提多書 第 3 章 - 台語漢字羅馬本

1

著互人記得應該降服辦政事的、掌權的，來順趁伊，常常便來行逐項的好事。

2

無誹謗，無相爭，著溫和，對眾人顯明逐樣的溫柔。

3

因為咱前也是無知、悖逆、受迷惑、降服佇百般的私慾，及快樂，活佇惡毒怨妒的中間，是可惡的，也大家相怨恨。

4

若是咱的救主──上帝的仁慈及伊的疼人顯明的時，

5

伊就救咱；呣是對佇咱所行的義，是照伊的憐憫，對重頭生的洗及聖神的換新。

6

聖神就是伊對咱的救主耶穌基督所大大降落佇咱的，

7

互咱對伊的恩來稱做義的，通照永活的向望來成做後嗣。

8

此個話是真實。閣論諸個事我愛你硬硬干證伊，互信上帝的人致意做諸個好的事業。諸個攏是好，有利益人的。

9

總是你著閃避戇戇的辯駁，世系的談論，相爭，及為著律法的爭戰，因為諸個是無利益閣空空。

10

結黨的人，已經警戒伊一擺閣一擺，就著據在伊。

11

因為知此號人是悖謬，家己擬伊的罪，猶原犯。

12

我差亞提馬抑是推基古去尋你的時，你著致意到尼哥坡里來尋我，因為我已經定著佇遐過冬天。

13

法律師西納及亞波羅，你著致意給送行，互無欠缺。

14

閣咱諸個人著學習做好的事業，來備辦許個的確著的所費，免得無結實。

15

及我佇的人攏請安你。凡若佇信來疼阮的人你著請安。

16

願恩典及恁眾人相及佇！