼？」及我講的使者就給我講：「我欲指示你知諸個是甚麼。」

10

彼個徛佇岡拈樹中間的人應講：「這是耶和華所差往來佇地上者。」

11

就應彼個徛佇岡拈樹中耶和華的使者講：「阮已經往來佇地上，看啊，全地安然平定。」

12

對按呢，耶和華的使者應講：「萬軍的耶和華啊，你受氣耶路撒冷及猶大諸個城已經七十年，你無施憐憫欲到底時啊？」

13

耶和華就用好話，安慰的話，應彼個及我講話的使者。

14

及我講話的使者對我講：「你著出聲講，萬軍的耶和華按呢講：我為著耶路撒冷為著錫安，熱心到極。

15

我真受氣許個安然徛起的列國，因為我前只有小可受氣，就加添伊的艱苦。

16

所以耶和華按呢講：今我倒轉來耶路撒冷，施憐憫，我的殿欲閣起佇彼中間，繩索欲牽佇耶路撒冷的頂面。這是萬軍的耶和華講的。

17

你著閣出聲講，萬軍的耶和華按呢講：我諸個城欲閣豐盛發達。耶和華欲閣安慰錫安，閣揀選耶路撒冷。」

18

我抬目觀看，看啊，有四支角。

19

我就問及我講話的使者講：「諸個是甚麼？」伊應我講：「諸個就是拍散猶大、以色列，及耶路撒冷諸個角。」

20

耶和華閣互我看見四個師傅。

21

我講：「來欲做甚麼？」伊應講：「許個是拍散猶大的角，互人呣敢抬頭；總是諸個師傅來是欲互驚，拍倒列國的角，就是曾舉起的角攻擊猶大互伊四散者。」