提多書 第 2 章 - 台語漢字羅馬本

1

許個合佇端正的教示的，你著講伊。

2

就是老人呣通愛食酒、著端莊、守己，閣佇信、佇仁愛、佇吞，無呣純全。

3

老婦仁人也著按呢，行動舉止著合佇敬虔，莫得誹謗，也莫得做酒的奴才，著用好教示人，

4

才通教督少年的婦仁人，疼的丈夫，疼的子兒，

5

守己，貞潔，料理家事，善良，順服家己的丈夫，免得上帝的道理受著謗瀆。

6

少年的查甫人，你也著按呢勸守己。

7

你凡事著家己做好所行的模樣；

8

佇教示著端莊、無邪，言語端正，無通嫌，互對敵家己見誚，無地通講咱的歹。

9

勸奴僕著順服的主人，凡事互歡喜，

10

無抵觸，無偷提，逐項著顯明忠信，互凡事榮光咱的救主上帝的教。

11

因為上帝救眾人的恩已經顯明，

12

警戒咱著棄拺不虔及此世間的私慾，用守己、公義、敬虔來過日佇此世代，

13

欣慕彼個大福氣的向望，及咱至大的上帝及救主耶穌基督榮光的顯現。

14

伊為著咱獻家己，欲贖咱脫離一切的不法，閣為著本身洗清咱，做伊家己的百姓，就是熱心佇諸個好所行的。

15

諸個事你著講，著苦勸，用攏總的權來責備人；呣通互人藐視你。