詩篇 第 41 章 - 台語漢字羅馬本

1

〔大衛的詩，交互樂官。〕眷顧喪鄉人的有福氣！當患難的日，耶和華欲救伊。

2

耶和華欲保全伊，互伊活；伊欲佇地上享福。求你呣通將伊交互對敵，來照所愛。

3

伊倒在床，耶和華欲扶持伊；伊破病的時，你欲料理伊的被舖。

4

我曾講：耶和華啊，求你憐憫我，醫好我的心神！因為我有得罪佇你。

5

我的對敵用歹話議論我講：伊底時會死，伊的名底時會滅無？

6

伊若來看我就講無影話；伊的心積聚奸惡，出去外口就四界講。

7

一切怨恨我的人，嗤舞嗤呲議論我；設計謀欲害我。

8

講：有怪病住佇伊的身軀；伊已經倒床，永閣起來。

9

連我知己的朋友，我所倚靠、食我的餅者，抬起腳後踢我。

10

耶和華啊，求你憐憫我，互我起來，通報應！

11

因為我的對敵得著對我誇口卡贏，我對按呢就知你歡喜我。

12

論到我，你因為我的純全就扶持我，互我永遠徛佇你的面前。

13

著謳咾耶和華──以色列的上帝，對永遠到永遠。阿們！閣阿們！