雅歌 第 6 章 - 台語漢字羅馬本

1

你此個女界中第一娞的啊，你所戀愛者去叨落？你所戀愛者越轉去叨落，互阮通及你去尋伊。

2

我所戀愛者落去伊的園，到芳花歸排，佇園內飼羊群閣挽百合花。

3

我屬我所戀愛者，我所戀愛者也屬我；伊佇百合花的中間飼羊群。

4

我所疼者啊，你娞親像得撒，生做好親像耶路撒冷，威儀親像抬大旗的軍隊。

5

你的目睭呣通看我，因為會奪我的心神。你的頭毛親像山羊歸陣倒佇基列的山邊。

6

你的嘴齒親像歸陣的羊母，洗清氣上來，逐隻有雙生子，無一隻失落伊的子。

7

你的鬢邊佇帕內，親像一塊石榴。

8

有六十個王后八十個嬪妃，也有算了的宮女。

9

我的鴿，我的純全者，是獨一的，伊是伊的老母獨生的，是生伊者所特別疼。諸個查某囝仔看見就謳咾伊有福氣；王后嬪妃看見也謳咾伊。

10

彼個向外面看出來、親像早起時的光、娞親像月、清潔親像日，威儀親像抬大旗的軍隊的是是誰啊？

11

我落去硬殼的果子園，欲看山谷中青翠的植物，欲看葡萄發芛抑未，石榴開花抑未。

12

無拍算的時，我的心安置我佇尊貴的人的車。

13

倒來啊，倒來啊，書拉密啊；倒來，倒來，互阮看見你。恁為何欲看書拉密，親像看瑪哈念的跳舞啊？