雅歌 第 7 章 - 台語漢字羅馬本

1

人君的查某子啊，你的腳穿鞋怎樣許娞！你的大腿圓，滑親像珍寶，是奇巧的手工做成的。

2

你的肚臍親像圓的杯，無欠缺調和的酒；你的腹肚親像歸堆的麥，周圍有百合花。

3

你的二個奶親像一對鹿仔，就是鹿母雙生的。

4

你的頷頸親像象牙的塔；你的目睭親像希實本的池，倚近巴特拉併；你的鼻親像黎巴嫩的塔，向大馬色的。

5

你的頭殼佇你的身軀親像迦密；你的頭殼頂垂落來的毛是紫色的；王為著伊的頭毛離得。

6

我所疼者，你怎樣許娞！怎樣許通歡喜，互人歡喜快樂！

7

你的身材親像棗樹；你的奶親像歸葩的果子。

8

我講：我欲上此欉棗樹，擒伊的枝。願你的奶親像葡萄歸葩，你的氣味親像蘋果；

9

你的嘴親像上好的酒。為著我所戀愛的飲了滑喉，流入睏的人的嘴唇。

10

我屬我所戀愛者，伊也欣慕我。

11

我所戀愛者啊，來啊！咱來去山場；咱來去鄉社歇暝。

12

咱透早起來去葡萄園，看葡萄發芛開花抑無，石榴開蕊抑無；我佇遐欲將愛情互你。

13

風茄出芳味，佇咱的門邊有逐樣真好的果子，新的舊的攏有；我所戀愛者，這攏是我給你積聚的。