雅歌 第 5 章 - 台語漢字羅馬本

1

我的小妹，我的新娘啊，我入我的園內，挽我的沒藥及我的香料，食我的蜜房及我的蜜，飲我的酒及我的奶。我諸個朋友，著來食！我所戀愛的，來飲，閣飲多多！

2

我睏，我的心猶精神。這是我戀愛者的聲；伊拍門講：我的小妹，我所疼者，我的鴿，我的純全者，求你給我開門；因為我的頭殼露水滿滿，我的頭毛互暝時的露水滴　。

3

我已經褪我的衫，欲怎樣閣穿？我已經洗我的腳，怎樣通閣拍垃墋啊？

4

我所戀愛者對門孔伸手入來，我的心腸為著伊來激動。

5

我起來，欲給我所戀愛的開門。我的二支手的沒藥滴落去；我的指頭仔有沒藥汁滴佇門閂柄。

6

我給我所戀愛者開門；總是我所戀愛者已經越轉身去啦。我為著伊的話，神不附體；我尋伊，也尋著！我叫伊，伊也無應。

7

城內巡查的人抵著我，拍我，傷我；顧城牆的人搶我身軀的巾。

8

耶路撒冷的眾查某囝仔啊，我切切吩咐你；若抵著我所戀愛者，著給伊講，我因為愛情致病。

9

你此個女界中第一娞的啊，你所戀愛者比別個所戀愛者有甚麼卡贏？你所戀愛者比別個所戀愛者有甚麼卡贏，你才按呢切切吩咐阮？

10

我所戀愛者是白閣紅，是萬人中的第一個。

11

伊的頭殼親像上好的金；伊的頭毛垂落來，黑親像烏鴉。

12

伊的目睭親像溪邊的鴿，用奶洗伊，安置合式。

13

伊的嘴親像芳花歸排，親像芳草的台；伊的嘴唇親像百合花，，閣滴落沒藥汁。

14

伊的二手親像金環，鑲黃玉；伊的身軀親像雕刻的象牙，周圍鑲藍寶石。

15

伊的腳腿親像鍚石，安佇好金的座；伊的款式親像黎巴嫩，閣真娞親像柏香樹。

16

伊的話極其甜；伊完全通疼。耶路撒冷的眾查某囝仔啊，這是我所戀愛者；這是我的朋友。