撒迦利亞 第 3 章 - 台語漢字羅馬本

1

伊閣互我看見：祭司頭約書亞徛佇耶和華使者的面前；撒但亦徛佇伊的正旁，做伊的對敵。

2

耶和華對撒但講：「撒但啊，耶和華責備你！就是揀選耶路撒冷的耶和華責備你！這豈呣是對火中拔出來的一塊柴嗎？」

3

約書亞穿污穢的衫徛佇使者的面前。

4

伊應徛佇伊的面前的講：「恁著褪伊污穢的衫」；閣對伊講：「看啊，我互你脫離你的罪惡，欲互你穿娞的衫。」

5

我閣講：「用娞的帽戴佇伊的頭殼。」就用娞的帽戴佇伊的頭殼，給伊穿衫，耶和華的使者徛佇邊仔。

6

耶和華的使者警戒約書亞講：

7

「萬軍的耶和華按呢講：你若行我的路，守我所交託你的，你就通管理我的家，顧守我的院；我亦欲互你佇諸個徛的人中間有出入的路。

8

祭司頭約書亞啊，你及坐佇你的面前的同伴攏著聽。（是做兆頭的人。）看啊，我欲互我的奴僕稱做樹枝者來。

9

看啊，我所下佇約書亞面前的石，佇一塊石有七蕊目睭。萬軍的耶和華講：看啊，我欲雕刻所雕刻者，亦欲佇一日的中間除去此個地方的罪惡。

10

當彼日，恁逐人欲請厝邊來到葡萄樹下，及無花果樹下。這是萬軍的耶和華講的。」