提多書 第 1 章 - 台語漢字羅馬本

1

上帝的奴僕，耶穌基督的使徒保羅，為著上帝揀選的百姓的信及欲互識敬虔的真理，

2

佇永遠活的向望，就是無白賊的上帝佇永世代的代先所應允的，

3

若是到期，就顯明伊的道理；就是照咱的救主上帝的命令所交託我傳的。

4

批寄互提多，就是照相及有的信做我真的子的。願你對父上帝及咱的救主基督耶穌得著恩典、平安！

5

我留你佇革哩底的緣故，就是愛你將許個辦未明白的事攏辦到整齊，閣照我所吩咐你的，佇逐個城設立長老。

6

若有人無通嫌，做一個婦仁人的丈夫，子兒有信，無人告放蕩不法的，才通。

7

因為監督著無通嫌，親像上帝的管家，無自恃，無快受氣，無因為食酒來起事，無愛拍人，無貪不義的錢；

8

著好款待出外人，愛好，守己，公義，聖潔，節制；

9

堅固守彼個照正教真實的道理，互伊會用端正的教示來勸勉人，閣會辯倒許個駁問的人。

10

因為有多多呣順服的人，就是講浮漂的話欺騙人的；屬割禮的人閣卡是按呢。

11

此號人的嘴著給伊塞密。為著不義的財利，教示所呣應該教示的，來敗壞人的全家。

12

中間一人，就是彼族的先知有講：「革哩底人常常講白賊，做歹獸，貪食閣貧憚。」

13

此個干證是真實。所以，你著嚴嚴責備，互對信會純全，

14

無愛聽猶太人的無影話及悖謬真理的人的誡命。

15

在清氣的人，萬物攏是清氣；在許個污穢無信的人，無一項物清氣，連的心志及良心亦攏污穢。

16

家己承認做識上帝的，若是佇的所行就呣認伊；是可惡的，悖逆的，佇一切的好事做不重用的。